1Mama cucha patapi
causaccuna uyaichic.
Tucui mashna sinchiyashpa,
ñucapacman shamuichic.
Ñucapacman cuchuyashpa rimaichic.
Taripangapac caiman tandanacuichic.
2¿Pitac jatun mandactaca
ricchachishpa, inti llucshina
ladomanta pushamurca?
Paimanmi tucui llactacunata
mandachun cunga.
Chashna cucpimi,
tucui jatun mandaccunata mandanga.
Espadahuanmi ñuto
allpata shina ruhuanga.
Arcohuanca chaquishca
pangata shinami maita shitanga.
3Pai catishpaca allpapi
chaquita mana churac shinami
yallita callpan.
4¿Pitac chashna tiyachun,
chashna catichun ruhuan?
Callarimanta cai pacha
ima shina canataca,
¿pitac yachan?
Mandac Dios ñucallatacmi
callaripish, tucuripish cani.
5Mama cucha patapi causaccunapish,
tucui cai pacha causaccunapish
chaita ricushpami mancharishpa,
tandanacushpa shamurca.
6Tucui paicunapura
ayudanacushpaca:
«¡Sinchicuichic!» nircami.
7Caspita llacllacca cullquimanta
imatapish ruhuactami cushichin.
Martillohuan huactashpa,
llambucllata ruhuacca
yunquepi fierrocunata huactactami:
«¡Cai fierroca
allimi llucshishca!»
nishpa cushichin.
Chai quipaca clavocunahuan
clavashpami yanga dioscunata
alli shayachin.
8Israelcunalla, cancunaca ñucata
serviccunami canguichic.
Jacobopac huahua huahuacunalla,
ñuca acllashcacunami canguichic.
Cancunaca ñucahuan apanacuc
Abrahampac huahua huahuacunami
canguichic.
9Ñucaca cancunataca
cai pacha tucurimantapish,
mai caru llactamantapish
cayashpami:
«Ñucata serviccunami canguichic.
Cancunata acllashpaca,
mana saquircanichu.
10Ñucaca cancunahuanmi cani.
Chaimanta ama manchaichicchu.
Ñucaca cancunapac Diosmi cani.
Chaimanta ama manchaichicchu.
Ñucaca cashcata ruhuashpami
cancunapac tucui causaipi
ayudasha.
11Riquichic, tucui cancunata
piñaccunami pingaihuan musparinga.
Cancunata piñashpa rimariccunaca
mana tiyashca shinami tucuringa.
12Cancunata piñashpa rimaccunataca
mashcashpapish
mana taringuichicchu.
Cancunahuan macanacuccunaca
mana tiyashca shinami canga.
13Mandac Dios ñucami,
cancunapac alli lado maquimanta
pushashpaca: “Ama manchaichicchu,
ñucami cancunataca ayudasha” nini.
14Israelcunapac jucha illac
quishpichic Mandac Diosmi
caitapish nini:
Curucuna shina ashalla Jacobopac
huahua huahuacunapish,
curucuna shina ashalla
israelcunapish ama manchaichicchu.
Ñucaca cancunata ayudac Diosmi cani.
15Riquichic, cancunataca
trillana mushuc fierrota
shinami churani.
Quirusapa mushuc
lastrillo shinatami ruhuani.
Urcucunataca trillac shinami
polvonguichic.
Lomacunataca cupata
trillac shinami ñutuchinguichic.
16Cancuna huairachicpica,
huairami apanga.
Acapana huairami caita chaita
apanga.
Ashtahuanpish cancunaca
Mandac Dios-huanmi cushicunguichic.
Israelcunapac jucha illac
Dios-huanmi yallita cushicunguichic.
17Huacchacunapish,
imata mana chariccunapish
yacuta mashcashpaca mana tarinchu.
Shinami yacunayaihuan
paicunapac calluca chaquishca.
Ñucami paicuna mañashcata uyasha.
Israelcunapac Dios ñucaca,
manatac saquishachu.
18Urcucunamantami
jatun yacucunata llucchisha.
Pugru pambacunapimi
yacu junducunata ruhuasha.
Shitashca pambacunataca
yacu cuchacunata,
chaquishca pambacunataca
yacucuna llucshicuctami ruhuasha.
19Shitashca pambacunapica cedro,
acacia, arrayán,
olivos yuracunatami huiñachisha.
Chushac pambacunapica ciprés,
pino, boje yuracunatami huiñachisha.
20Israelcunapac
jucha illac Mandac Dios ñuca
maquihuan ruhuacta tucui mashna
ricushpa entendichunmi
chashnaca ruhuasha» ninmi.
Ruhuashcalla dioscunataMandac Dios rimashcamanta21Jacobopac huahuacunata
Mandac Diosca:
«Ruhuashcalla dioscuna
imatapish ruhuashpa
ricuchichicyari.
Cancuna imata ricuchishcatapish
huillaichicyari.
22Quipa punzha ima tucunata
huillangapac cuchuyaichicyari.
Ñucanchic tucui shunguhuan
uyangapac callari punzhacunapi
ima tucushcata,
achca huatacuna pasashca
ima tucushcata huillaichicyari.
Shamuc punzhacuna ima tucunata
yachangapac huillaichicyari.
23Cancuna dioscuna cashcata
yachangapac shamuc punzhacuna
ima tucunata huillaichicyari.
Mancharishpa parlanacungapac
ima allitapish,
mana allitapish ruhuashpa
ricuchichicyari.
24Riquichic, cancunaca
imapish mana canguichicchu.
Cancuna maipi imata ruhuashcapish
mana ricurinchu.
Cancunata acllashpa charictaca
millanayanmi.
25Jahua lado llactamantami
shuc runata pushamusha.
Inti llucshina lado llactamanta
shamushpami, ñuca shutipi mañanga.
Paica jatun mandaccunataca
turuta saruc shinami mandanga.
Mangata ruhuac runa turuta
saruc shinami sarunga» ninimi.
26Chaita yachachunca,
¿pitac utcaman ña huillarcayari?
Chaita ricushpa:
«Chashna tucunatacmi
carca» nichunca,
¿pitac manarac tucucpi,
ña huillarcayari?
Pipish imata mana huillashcachu.
Pipish ima mana rimashcachu.
Cancunapac shimihuan nishcataca
pipish mana uyashcachu.
27Ñucami Sionpi causaccunamanca
punzhanta caicunata huillacurcani.
Ñucallatacmi cai Jerusalenpi
causaccunaman cushicunata
huillachun shuc huillacta cachasha.
28Ñuca ricucpica,
pipish mana ricurircachu.
Ñucaca tucui chaicunatami
tapurcani.
Chaita tapucpi, ima yuyaita
cucca pipish mana tiyarcachu.
Paicunata tapucpica,
shuc rimaillatapish mana
rimarcachu.
29Riquichic, tucui paicunaca
yangallami.
Paicuna maipi imata
ruhuashcapish mana ricurinchu.
Imatapish yacuyachishpa
ruhuashca dioscunaca
huaira shina yangallami.
Who We AreWhat We EelieveWhat We Do
2025 by iamachristian.org,Inc All rights reserved.
