1Amonpac churi jatun mandac Josías Judá llactata mandacucpimi, Mandac Diosca Cusipac churi Sofoniasman huillarca. Cusica Gedaliaspac churimi carca. Gedaliasca Amariaspac churimi carca. Amariasca Ezequiaspac churimi carca.
Mandac Dios llaquichina punzhamanta2Mandac Diosca:
«¡Tucui cai pachapi
tiyaccunatami tucuchisha!
3Gentecunatapish, animalcunatapish,
volac animalcunatapish,
mama cuchapi causac
challuacunatapish,
ñucata mana manchaccunatapish,
cai pachapi causac gentecunatapish,
tucuitami chingachisha.
4Judá llactapi causaccunatapish,
Jerusalenpi causaccunatapish
llaquichishami.
Baal diosmanta puchushcacunatapish,
chai diosta servic curacunapac
shuticunatapish chingachishami.
5Huasi jahuacunapi cungurishpa,
lucerocunata mañaccunatapish,
ñucata adorashpa ñuca shutipi,
Milcom diospac shutipi,
ari niccunatapish tucuchishami.
6Ñucamanta anchuriccunatapish,
ñucata mana mashcaccunatapish,
ñucaman mana tapuccunatapish
tucuchishami» ninmi.
7¡Mandac Diospac ñaupapi
upalla caichic!
¡Mandac Dios llaquichina
punzhami pactamucun!
Mandac Diosca animalta
huañuchic shina
ruhuangapacmi allichishca.
Chaipacmi paicunata
piñachiccunata cayashca.
8Mandac Diosca:
«Animalta shina huañuchina
punzhapica mandaccunata,
churicunatapish, shuctac llacta
churanata churarishca
gentecunatapish llaquichishami.
9Chai punzhallatacmi
pungu jahuata saltashpa
pasaccunatapish, paicunapac
amocunapac huasicunapi
shuhuashpa jundachiccunatapish,
umaccunatapish llaquichisha» ninmi.
10Mandac Diosca:
«Chai punzhapica challua
Pungumantami mañashpa,
caparishca uyaringa.
Caishuc pungumantapish
llaquinayaita huacashcami
uyaringa.
Lomacunapipish yallita
mancharishpa caparishcami
uyaringa.
11Mactes pambapi causaccunalla,
caparishpa huacaichicyari.
Catuccunapish, randiccunapish,
cullquita cambiaccunapish
tucuchishcami canga.
12Jerusalenpi causaccuna
imata ruhuashcataca
luzta japichishpami alli ricusha.
Mana cuyuric sanguyashca
vino shina, cushilla causac
runacunataca llaquichishami.
Paicunapac shungupica:
“Mandac Diosca ima allitapish,
mana allitapish
mana ruhuangachu” nincunami.
13Chaimantami paicunapac
charishcacunatapish shuhuashpa,
huasicunatapish
llaquinayaitami tucuchinga.
Huasicunata shayachishpapish,
mana causangacunachu.
Uvasta tarpushpapish,
vinota mana ubiangacunachu» ninmi.
14Mandac Dios llaquichina
punzhami ña shamucun.
Chai punzhaca utcami chayamucun.
Mandac Dios llaquichicui punzhaca
jatun llaqui huacaimi canga.
Chai punzhaca yalli
sinchi runapish
llaquinayaitami caparinga.
15Dios piñarishpa
tucuchi punzhaca llaqui,
huacai, nanai, caparinacui,
punzhami canga.
Chai punzhaca pura tuta,
puyuhuan tapashca amsami canga.
16Chai punzhaca trompetapi
tocashpami llacta muyundi
jatun pirca jahuamantapish,
jatun torre jahuamantapish
caparinga.
17Mandac Diosca:
«Runacuna juchata ruhuashpa
ñucata piñachishcamatami
yallita llaquichisha.
Paicunaca ñahui mana ricuc shinami,
musparishpa puringa.
Paicunapac yahuarpish
polvo shinami talliringa,
aichapish mapa shinami
urmanga» ninmi.
18Mandac Dios piñarishpa
llaquichi punzhapica
paicunapac cullquipish,
curipish mana quishpichingachu.
Tucui cai pachataca
nina japiric shinami tucuchinga.
Cai pachapi causaccunataca
cungaillami tucuchinga.
Who We AreWhat We EelieveWhat We Do
2025 by iamachristian.org,Inc All rights reserved.
