DEUTERONOMIO 18 - Biblia Quichua Cañar 2010

Levita curacuna imata japina cashcamanta

1Leví aillu curacunaca mana israelcunahuan pacta allpata japingachu. Paicunaca Mandac Diosman cushpa rupachishcacunata, Diospaclla chicanyachishcacunatami micunga.

2Paicunapac huauquicunahuan pacta mana allpata japingachu. Mandac Dios nishca shinami, paicuna japina allpa shinaca Mandac Dios canga.

3Curacunaca gentecuna Diosman cushpa rupachishca huagrata, mana cashpaca cari ovejatami japina can: Huasha aichata, quijada aichata, chunzhullitami japina can.

4Punta pucushca granotapish, mushuc vinotapish, aceitetapish, punta rutushca oveja millmatapish cunguichic.

5Mandac Diosmi paicunatapish, paicunapac churicunatapish huiñaita paipac shutipi servichun tucui aillumanta acllarca.

6Israelcuna causana maijan llactapi shuc levita causacushpa, Mandac Dios acllashca pushtuman tucui munaihuan

7paipac huauquicuna shinallatac Mandac Diospac shutipi servingapac shamushpaca, Mandac Diospac ñaupapimi caishuc levitacuna shinallatac servinga.

8Micunatapish caishuccuna shinallatacmi charinga. Chaicunataca taitamanta imata japishca jahuami charinga.

Ama millaita ruhuashpa causachun nishcamanta

9Cancuna Mandac Dios cushca llactaman yaicushpaca, ama chai llactapi causaccuna shina, millaita ruhuashpa causanguichicchu.

10Cancunapuramanta maijanpish churita, ushita yanga diosman cushpa ama rupachichun. Shinallatac adivino canata, brujo canata, quipa ima tucunata huillac canata,

11muspachic canata mana munanachu can. Shinallatac huañushcacunata mañac canata, ayahuan parlac canata, huairata cric canataca mana munanachu can.

12Chai shina millaita ruhuaccunaca Mandac Diospac millanayachinmi. Chaimantami Mandac Diosca chai llactamanta llucchishpa cachanga.

13Mandac Diospac ñaupapica imapipish ama pandaringuichicchu.

14Cancuna japigricuc llactapi causaccunaca adivinaccunata uyaccuna, quipaman ima tucunata huillacta uyaccunami. Mandac Diosca mana chaita ruhuachun munanchu.

Moisés shinallatac huillacta Dios cachasha nishcamanta

15Mandac Diosca cancunapuramantami ñuca shina shuc huillacta acllanga. Paita cazunguichic.

16Mandac Diosca cancuna Horeb urcupi paita mañashpa: “Mandac Dios rimashcata mana uyasha ninchicchu. Cai jatun ninatapish mana ashtahuan ricusha ninchicchu, huañushunmi” nishca shinami ruhuanga. Chaipica tucui gentecunami tandanacushca carca.

17Shina mañacpica, Mandac Diosca: “Chashna mañashpaca allitami nishcanguichic.

18Cancunapac huauquipuramanta can shina ñucamanta huillacta cachashami. Paipac shimipi ñuca rimaicunata churacpimi, paica tucuita huillanga.

19Maijanpish pai ñuca shutipi huillashcata mana cazuctaca ñucami juchanchisha.

20Maijan huillac ñuca shutipi manapish ñuca huillachicpi, mana cashpaca shuctac yanga dioscunapac shutipi huillacpica, chai huillactaca huañuchinguichic” nirca.

21Cambac shungupica: “¿Ima shinatac Mandac Dios mana huillachishcataca yachashunyari?” ninguichicmi.

22Chai huillac Mandac Diospac shutipi huillashcapish mana pactacpi, pai nishca shina mana tucucpica, pai huillashcaca mana Mandac Dios huillachishcachu canga. Chai huillacca pai jatun tucungapacllami huillanga. Chaimanta paitaca ama manchanguichicchu.