APOCALIPSIS 12 - Biblia Quichua Cañar 2010

Huarmimanta shinallatac dragón animalmanta

1Jahua cielopica shuc jatun mancharinami ricurirca. Chaipica shuc huarmimi intihuan pillushca shina churarishca, paipac chaqui ucupica quilla apashca ricurirca. Cutin umapica chunga ishcai lucerocunayuc corona apashcami carca.

2Chai huarmica huicsayucmi carca. Chashna cashpami sajuarina punzha chayacpica, nanaihuan llaquita apashpa caparicurca.

3Chai quipaca cutinllatacmi cielopica shuc jatun mancharina ricurirca. Shuc jatun puca dragón animalmi canchis umayuc, chunga gachuyuc, umacunapi corona apashca ricurirca.

4Chupahuanca quimsapi chaupishcamanta shuc parte lucerocunatami jahua cielomanta cai pachaman aisashpa shitarca. Chai dragonca huarmi ña sajuarinca huahuata micungapacmi, chai huarmipac ñaupapi shayarirca.

5Chai huarmica tucui cai pachapi causaccunata, fierro varahuan mandagricuc shuc cari huahuatami sajuarirca. Ashtahuanpish chai huahuaca mandashpa tiyarinapi tiyacuc Diospac ñaupamanmi apashca carca.

6Chai huarmica shitashca pamba, Dios allichishcapi huaranga ishcai pasac sucta chunga punzhacaman Dios carashcata micushpa cangapacmi miticushpa rirca.

7Chai quipaca shuc macanacuimi jahua pachapi tiyarca. Chaipica mandac ángel Miguelmi paipac angelcunata tandachishpa dragonhuan macanacurca. Shinallatac dragonpish paipac angelcunata tandachishpami macanacurca.

8Shina cashpapish paicunaca mana misharcachu, jahua pachapipish ña mana causanata charircachu.

9Chaimantami jatun dragontaca jahua pachamanta llucchishpa shitarcacuna. Chai dragonmi ñaupa rucu culebra, shinallatac diablo nishcapish, Satanás nishcapish can. Paica tucui cai pachapi causaccunata llullashpa, mana allita ruhuachicmi. Chaimantami paipac angelcunandi cai pachaman llucchishpa shitarcacuna.

10Shina tucushca quipami jahua pachamanta sinchita caparishpaca:

«Cunanmi quishpirinapish,

Diospac imata ruhuanapish,

Dios mandanapish,

pai cachashca Quishpichic Cristo

mandanapish chayamushca.

Tutapish, punzhapish

Diospac ñaupapi

ñucanchic huauquicunata

juchanchishpa llaquichictaca

ñami caimanta llucchishpa shitashca.

11Paicunaca Pactalla Oveja huañushpa

yahuarta jichashcamanta,

alli huillaita huillashcamantami

chai llaquichictaca mishashca.

Huañuna cacpipish,

mana mancharcacunachu.

12¡Jahua pachapi causaccuna

cushicuichic!

Ashtahuanpish allpa pachapi, shinallatac

mama cucha yacupi causaccunaca,

¡aij, imachari tucunguichic!

Ashalla punzhacuna

tiyana cashcata yachashpami,

diabloca yallita piñarishpa

jahua pachamanta

cancunapacman urai rirca» nictami uyarcani.

13Cai pachaman shitashca cashcata yachac chayashpami, dragonca chai cari huahuata charic huarmita huañuchisha nishpa cati callarirca.

14Ashtahuanpish chai huarmimanca culebramanta caruyashpa, shitashca pambapi causagrichunmi, aguilapac ishcai alasta volashpa richun curcacuna. Chaipimi quimsa huata chaupita Dios cushcata micushpa causacurca.

15Chai culebraca callpacuc yacu tucushpa chai huarmita apachunmi, paipac shimimanta yacuta shitarca.

16Ashtahuanpish huarmita ama yacu apachunmi, allpa pascarishpa chai culebra shitashca yacutaca ucuyachirca.

17Chashna tucucpimi dragonca chai huarmihuan yallita piñarishpa, huarmipac huahua huahuacunahuan macanacungapac rirca. Chaicunaca Dios mandashcacunata pactachiccuna, shinallatac Jesusmanta huillashcata uyashpa alli caticcunami can. Chai dragonca mama cucha yacu patapimi shayarirca.