ESDRAS 4 - Biblia Quichua Cañar 2010

Diospac huasita shayachicucpi, piñaccuna jarcashcamanta

1Prezumanta cutimushca israelcuna Mandac Diospac huasita shayachicushcata Judapac, Benjaminpac aillucunata piñaccuna yachac chayashpami,

2Zorobabelpacman, ñaupa taitacunapac huasi ucupuracunata mandaccunapacman shamushpaca:

—Cai huasita ruhuanataca ñucanchicpish ayudashun ninchicmi. Ñucanchicpish cancuna shinallatacmi cancunapac Diosta mashcanchic. Asiria llactata jatun mandac Esar-hadón ñucanchicta cai llactaman apamushca punzhamanta pachami cancuna shinallatac Diosman animalcunata cushpa rupachinchic— nirca.

3Shina nicpimi, Zorobabelpish, Jesuapish, ñaupa taitacunapac huasi ucupura israelcunata mandaccunapish rimashpaca:

—Ñucanchic Diospac huasitaca mana cancunahuan shayachisha ninchicchu. Ashtahuanpish Persia llactata jatun mandac Ciro mandashca shinami, israelcunata Mandac Diospac huasitaca ñucanchiclla shayachina canchic— nirca.

4Shina nicpimi, chai llacta cuchullapi causaccunaca Diospac huasita ama ruhuachun, Judá llactapi causaccunataca imacunata nishpa manchachirca.

5Chashna ruhuashca jahuapish huasita tucuchingapac yuyarishcata saquichunmi yuyaita cushpa ayudaccunaman pacalla cullquita curca. Chashnami Persia llactata jatun mandac Ciro mandacui tucui huatacunapi Persia llactata jatun mandac Darío mandai callaringacaman chashna ruhuarca.

6Jatun mandac Asuero mandai callari huatapimi Judá llactapi causaccunata, Jerusalenpi causaccunata juchanchishpa quillcashpa cacharcacuna.

7Artajerjes mandacui punzhacunapipish, Bislampish, Mitridatespish, Tabeelpish, paicunapac shuctac ricsishcacunapish shuc quillcata Persia llactata jatun mandac Artajerjesman cacharcacunami. Chai quillcashcaca arameo rimaipimi carca.

8Mandac Rehumpish, quillcac Simsaipish Jerusalenpi causaccunata juchanchishpami jatun mandac Artajerjesman shuc quillcata cacharca.

9Chai punzhapica mandac Rehumhuan, quillcac Simsaihuan, paicunapac maijan huauqui juezcunahuan, caishuc mandaccunahuan, quipa mandaccunahuanmi quillcarca. Shinallatac Persia llactamanta, Erec pueblomanta, Babilonia llactamanta, Susa pueblomanta shamushca elamita gentecunahuanpish quillcarcami.

10Cai quillcataca mai alli nishca jatun mandac Asnapar prezu aparishca Samaria pueblopi causac gentecunapish, shuctac lado jatun yacu chimba ladopi tiyac llactacunapi causaccunapish quillcarcami.

11Cai quillcapica:

«Jatun mandac Artajerjes, jatun yacu chimba ladopi causaccunami

12can jatun mandac yachachun caita huillanchic: Judá llactapi causaccuna cambac llactamanta huichai shamushpa, Jerusalenman chayashpami mana cazuc, mana alli gentecuna causashca pueblocunata cutin allichicun. Cai pueblo muyundi pircacunatapish, allichishpami callari rumicunatapish churacuncuna.

13Shinallatac can jatun mandacmanca caitapish huillanchicmi: Cai pueblota cutin allichishpa, muyundi pircacunatapish cutin shayachishpaca, tributotapish, impuestotapish, ima shucta cuna cashcatapish mana ashtahuan cungacunachu. Shina mana cucpica, jatun mandacpac huasipica cullquica illai callaringami.

14Ñucanchicca jatun mandacpac huasimantami micushpa causacunchic. Chaimantami can jatun mandacta yangapi churachunca mana munanchic. Chashna cashcamantami can jatun mandac yachachun caita cachanchic.

15Shinallatac ñaupa taitacuna ima ruhuashcata quillcashcapi mashcachunpish huillanchic. Chai quillcashcapi mashcashpami, chai pueblopi causaccuna mana cazushcatapish, jatun mandaccunamantapish yachangui. Shinallatac llactacunatapish llaquichishpa causashcatapish, chai pueblopi causaccuna ñaupa huatacunamanta pacha mana cazuccuna cashcatapish, chaimanta chai pueblo tucurishcatapish yachangui.

16Jatun mandaclla, cai pueblota cutin allichicpi, muyundi pircata cutin shayachicpica, jatun yacu lado llactacunaca mana ashtahuan cambacchu canga» nishpami quillcashca carca.

17Chaimantami jatun mandac quillcashpaca:

«Mandac Rehumtapish, quillcac Simsaitapish, Samaria llactapi causac caishuc cancunapac huauquicunatapish, jatun yacu chimba ladopi causaccunatapish sumac causaita charichun ninimi.

18Cancuna cachashca quillcaca ñami ñuca ñaupapi rezashca carca.

19Shinallatac ñuca mandacpimi, mashcashpa chai pueblopi causaccunaca ñaupa huatacunamanta pacha jatun mandacta mana cazuc cashcata, tandanacushpa jatun mandacpac contra shayarishcata,

20Jerusalenpi sinchi jatun mandac tiyashcata, chai mandac jatun yacu chimba ladopi tiyac tucui llactacunata manchachic cashcata tarishca. Chai llactapi causaccunaca tributotapish, impuestotapish, imamanta cuna cashcatapish cushpa causashcatami tarishca.

21Cunanca, ñuca quipata yuyarishpa mandangacaman chai pueblota allichinata shinallatac chai runacuna imata ruhuanata saquichun mandaichic.

22Chaita jarcanataca pacta cungaringuichicman. ¿Ima nishpatac jatun mandaccunataca llaquichishpa catingacunayari?» nishpami quillcashpa cacharca.

23Jatun mandac Artajerjes cachashca quillcataca Rehumpac, quillcac Simsaipac, paicunapac huauquicunapac ñaupapimi rezarca. Chaita uyashpami, paicunaca Jerusalenpi causac Judá llactamanta runacuna huasichicushcaman rishpa, sinchita llaquichishpa jarcarca.

24Chaimantami Diospac huasita Jerusalenpi shayachinaca jarcarirca. Persia llactata jatun mandac Darío ishcai huatata mandangacamanmi chaipi saquirirca.