APOCALIPSIS 17 - Biblia Quichua Cañar 2010

Huacllirishpa causac huarmita llaquichishcamanta

1Copacunata charicuc canchis angelcunapuramanta shuc shamushpaca: «Shamui, yacucuna jahuapi tiyacuc cullquimanta huainayac huarmita llaquichigricushcata ricuchisha.

2Chai huarmihuanmi cai pachapi tiyac jatun mandaccunaca huainayarca. Tucui llacta gentecunapish paihuanmi vinota ubiashpa machac shina huacllirircacuna» nirca.

3Chai quipaca Diospac Espíritu ñucata japicpi shitashca pambaman ángel pushacpimi, shuc huarmi chai manchana puca animalpi montashca tiyacucta ricurcani. Chai animalca canchis umayuc, chunga gachuyuc, shinallatac cuerpopica Diosta camishpa quillcashcami carca.

4Chai huarmica morado, shinallatac amsa puca churanata churashcami carca. Paica curihuanpish, sumac rumihuanpish, perlas-huanpish allichishca huarmimi carca. Chai huarmica millanayaitapish, huacllirishcatapish jundachishca curi copatami maquipi charicurca.

5Frentepica pipish mana ricsishca quillcami tiyacurca. Chaipica: «¡Jatun Babilonialla! Cullquimanta huainayashpa causaccunapacpish, cai pachapi imatapish millaita ruhuaccunapacpish mamami cangui» nishcami carca.

6Chai huarmitaca Diospaclla caccunapac, shinallatac Jesusmanta huillaccunapac huañuchishca yahuarhuan machashca cashcatami ricurcani. Chaita ricushpaca, yallitami mancharishpa saquirircani.

7Chashna mancharicpimi angelca: «¿Ima nishpatac yallita mancharingui? Chai huarmipi quillcashca imata nisha nicushcatapish, chai manchana animal canchis umayuc, chunga gachuyuc imata nisha nicushcatapish ñami huillagrini.

8Can ricushca manchana animalca ñaupamanmi tiyarca, cunanca ña mana tiyanchu. Shina cashpapish huiñaita jatun llaquipi chingaringapacmi, jatun jutcumantaca llucshinga. Dios cai pachata ruhuashca punzhamanta pacha, huiñaita causangapac rina libropi mana quillcashca cai pachapi causac gentecunaca chai utcaman tiyashca, cunanca mana tiyac, cutin shamuna cashca manchana animalta ricushpaca, yallitami mancharingacuna.

9Caicunata yachangapacca alli yuyaiyuc, yachaisapami cana can. Canchis umacunaca chai huarmi tiyacuc canchis urcucunata,

10shinallatac canchis jatun mandaccunatami nisha nin. Pichca jatun mandaccunaca ñami tucurirca. Chaimanta shucca mandacunracmi. Shucca manarac mandangapac shamunchu. Shina shamushpapish ashacamanllami mandanga.

11Ñaupaman tiyashca, cunanca mana tiyac manchana animalca chai canchis mandaccunapuramanta cashpapish, pusacniqui mandacmi. Paimi huiñaita jatun llaquipi chingarinaman ricun.

12Can ricushca chai chunga gachucunaca chunga jatun mandaccunatami nisha nin. Chai mandaccunaca manarac mandancunachu. Shina cashpapish shuc pachallatacmi chai manchana animalhuan ishcai tucushpa mandanata chasquinga.

13Chai chunga jatun mandaccunaca chai manchana animalmanmi mandanatapish, imata ruhuaclla canatapish cungapac shuc yuyailla tucushcacuna.

14Chaicunaca Pactalla Ovejahuanmi macanacunga. Shina cacpipish, amocunapac Amo, jatun mandaccunapac Jatun Mandac cashcamantami Pactalla Ovejaca Dios cayashpa acllashca, paita allita caticcunahuan tucushpa, paicunata mishanga» nirca.

15Cutinllatacmi angelca: «Chai cullquimanta huainayac huarmi tiyacushca yacucunaca aillucuna, taucalaya gentecuna, taucalaya rimaita rimaccuna, shinallatac llactacunami can.

16Can ricushca chai chunga gachucunapish, manchana animalpish cullquimanta huainayac huarmita piñashpami, tucuita quichushpa lluchullata saquinga. Paipac aichataca micungacunami, shinallatac rupachingacunami.

17Diosllatacmi paicuna imata ruhuashpapish, pai munashcata ruhuachun, shinallatac Dios huillashcacuna pactangacaman shuc yuyailla tucushpa, chai manchana animalman mandanata cuchun shungupi yuyaita curca.

18Can ricushca huarmica tucui cai pachapi tiyac jatun mandaccunata mandac jatun pueblomi» nirca.