SALMOS 106 - Biblia Quichua Cañar 2010

Israelcuna Diosta mana cazushcamanta

1¡Mandac Diosta alabaichicyari!

¡Mandac Diosca allimari,

paita alabaichicyari!

Paica huiñaitami llaquicun.

2¿Pitac Mandac Dios sumaimanacunata

ruhuashcataca huillai pudingayari?

¿Pitac paita tucui alabanacunataca

uyachingayari?

3Maijanpish cashcata ruhuashpa,

allita ruhuashpa causacca

yallita cushicuchun.

4Mandac Dioslla, can acllashcacunaman

allita ruhuashca shinallatac

ñucatapish yuyariyari.

Ñucata quishpichingapac shamuiyari.

5Can acllashcacuna

allita ruhuashcata ricungapac,

cambac gentecuna cushicucpi cushicungapac,

can cushcacunahuan cushicungapacmi

chashnaca quishpichina cangui.

6Ñucanchic ñaupa taitacuna

shinallatacmi juchata ruhuashcanchic.

Mana allita ruhuashpami

juchallishcanchic.

7Egiptopi Dios mancharinacunata

ruhuashcataca ñucanchic ñaupa taitacunaca

mana entendircachu.

Dios yallita llaquic cashcataca

mana yuyarircacunachu.

Chaipac randica Puca Cucha patapica

Diosta mana cazushpami cariyarcacuna.

8Shina cacpipish,

Diosca tucuita ruhuac cashcata

ricuchingapacmi paipac shutita

cuyashpa quishpichirca.

9Puca Cuchataca rimashpallami

chaquichirca.

Chashnami shitashca pambata shina

cucha chaupita pasachirca.

10Paita piñaccunapac maquimantami

quishpichirca.

Huañuchiccunapac maquimantami

quishpichirca.

11Yacu tapacpimi,

paicunata piñaccunaca

shucllapish mana saquirirca.

12Shina ruhuacpimi,

pai rimashcacunata crishpa,

alli nishpa cantarcacuna.

13Ashtahuanpish Dios ruhuashcacunata

utca cungarishpami can yuyaita cuchunca

mana shuyarcacuna.

14Paicunaca shitashca pambapimi,

paicuna munashcata ruhuarcacuna.

Dios imata ruhuacta ricungapacmi,

caita chaita ruhuachun nircacuna.

15Diosca paicuna mañashcatami cararca.

Shina cashpapish huañuchic ungüihuanmi

paicunata llaquichirca.

16Carpacunapi cashpami

Moisés shina casha nishpa piñarircacuna.

Shinallatac Mandac Diospaclla

chicanyachishca Aarontapish

piñashpami rimarcacuna.

17Chaimantami Datantaca

allpa pascarishpa millpurca.

Abiramhuan caccunatapish taparcami.

18Paicuna tandanacushcapi nina japirishpami,

Diosta mana manchaccunataca tucui rupachirca.

19Horeb urcupica curita yacuyachishpa,

ruhuashca becipac ñaupapimi cungurircacuna.

20Chashnami paicunapac

sumac Diosta yuyarinapac randica,

quihuata micuc huagraman

ricchata yuyarircacuna.

21Egiptopi mancharinacunata ruhuac,

quishpichic Diostami cungarircacuna.

22Paica Cam llactapipish mancharinacunata,

Puca Cuchapipish

pi mana ricushcatami ruhuarca.

23Chaimantami Diosca tucuchinata munarca.

Pai acllashca Moisés paipac ñaupapi mañashpa

mana jarcashca cacpica, tucuchinmanmi carca.

Paimi ama tucuchichun

paipac ñaupapi mañashpa jarcarca.

24Ashtahuanpish Dios cushami nishcata

mana crishpami,

sumac llactaman mana rishun nircacuna.

25Chaipac randica

paicunapac carpa huasipimi

huashalla rimashpa,

Mandac Dios rimashcata mana uyarcacuna.

26Chaimantami Mandac Diosca

shitashca pambapi llaquichingapac

maquita alzarca.

27Shinallatac pai acllashcacunapac

huahua huahuacunata

caita chaita shuctac llactaman

cachashpa pingaichingapacmi

chashnaca ruhuarca.

28Paicunaca Baal-peor yanga diosta

caticcunahuan tandanacushpami,

huañushcacunaman rupachishpa

cushca animal aichata micurcacuna.

29Chashna millaita ruhuashpami

Diostaca llaquichircacuna.

Chaimantami Diosca

huañuchic ungüita cachashpa,

tauca gentecunata huañuchirca.

30Chashna huañui caticpimi,

Finees jatarishpa,

millaita ruhuac runataca huañuchirca.

Chaimantami mana ashtahuan huañurcacuna.

31Pai chashna allita ruhuashcaca

huahua huahuacuna yuyaringapacmi

saquirirca.

32Meriba yacu patapipish

Diosta piñachircacunami.

Paicunamantami Moisesca

llaqui tucurca.

33Chaica yallita llaquichicpimi,

Moisesca imatapish rimarircalla.

34Mandac Dios tucuchichun

nishca gentecunatapish

mana tucuchircacunachu.

35Chaipac randica

chai gentecunahuan tandarishpami

mana allita ruhuanata yachacurcacuna.

36Chai gentecunapac dioscunata

servishcamantami llaqui tucurcacuna.

37Paicunapac churicunatapish,

ushicunatapish supaicunaman

cushpami huañuchirca.

38Mana faltayuc runapac,

paicunapac churicunapac,

ushicunapac yahuarta jichashpami

Canaán llacta yanga dioscunaman

huañuchishpa curca.

Chai yahuarhuanmi llactaca mapayarca.

39Chashnami paicunaca

mana allita ruhuashpa mapayarcacuna.

Chai ruhuashcacunahuanmi

huainayashca shina tucurcacuna.

40Chaimantami Mandac Diosca

pai acllashcacunahuan yallita piñarirca.

Paipacllatac charicushpapish

millanayachircami.

41Shuctac llactapi causac gentecunaman

cucpimi chaipi causac gentecunaca

paicunataca cumurichishpa causarcacuna.

42Paicunata piñaccuna llaquichicpimi,

paicunapac maquipi llaquichishca

causarcacuna.

43Chai llaquicunamantaca

tauca cutinmi Diosca quishpichirca.

Shina cacpipish pai cunashcataca

mana cazurcacunachu.

Ashtahuanpish paicunallatac

millaita ruhuashcamantami

llaquinayaita causarcacuna.

44Shina cacpipish, Diosca

paicuna yallita llaquipi

causacushcata ricurcami.

Paicuna caparishpa mañashcatapish

uyarcami.

45Pai yallita llaquic cashpami

paicunahuan ari nishcata yuyarishpa,

paicunamanta mai llaquirca.

46Shinallatac paicunata

prezushpa chariccunamanpish,

llaquina yuyaitami curca.

47¡Ñucanchicta Mandac Dioslla,

ñucanchicta quishpichiyari!

Can jucha illac Diosta jatunyachingapac

tucui llactacunamanta tandachiyari.

Cushicuihuanmi cantaca

jatunyachishun ninchic.

48¡Israelcunata Mandac Diosca

ñaupamanta huiñaicaman

alli nishca cachun!

Shinallatac tucui gentecuna:

«Chashna cachun» nichicyari.

¡Mandac Diosta alabaichicyari!