1Cunanca cancunapurapi cac tandanacushca criccunata pushaccunatami, ñucapish paicuna shinallatac pushac cashcamanta cunashpa rimasha nini. Ñucaca Cristo ima shina llaquita apashcata ricushpa, huillacmi cani. Shuc punzha Cristo sumaimana ricuricpica, ñucapish chaipimi paihuan pacta casha.
2Dios cancunaman mingashca criccunataca ovejacunata michic shina, quiquin munaihuan alli ricuraichic. Pi ruhuai nishcallamanta, cullquita japingaraicullapish ama ruhuaichicchu, ashtahuanpish Dios munashca shina, mana quillanayachishpa chaparaichic.
3Cancunaman mingashca criccunataca, ama cancunapac gentecunata shina mandashpa charichicchu, ashtahuanpish alli ruhuashcata ricushpa catichunca, cancunaracmi allita ruhuana canguichic.
4Chashna cashpami michiccunata Jatun Michic shamucpica, jaicapi mana chingaric, sumaimana coronata cancunaca japinguichic.
Mosocunata rimashcamanta5Chai shinallatac quipa huiñaicunapish, pushaccuna ima nishcata cazuichic. Mana jatun tucushpami tucuillatac caishuc chaishuc-huan cazunacuna canguichic. Diosca:
«Jatun tucushcacunataca
piñanimi.
Mana jatun tucushcacunataca
cuyanimi» ninmi.
6Pai jatunyachina punzha cancunata jatunyachichunca, ama jatun tucushpa, imatapish ruhuaclla Diospac maquipi causaichic.
7Ima llaquicuna japicpipish, Diospac maquipi churaichic. Paica cancunata cuidacunmi.
8Cancunata mana ricunayachic diabloca león yarcaihuan micusha nishpa puricuc shinami, mashcashpa puricun. Shina cashcamanta riccharishca shina, alli yuyaihuan causaichic.
9Cai pachapica tucui criccunami cancuna shinallatac llaquita apacuncuna. Chaita yachashpami, Jesusta alli crishpa, diablotaca mishaichic.
10Ashtahuanpish asha punzhacaman llaquicunata cancuna apashca quipaca, Diosllatacmi pi mana juchanchipacta, alli sinchiyachishpa, alli caticta, pi mana cuyuchipacta ruhuanga. Paillatacmi ñucanchictaca Jesucristohuan shuc shinalla tucushcamantaca, paipac jatun cuyaimanta huiñaita sumacyachishca cachun acllarca.
11Sumaimana achic nicucpish, tucuita mandanapish, huiñai huiñaita paipaclla cachun. Chashna cachun.
Tucuchingapac “allilla cashca cachun” nishcamanta12Huauqui Silvanohuan tucushpami, ñucaca cai asha quillcata quillcashpa cachani. Paitaca allita pactachic cric cashcatami yuyani. Caita quillcashpaca, cancuna allicunata chasquishcaca Dios mai cuyashpa cushcatatac yachachunmi, cunashpa cachani. Chai cuyaimantaca amatac anchuringuichicchu.
13Babilonia pueblopi tandanacushca criccunataca, cancunata shinallatacmi Diosca acllarca. Paicunapish, shinallatac ñuca huahua shina Marcospish “allilla cashca cachun” nishpami cachancuna.
14Caishuc chaishuc cuyaihuan muchashpa, “allilla cashca cachun” ninacuichic. Apunchic Jesus-huan shuc shinalla tucushcacunaca, tucui mashna sumac causaita charishca canguichicman.
Who We AreWhat We EelieveWhat We Do
2025 by iamachristian.org,Inc All rights reserved.
