2 TIMOTEO 4 - Biblia Quichua Cañar 2010

Diospac shimita huillanamanta

1Canmanca Diospac ñaupapi, shinallatac huañushcacunatapish, causaccunatapish Jatun Mandac, taripangapac shamuc Apunchic Jesucristopac ñaupapimi caitaca mingani.

2Alli huillaitaca uyasha nicpi, mana uyasha nicpimi huillacuilla. Mana piñarishpa, rimacuilla, alli yachachicuilla, cunacuilla.

3Cashcata nic huillashcata mana uyashun nina punzhacuna chayamungami. Gentecunaca paicuna munashca shinata yachachichunmi, shuctac shuctac yachachiccunata mashcanga.

4Cashcata nic huillashcata mana uyashun nishpami, imapish yanga parlocunallata uyangacuna.

5Chashna cacpipish canca, tucuipi alli yuyaihuan cangui, quishpirinamanta alli huillaitaca huillacunguilla, llaquitapish apanguilla, cambac ruhuana cashcata pactachinguilla.

6Ñucaca ñami Diosman cushpa huañuchina shinalla cani. Ñuca caimanta rina punzhaca ñami chayamucun.

7Ñucaca Jesusta crinata mana saquishpami, macanacuipi alli macanacushpa mishac shina chai chayana cashcaman ña chayashcani.

8Cunan punzhamanta pachami cashcata ricuchic, ñucaman cuna cashca coronata Diosca charicun. Chaitaca cashcata ruhuashpa taripac Apunchic Jesucristomi, taripana punzhapi, mana ñucallaman ashtahuanpish tucui pai cutimuna punzhata cuyaihuan shuyaccunaman cunga.

Timoteo imata ruhuachun Pablo yachachishcamanta

9Ñucata ricungapac ima shinapish utca shamuiyari.

10Demas runaca cai pachapi imalla tiyaccunapi shunguta churashpami, ñucata shitashpa Tesalónica puebloman rirca. Shinallatac Crescenteca Galacia llactaman, cutin Titoca Dalmacia llactamanmi rirca.

11Lucasllami ñucahuan can. Chaimanta Marcosta mashcashpa pushamui. Paica ima ruhuanapipish allitac ayudacmi.

12Tiquicotaca Efeso pueblomanmi cacharcani.

13Can shamushpaca, Troas pueblopi causac Carpopac huasipi ñuca saquimushca churanatapish, librocunatapish, ashtahuancarin quillcana caracunata apamungui.

14Fierrocunata allichishpa causac Alejandroca ñucata mana allita ruhuashpami llaquichirca. Pai chashna ruhuashcamantaca, Diosmi paitapish llaquichinga.

15Paica ñucanchic huillashcata mana cazushpami, ñucanchic-huanca yallita piñarirca. Chaimanta canpish paimanta cuidaringui ninimi.

16Juezcunapac ñaupapi punta ñuca rimaricucpica, pi ñucahuanca mana carcachu, tucuimi shitashpa rircacuna. Chashna ruhuashcataca ama yuyarishca canman ninimi.

17Chashna cacpipish Apunchic Jesusca mana ñucallata saquishpami sinchiyachirca. Chaimantami quishpirinamanta alli huillaita huillashpaca, tucui mana israelcunapish uyachun huillarcani. Chashnami Apunchic Jesusca ñucataca, piña leonpac shimimanta shina anchuchirca.

18Chashnallatacmi tucui mana allicunamanta anchuchishpa, pai mandacuc jahua pachaman chayangacaman ñucataca huacaichinga. ¡Paitaca tucui mashna huiñai huiñaita “sumaimanami cangui” nishunchic! Chashna cachun.

Tucuchingapac Pablo “allilla cashca cachun” nishcamanta

19Onesiforotapish, tucui paipac huasi ucupi causaccunatapish, shinallatac Priscilatapish, Aquilatapish “allilla cashca cachun” ninimi.

20Erastoca Corinto pueblopimi saquirirca. Trofimotaca ungushcatami Mileto pueblopi saquimurcani.

21Tamya punzhacuna manarac chayamucpi, ima shinapish shamui. Eubulopish, Pudentepish, Linopish, Claudiapish shinallatac tucui criccunami “allilla cashca cachun” nishpa cachancuna.

22Apunchic Jesucristo canhuan cachun. Shinallatac Diosca paipac sumaimana cuyaita tucui cancunaman cushca cachun ninimi.