PROVERBIOS 21 - Biblia Quichua Cañar 2010

1Jatun mandacpac shungu

Mandac Diospac maquipica

callpacuc yacu shinami.

Diosmi pai munashcata ruhuachin.

2Runapac yuyaipica

tucui pai ruhuashcacunami

alli ricurin.

Ashtahuanpish Mandac Diosmi

shungutaca pezac shina ricucun.

3Mandac Diosmanca cashcata ruhuana,

alli ruhuanami animalcunata cushpa

huañuchishcatapish yalli alli ricurin.

4Jatun tucushpa ricunapish,

shungupi jatun tucunapish

Diosta mana manchana yuyaipish juchami.

5Imatapish alli yuyarishpa

charishcaca achcami tucunga.

Ashtahuanpish mana alli yuyarishpa,

huacta huacta charishcacunaca

tucurishpami catinga.

6Llullashpa jahualla chayucyashpaca

huañuitami mashcacun.

Chai yalli valishcacunaca

samai shina chingarinllami.

7Diosta mana manchaccunataca

paicuna shuhuashcallatacmi tucuchinga.

Paicunaca cashcata ruhuanataca

mana munarcacunachu.

8Jatun mana allita ruhuac runapac causaica

pandaripac, mana ricsishca ñan shinami.

Ashtahuanpish allicunallata ruhuacpacca

imata ruhuashcapish allimi.

9Imatapish rimarishpa

llaquichic huarmihuan

jatun huasipi causanapac randica,

jahua azoteapi shuc cuchullapi

causanami ashtahuan alli.

10Diosta mana manchac runapac shungupica

pitapish llaqui japichunmi munan.

Pitapish mana cuyanchu.

11Burlashpa asic runata

llaquichicpica, yuyaita mana charicpish,

yuyaisapami tucunga.

Yuyaisapa runata cunacpicarin,

ashtahuan yachaisapami tucun.

12Diosca paita mana manchac runapac

huasi ucupurataca ricucunmi.

Diosta mana manchaccuna

paicuna mana allita ruhuashcamanta

chingaricuctapish ricucunmi.

13Huaccha runa caparishpa mañacpi,

mana uyac runataca quipata pai

caparicpipish mana uyangachu.

14Imatapish pacalla carashpaca,

yalli piñarishcatapish allichinmi.

Pacalla pagashpaca nina japiric shina

piñarishcatami allichin.

15Cashcata ruhuac allita ruhuashpaca

cushicunmi.

Ashtahuanpish mana allita

ruhuaccunamanca

tucuchic llaquimi ricurin.

16Alli yachaita saquishpa caruyacca

huañushcacunahuanmi tandanacugringa.

17Mana allicunata ruhuashpa

cushicuc runaca huacchayangami.

Vinotapish, mishquilla ashnacuctapish

munac runaca mana charicyangachu.

18Cashcata ruhuac runataca

Diosta mana manchac runata cushpa,

allita ruhuac runataca

yachashca jahua mana cazuc runata

cushpami quishpichin.

19Imatapish rimashpa piñachic

huarmihuan causanapac randica,

shitashca pambapi causanami

ashtahuan alli.

20Yuyaisapa runapac huasipica

ima valiccunapish, aceitepish tiyanmi.

Ashtahuanpish yuyai illac runaca

tucuitami tucuchin.

21Cashcata ruhuashpa,

llaquishpa causacca alli nishcapish,

cashcata ruhuac nishcapish cangami.

Shinallatac causaitapish charingami.

22Yuyaisapa runaca

sinchi runacunapac pueblotapish quichunmi.

Paicuna jarcangami yuyacushca

jatun pircatapish urmachinmi.

23Imatapish rimarinamanta calluta

jarcaric runaca paipac causai

ama llaquita apachunmi cuidan.

24Cariyac, jatun tucuc runataca

mana cazushpa asic runa nincunami.

Yallita cariyashpa mana cazushpami,

imatapish ruhuan.

25Quilla runaca paipac maqui

imata mana ruhuasha nicpimi,

imata charinata munashpa huañucun.

26Punzhanta imacunata munashpami causan.

Ashtahuanpish cashcata ruhuac runaca

mana misashpa carangapacpish charinmi.

27Diosta mana manchaccunaca

animalta Diosman cushpa

rupachishcapish millanami.

Mana alli shunguhuan cushcatacarin

ashtahuanmi mana ricunayachin.

28Llullashpa huillac runaca huañungami.

Ashtahuanpish allita uyac runaca

allimi llucshinga.

29Diosta mana manchac runaca

imatapish allita ruhuashca shinami purin.

Ashtahuanpish allita ruhuac runaca

paipac causaipica allimi can.

30Alli yachaipish, ima yuyaipish,

ima cunashcapish Mandac Diostaca

mana ati pudinchu.

31Macanacui punzhapacca

caballotami yallita allichincuna.

Ashtahuanpish Mandac Dios

mishachicpimi mishancuna.