1 REYES 9 - Biblia Quichua Cañar 2010

Diosca, Salomonhuan ari nishcamanta(2 Cr 7.11-22)

1Salomonca Mandac Diospac huasitapish, pai mandashpa tiyana huasitapish, tucui imata ruhuangapac yuyaricushcatapish tucuimi tucuchirca.

2Shina tucuchishca quipami Mandac Diosca Gabaón pueblopi ricurishca shinallatac Salomonman cutin ricurirca.

3Chaipimi Mandac Diosca: «Ñuca ñaupapi can yallita mañactaca uyanimi. Huiñaicaman ñuca shuti chaipi causachun, can shayachishca huasitapish, ñucapaclla cachun chasquinimi. Cai huasitaca punzhantami ricucushalla. Ñuca shungupipish yuyaricushallami.

4Cambac taita David causashca shinallatac alli causangui. Tucui shunguhuan ñucata cazushpa, tucuipac allita ruhuashpa, ñuca mandashcacunata pactachishpa, ñuca quillcachishcacunata, imata ruhuachun nishcacunata pactachishpa causangui.

5Shina causacpica, ñucallatacmi Israel llactata mandangapac can tiyarinataca, cambac taita Davidman huillashca shinallatac sinchiyachishpa churasha. Paitaca: “Cambac huahua huahuacunamantaca israelcunata mandangapac tiyarinapi tiyaric runaca mana illangachu” nircanimi.

6Ashtahuanpish cancunapish, cancunapac huahuacunapish sinchi shungu tucushpa, ñuca mandashcacunata, ñuca quillcachishca shimicunata mana cazushpa, shuctac dioscunata servishpa, alli nishpa causacpica,

7ñucami israelcunataca paicuna causachun ñuca cushca llactamanta llucchishpa cachasha. Shinallatac ñuca shutipi mañana ñucapac cachun chicanyachishca cai huasitapish ñuca ñaupamanta anchuchishami. Chashna ruhuacpimi, israelcunataca shuc llactacunapi causaccunaca parlanacushpa asingacuna.

8Sumac nishpa charishca cai huasitaca urmashcata ricushpami, maijanpish mancharinga. Chaita ricushpa, burlashpa asishpaca: “Mandac Diosca, ¿ima nishpatac cai llactatapish, cai huasitapish chashna llaquichinyari?” ningacunami.

9Shina nicpimi, shuccunaca: “Paicunapac ñaupa taitacunata Egiptomanta llucchimuc, paicunata Mandac Diosta saquishpami, shuctac dioscunata alli nishpa servircacuna. Chaimantami Mandac Diosca cai tucui llaquita paicunapac jahuapi churashpa llaquichirca” ningacuna» nirca.

Salomonca shuctac ruhuanacunatapish ruhuashcamanta(2 Cr 8.1-18)

10Ishcai chunga huatapimi Salomonca Mandac Diospac huasitapish, mandashpa tiyana huasitapish ruhuashpa tucuchirca.

11Chai huasicunata ruhuangapacca Tiro llactata jatun mandac Hirammi cedro caspicunata, ciprés caspicunata, shinallatac curitapish mashna munashcata curca. Chaimantami jatun mandac Salomonca Galilea llacta ishcai chunga pueblocunata Hiramman curca.

12Shina cucpimi, Tiro llactamanta Hiramca Salomón cushca pueblocunata ricungapac llucshimurca. Chai pueblocunata ricushpaca mana munarcachu.

13Chaimantami: «Ñuca huauquilla, ¿can cushca pueblocunaca imapactac alliyari?» nirca. Shina nishpami chai pueblocuna tiyac llactataca Cabulta shutichirca. Cunancamanmi chai shutillatac can.

14Hiramca patsac ishcai chunga talento curitami Salomonmanca cachashca carca.

15Jatun mandac Salomonca Mandac Diospac huasitapish, paipac huasitapish, Milo nishcatapish, Jerusalén muyundi jatun pircatapish, Hazor, Meguido, Gezer pueblocunatapish ruhuangapacmi gentecunata tandachirca.

16Egipto llactata jatun mandac Faraón huichai shamushpami, Gezer pueblotaca macanacushpa quichushca carca. Chai pueblota rupachishpami, chaipi causac cananeocunatapish huañuchishca carca.

17Chaimantami Salomonca Gezer pueblotapish, ura ladoman tiyac Bet-horón pueblotapish,

18shitashca pambapi cac Baalat, Tadmor pueblocunatapish, cutin shayachirca.

19Shinallatac imalla tiyashcacunata huacaichingapac pueblocunatapish allichircami. Macanacuna carretacunata huacaichina pueblocunatapish, caballocunata charina pueblocunatapish shayachircami. Jerusalenpi, Líbano llactapi, pai mandacuc tucui llactacunapi ima ruhuana cashcataca tucuimi ruhuarca.

20Amorreo, heteo, ferezeo, heveo shinallatac jebuseopuramanta ashalla saquirishca gentecunahuanmi chashnaca ruhuarca. Paicunaca mana israelcunachu carca.

21Chai gentecunapac huahua huahuacunaca israelcuna chai llactata japishpa, mana tucui tucuchi pudicpi, chai llactapi saquirishpa mirarishcacunami carca. Paicunatami Salomonca cunan punzhacaman impuestota pagachishpa, servichishpa charin.

22Ashtahuanpish Salomonca israelcunataca shucllatapish chashna serviccuna cachunca mana churarcachu. Paicunataca macanacuc soldadocunata paita serviccuna cachun, mana cashpaca mandaccuna cachun, soldadocunata mandaccuna cachun, carretacunapi puric soldadocunata shinallatac caballocunapi ric soldadocunata mandaccuna cachunmi churarca.

23Chai runacunata ricushpa, mandachun Salomón churashca mandaccunaca pichca patsac pichca chunga mandaccunami carca. Paicunami chaipi imatapish ruhuaccunataca mandarcacuna.

24Faraonpac ushipish, Davidpac pueblomanta huichai rishpami, Salomón paiman ruhuashpa cushca huasipi causagrirca. Chai quipami Salomonca Milo nishca pushtutapish ruhuarca.

25Salomonca chai huasita ruhuashpa, tucui tucuchishca quipaca, Mandac Diosman paillatac ruhuashca altar jahuapimi huatapi quimsa cutin animalcunata Diosman cushpa tucui rupachirca. Shinallatac Dios-huan alli tucungapacpish, animalcunata cushpami huañuchirca. Inciensotapish, Mandac Diospac ñaupapi tiyac altarpimi rupachirca.

26Jatun mandac Salomonca jatun barcocunatapish ruhuarcami. Chai barcocunataca Elot pueblo ladollapi tiyac Ezión-geber ladollapimi ruhuarca. Chai pueblocunaca Edom llacta ladollapi tiyac puca cucha patapimi.

27Hiramca chai barcocunapimi mama cuchapi barcota purichinata alli yachac, paipac runacunata Salomonta serviccunahuan cacharca.

28Paicunami Ofir llactaman rishpa, chuscu patsac ishcai chunga talento curita apamushpa, jatun mandac Salomonman curcacuna.