1Benjaminpac llactapi tiyac Anatot llactapi causac curacunapuramanta Hilquiaspac churi Jeremías huillashcami.
2Amonpac churi jatun mandac Josías Judá llactata chunga quimsa huatata mandacucpimi, Mandac Diosca Jeremiasman huillarca.
3Josiaspac churi jatun mandac Joacim Judá llactata mandacui huatamanta Josiaspac churi jatun mandac Sedequías Judá llactata chunga shuc huata mandangacamanmi Jeremiasmanca huillarca. Chai huata, pichca quillapimi, Jerusalenpi causaccunata prezu apashca carca.
4Mandac Dios ñucata rimashpaca:
5«Cantaca mamapac huicsapi
manarac tiyacpimi, ña ricsircani.
Manarac huacharicpimi,
ñucapaclla cachun chicanyachishpa,
llactacunapi ñuca ima nishcata
huillachun churarcani» nirca.
6Shina nicpimi ñucaca:
«Mandac Dioslla,
ñucaca cunan huiñaillami cani.
Rimanatapish mana alli yachanichu»
nircani.
7Shina nicpimi, Mandac Diosca:
«Ama: “Cunan huiñaillami
cani” nichu.
Maiman ñuca cachacpipish rilla.
Ñuca imata nichun nicpipish
ninguilla.
8Ñucami ima llaquimantapish
quishpichingapac canhuan casha.
Ama manchanguichu» nirca.
9Shinami Mandac Diosca paipac maquita ñuca shimipi tupachishpaca:
«Riqui, ñuca rimashcacunatami
cambac shimipi churani.
10Cunan punzhamanta pachami
cantaca llactapi causaccunatapish,
jatun mandaccunatapish,
sapimanta llucchic shina
tucui chingachichun,
urmachishpa ñutuchichun,
shinallatac cutin shayachishpa,
tarpuc shina allichichun
churani» nirca.
11Cutinllatac Mandac Dios rimashpaca: «Jeremías, ¿imatatac ricungui?» nirca. Shina nicpimi ñucaca: «Almendro caspitami ricuni» nircani.
12Shina nicpimi, Mandac Diosca: «Allitami ricungui. Ñuca ima nishcataca utcami pactachigrini» nirca.
13Cutinllatac Mandac Dios rimashpaca: «¿Imatatac ricungui?» nirca. Shina nicpimi ñucaca: «¡Jahua ladomanta shuc manga timbushpa tallirimucuctami ricuni!» nircani.
14Shina nicpimi, Mandac Diosca:
«Jahua ladomantami cai llactata
llaquichingapac shamugrin.
15Ñucami jahua ladopi causac
familiacunata, jatun mandaccunata
tandanacushpa shamuchun cayagrini.
Paicuna shamushpami,
Jerusalenman yaicuna ñaupapi tiyac
tucui pirca muyundipipish,
Judá llactapi tiyac
pueblo muyundipipish
carpacunata shayachinga.
16Chaica, mana allita
ruhuashcamantami llaquichigrini.
Paicunaca ruhuashcalla dioscunata
alli nishpami, inciensota cushnichirca.
17Canca alli chumbillirishpa,
sinchita shayarishpa,
ñuca imata mandashcata
paicunaman huillangui.
Paicunapac ñaupapi shayarinataca
ama manchanguichu.
Pacta canllatac paicuna
manchachichun saquinguiman.
18Cunan punzhallatacmi cantaca
muyundi pircashca llacta,
fierro pilar shina,
bronce pirca shina cachun churani.
Judá llactapi causaccunapacpish,
jatun mandaccunapacpish,
caishuc mandaccunapacpish,
curacunapacpish,
cai llactapi causaccunapacpish,
sinchi pirca shina cachunmi churani.
19Canhuan macanacushpapish
cantaca manatac mishangachu.
Canta quishpichingapacca
ñucami canhuanca casha.
Chaitaca Mandac Dios ñucami nini» nirca.
Who We AreWhat We EelieveWhat We Do
2025 by iamachristian.org,Inc All rights reserved.
