1Jatun mandac Asueroca chai punzhallatacmi Judá llacta gentecunata piñac Amanpac huasitaca jatun mandac Esterman curca. Esterca Mardoqueopac familia cashcataca ñami huillashca carca. Chaimantami Mardoqueoca jatun mandacpacman shamurca.
2Chaipimi jatun mandacca Amanpac sortejasta quichushpa Mardoqueoman curca. Shinallatac Amanpac huasita ricuchunca Mardoqueotami Esterca churarca.
3Esterca jatun mandac-huan cutin parlanacungapac shamushpami paipac chaqui ñaupapi huacashpa cungurirca. Shina cungurishpami Agageopac huahua huahuapuramanta Amán Judá llacta gentecunata huañuchishpa mana allita ruhuangapac mandashcata anchuchichun mañarca.
4Shina mañacpimi jatun mandacca pai charicushca curi varata Esterman chutarca. Chaimantami Esterca jatarishpa, jatun mandacpac ñaupapi shayarishpa,
5jatun mandactaca:
—Can jatun mandacpac ñaupapi ñuca alli ricurishca cacpi, can jatun mandacman alli cana cacpica, can ñucata cuyashpaca, Agageopac huahua huahuapuramanta Hamedatapac churi Amán can jatun mandacpac tucui llactacunapi causac Judá llacta gentecunata tucuchichun mandashpa quillcashcata anchuchingapac shuc quillcata cachai.
6¿Maitatac ñuca llacta gentecuna llaqui tucucucta ricucushayari? ¿Maitatac ñuca llacta gentecunata huañuchishpa tucuchicuctaca chapacushayari?— nirca.
7Shina nicpimi, jatun mandac Asueroca jatun mandac Estertapish, Judá llactamanta Mardoqueotapish rimashpaca:
—Riqui, Amanpac huasitaca Estermanmi curcani. Cutin paitaca Judá llacta gentecunata huañuchigricushcamantami caspipi huarcushpa huañuchirca.
8Judá llacta gentecunapac ashtahuan ima alli cana cacpica, cancunallatac jatun mandac ñuca shutipi quillcaichiclla. Chaica jatun mandac ñucapac shutipi quillcashpa, jatun mandac ñucapac sortejas-huan sellashcataca pipish mana anchuchi pudinchu— nirca.
9Chaimantami Siván nishca quimsa quilla ishcai chunga quimsa punzhapi jatun mandacpac quillcaccunata cayarca. Chai quillcaccunami Judá llacta gentecunaman, soldadocunata mandaccunaman India llactamanta Etiopía llactacaman patsac ishcai chunga canchis llactacunaman quillcarca. Cada llacta ima shina quillcac shinallatacmi paicunapac rimaipi quillcarca. Judá llacta gentecunamanpish paicuna quillcac shinallatacmi paicunapac rimaipi quillcarca.
10Chai quillcacunataca jatun mandac Asueropac shutipi quillcashpami, paipac sortejasllahuantac sellashpa quillcata apaccunaman cacharca. Paicunataca jatun mandacpac michina pambacunapi tiyac yallita callpac caballocunapimi cacharca.
11Chai quillcacunapimi jatun mandacca cada pueblopi causac Judá gentecunataca paicunata ama huañuchichunca tandanacushpa chaparaichic. Mai pueblocunamanta cashpapish huañuchingapac muyunacushpa shamucpica tucui huañuchishpa chingachinguichic. Paicunataca huahuacunatapish, huarmicunatapish mana llaquishpa huañuchishpa, paicuna ima charishcatapish japinguichiclla nishpami mandashca carca.
12Tucui chaitaca shuc punzhallapi Adar nishca chunga ishcai quilla chunga quimsa punzhapi jatun mandac Asuero mandacuc llactacunapi ruhuana carca.
13Chai punzhapica Judá gentecuna paicunata piñaccuna llaquichishca shinallatac llaquichingapac allichirishca cachunmi, chai mandashpa quillcashcata tucui gentecuna yachachun tucui llactacunaman cacharca.
14Jatun mandac cachacpimi, quillcacunata apaccunaca yallita callpac caballocunapi montashpa, utca rircacuna. Chai mandashcataca mandaccuna tiyana Susa pueblopipish huillarcami.
15Mardoqueoca jatun mandacpac ñaupamantaca jatun mandaccuna churarina azul yurac churanahuan, jahualla churanatapish lino puchcahuan ruhuashca morado churanata churashca, umapica jatun curi coronata churashcami llucshirca. Chashna churashcata ricushpami, Susa pueblopi causaccunaca yallita cushicurca.
16Judá gentecunaca achicman llucshishca shinami yallita cushicushpa, alli nishca carcacuna.
17Cada llactapi, cada pueblopi jatun mandac mandashca chayacpica, Judá gentecunaca yallita cushicushpami jatun micuita ruhuashpa fiestata ruhuarcacuna. Cai llactapi causac shuctac gentecunapish Judá gentecunata manchashpami Judá gentecunapura tucurcacuna.
Who We AreWhat We EelieveWhat We Do
2025 by iamachristian.org,Inc All rights reserved.
