JOSUÉ 11 - Biblia Quichua Cañar 2010

Josué jatun mandac Jabinta atishcamanta

1Chaita uyashpami Hazor pueblota mandac Jabinca Madón pueblota mandac Jobabmanpish, Simrón pueblota, Acsaf pueblota jatun mandaccunamanpish huillachun cacharca.

2Shinallatac jahua lado urcupi tiyac pueblocunata mandaccunamanpish, Cineret mama cucha ura ladopi tiyac pueblocunata mandaccunamanpish, Sefela llacta mandaccunamanpish, inti llucshina ladopi tiyac Nafot-dor pueblota mandaccunamanpish huillachun cacharca.

3Chashnallatac inti tigrana ladopi, inti llucshina ladopi causac cananeocunamanpish, urcupi causac amorreocunamanpish, heteocunamanpish, ferezeocunamanpish, urcucunapi causac jebuseocunamanpish, Mizpa llacta Hermón urcu chaquipi causac heveocunamanpishmi huillachun cacharca.

4Chashna huillacpimi, paicunapish tucui macanacuc runacunandi llucshirca. Paicunaca mama cucha patapi tiyac tiyu shina achca gentecunami achca caballocunahuan, achca carretacunahuan llucshirca.

5Tucui chai jatun mandaccunami tandanacushpa israelcunahuan macanacungapac Merom yacu ladopi carpa huasicunata shayachishpa tiyarirca.

6Shina cacpimi, Mandac Diosca Josuetaca: «Paicunataca ama manchaichu, caya cai horasllatami paicunataca israelcunapac ñaupapi churasha. Canca caballocunapac chaquicunata paquishpa, carretacunatapish rupachingui» nirca.

7Josueca tucui paipac macanacuc runacunahuan rishpami cungailla Merom yacu ladopi japirca.

8Israelcunapac maquipi Mandac Dios churacpimi, paicunata atishpa, Sidón jatun pueblocaman, Misrefot-maim pueblocaman inti llucshina ladopi tiyac Mizpa pugru pambacaman catishpa rircacuna. Chashnami shucllatapish mana saquishpa, tucui huañuchircacuna.

9Josueca Mandac Dios mandashca shinallatacmi paicunataca huañuchishpa, caballocunapac chaquicunata paquishpa, carretacunatapish rupachirca.

10Chai quipaca Josué cutishpami Hazor pueblota japishpa, jatun mandactaca espadahuan huañuchirca. Hazor pueblomi tucui caishuc llactacunamanta ashtahuan jatun carca.

11Chaipica shucllatapish mana saquishpami, espadahuan tucui tucuchishpa, Hazor pueblotapish rupachirca.

12Shinallatac Josueca chai jatun mandaccunapac tucui pueblocunapi causaccunata chaipi cac tucui jatun mandaccunandimi huañuchirca. Mandac Diosta servic Moisés mandashca shinallatacmi espadahuan huañuchishpa tucuchirca.

13Ashtahuanpish israelcunaca lomacunapi tiyac pueblocunataca mana rupachircachu. Hazor pueblollatami Josueca rupachirca.

14Israelcunaca chai pueblocunapi tucui ima tiyashcacunatapish, animalcunatapishmi japirca. Ashtahuanpish chaipi causac gentecunataca shucllatapish, mana saquishpami espadahuan tucui huañuchirca.

15Ima shinami Mandac Dios paita servic Moisesta mandashca shinallatacmi Moisesca Josueta mandarca. Mandac Dios Moisesta mandashcataca Josueca imata mana saquishpami tucuita ruhuarca.

Josué tucui llactacunata quichushcamanta

16Josueca chashnami tucui llactacunata japirca. Urcucunapi tiyac pueblocunata tucui Neguev pambacunata, Gosén tucui llactacunata, jatun pamba Sefelata, Arabá llactata, Israel urcucunatapish pugru pambacunandimi japirca.

17Seir llactaman ric Halac urcumanta Líbano pambapi tiyac Baal-gad llactacaman, Hermón urcu pambacamanmi japirca. Shinallatac chai llactacunapi causaccunapac jatun mandaccunatapish chugrichishpami huañuchirca.

18Josueca chai jatun mandaccunahuanca tauca huatatami macanacurca.

19Israelcunahuan sumacta causanata munac puebloca mana tiyarcachu. Ashtahuanpish Gabaón pueblopi causac heveocunallami israelcunahuanca sumacta causarca. Caishuc pueblocunataca macanacushpa atishpami japirca.

20Mandac Diosca Moisesta mandashca shinami paicunataca israelcunahuan macanacuchun, chashna macanacushpaca mana llaquishpa tucuchishca cachun, sinchi shunguta ruhuarca.

21Chai punzhallatami Josueca Hebrón, Debir, Anab, Judá aillucunapac, tucui Israel urcucunapi causac anaquitacunata tucui huañuchirca. Josueca tucui chai pueblocunandimi tucuchirca.

22Anaquitacunaca israelcunapac llactapica shucllapish mana saquirircachu. Ashtahuanpish maijancunallami Gaza, Gat, Asdod pueblocunapi saquirirca.

23Mandac Dios Moisesta mandashca shinallatacmi Josueca tucui chai llactata japirca. Chai llactacunataca Israel aillucuna mashna aillu cashca shinallatacmi, chaupishpa curca.

Shinami chai llactaca ña mana macanacui tiyacpi samarirca.