EZEQUIEL 27 - Biblia Quichua Cañar 2010

Tiro llacta llaqui tucunamanta

1Mandac Dios ñucata rimashpaca:

2«Huañunalla runa, Tiro llacta llaqui tucunamanta llaquipi cantana cantota cantai.

3Can chai mama cucha ladopi tiyac llactacunahuan catushpa, randishpa causac Tiro llactamanta cantashpaca: “Mandac Diosca:

Tiro llactalla, canca:

‘Tucuimanta yalli sumacmi cani’

nishpami yuyangui.

4Canca tucui mama cuchatami

mandangui.

Canta callarichiccunaca

shuc sumac barcota apac pañota

shinatami ruhuarca.

5Senir urcumanta ciprés

tablahuanmi ruhuarca.

Pilarcunataca Líbano urcumanta

cedro caspihuanmi ruhuarca.

6Barcota purichinacunataca

Basán llactamanta encina

caspimantami ruhuarca.

Catataca Quitim llactamanta

pino caspihuan,

marfilhuanmi ruhuarca.

7Barcota apac pañoca Egiptopi

bordashca sumac pañomi carca.

Carpaca mama cucha ladopi cac

Elisa llactamanta azul,

yana puca telami carca.

8Barcota purichiccunaca Sidón,

Arvad llactacunamantami carca.

Tiro llactalla, chai purichiccunaca

allita yachac runacunami carca.

9Barco dañarishcata allichiccunaca

Gebalmanta alli yachac,

yuyac runacunami carca.

Barcocunapish, barcota

purichiccunapish randingapac,

catungapacmi shamurca.

10Cambac macanacunata

alli yachac soldadocunaca Persas,

Lidia llactacunamantami carca.

Escudocunatapish, cascocunatapish

pircapimi huarcurca.

Chaicunami cantaca sumacta

allichirca.

11Arvad llacta soldadocunami pirca jahuapica muyundita shayacurca. Gamad llacta runacunami torre jahuapica shayacurca. Paicunapac escudocunataca muyundi pircapimi huarcurca. Chaicunahuanmi sumaimana carcangui.

12Can tucuilayata charicpimi, Tarsispi causaccunaca cullquihuan, fierrohuan, estañohuan, plomohuan plazacunapi randingapac shamurca.

13Grecia, Tubal, Mesec llacta gentecunahuanmi randishpa, catushpa causarcangui. Paicunaca gentecunahuan, broncemanta ruhuashcacunahuanmi randic carca.

14Bet-togarma llacta gentecunaca yanga caballocunahuan, macanacuna caballocunahuan, mulacunahuanmi randic carca.

15Rodas llactamanta gentecunapish, mama cucha ladopi causaccunapish canhuanmi catushpa, randishpa causac carca. Paicunaca marfil quirucunata, ébano caspicunatami canman apamuc carca.

16Canca yallitami charircangui. Chaimantami Edom llacta gentecunapish canhuan randishpa, catushpa causac carca. Paicunaca perlascunata, yana puca telacunata, bordashca churanacunata, tucuimanta yalli alli lino telacunata, coralta, rubíes rumicunata apashpami, randingapac shamuc carca.

17Judá llacta gentecunapish, israelcunapish canhuanmi catushpa, randishpa causac carca. Paicunaca plazacunapica trigohuan, mirrahuan, mishquihuan, aceitehuan, resinahuanmi randic carca.

18Can tucuilayata charishcamantami Damasco gentecunapish canhuan randishpa, catushpa causac carca. Paicunaca Helbón llactamanta vinohuan, yurac millmahuanmi randic carca.

19Dan llacta gentecunapish, Grecia gentecunapish Uzal llactamantami cambac charishcacunahuan cambiangapac sumacta allichishca fierrohuan, canelahuan, mishqui ashnacuc huiruhuan shamuc carca.

20Dedán llacta gentecunapish caballo parejocunahuanmi randic carca.

21Arabia gentecunapish, Cedar llactata mandaccunapish, malta ovejacunahuan, carnero ovejacunahuan, cari chivocunahuanmi randic carca.

22Sabá llactatapish, Raama llactapish, canhuanmi randishpa, catushpa causac carca. Paicunaca tucuimanta yalli valishca mishquilla ashnacuc-huan, tucuilaya alaja rumicunahuan, curihuanmi randic carca.

23Harán, Cane, Edén, Sabá llactamanta randiccunapish, Asiria, Quilmad llacta gentecunapish, canhuanmi randishpa, catushpa causac carca.

24Paicunaca azul churanacunahuan, bordashca churanacunahuan, yana puca sumac churanacunahuan, tucuilaya pañocunahuan, trenzashca sumac cordoncunahuanmi randic carca.

25Tarsismanta jatun barcocunami randishcacunataca apac carca.

Canca mama cucha chaupipi

achca cargacuna jundachishca

barco shinami carcangui.

26Barcota purichiccunami cantaca

jatun yacu chaupiman aparca.

Inti llucshina ladomanta

huaira shamushpami, mama cucha

chaupipi cantaca paquirca.

27Llaquichina punzhapica,

cambac charishcapish,

catunacunapish,

imalla tiyaccunapish,

barcota purichiccunapish,

barco dañaricpi allichiccunapish,

catunata cuidaccunapish,

soldadocunapish,

tucui cambac gentecunapish,

mama cucha chaupipimi tucuringa.

28Barcopi caccuna yallita

caparicpimi, mama cucha muyundipi

causaccunapish,

29barcota purichiccunapish,

chucchushpa, barcomanta uricunga.

Mama cuchapi jatun barcota

purichiccunapish,

caspihuan purichiccunapish

allpapimi saquiringa.

30Canmantami llaquinayaita

caparishpa huacashca uyaringa.

Umapi allpata churashpami,

uchupapi singunga.

31Canmantami acchata pitirishpa,

sharpa churanata churaringa.

Canmantaca shungupi

llaquirishpami, yallita huacanga.

32Canmanta llaquipi cantana

cantota cantashpaca:

‘Mama cucha chaupipi cac

Tiro llacta shinaca,

¿pitac tiyarcayari?’ ningami.

33Cambac jatun barcocunapi

apashca catunacunaca

achca gentecunatami cushichirca.

Jatun mandaccunapish,

cambac charishcahuan,

can catushcacunahuanmi

yallita charicyarca.

34Cunanca mama cucha chaupipimi

cambac catunacunapish,

tucui cambac gentecunapish

canhuan pacta yacupi tucurishca.

35Chashna llaqui tucushcata

ricushpami, mama cucha ladopi cac

llactacunapi causaccunapish,

jatun mandaccunapish

mancharishpa chucchunga.

Paicunapac ñahuicunapish,

cera tucushpami saquirin.

36Shuctac llacta catuccunapish

can llaqui tucushcata ricushpaca

silbangacunami.

Canca jatun mancharinami tucungui,

huiñaipacmi chingaringui”

ninmi ningui» nirca.