MARCOS 10 - Biblia Quichua Cañar 2010

Divorciomanta(Mt 19.1-12; Lc 16.18)

1Jesusca Capernaúm pueblomanta llucshishpaca, Jordán yacuta pasashpa, Judea llactamanmi rirca. Jesusca achca gentecuna tandanacumucpimi, pai yachachic cashca shinallatac cutin yachachi callarirca.

2Fariseocuna pandachingaraicu Jesuspacman cuchuyashpaca:

—Mandashcacunapi nishca shinaca, ¿cusaca huarmimanta raquirinachu canga?— nishpa tapurca.

3Shina tapucpi Jesusca:

—Moisés mandashcapica, ¿imatatac nin?— nirca.

4Shina tapucpimi fariseocunaca:

—Moisesca: “Firmata cushpaca, huarmimanta raquirinallami” ninmi— nirca.

5Shina nicpimi Jesusca:

—Cancuna sinchi shungu cacpimi, Moisesca chashna mandashpa quillcashca.

6Diosca cai pachata ruhuashpaca, caritapish, huarmitapishmi ruhuarca.

7Chaimantami carica taita mamata saquishpa, huarmihuan tandarishpa,

8ishcaimanta shuclla tucunga. Shinashpaca ña mana ishcaichu, ashtahuanpish shucllami can.

9Chaimanta Dios tandachishcataca, pi mana chicanyachingachu— nirca.

10Paipac yachacuccuna huasipi cashpami, chaillamantatac cutin Jesusta tapurca.

11Chaimantami Jesusca:

—Maijanpish paipac huarmimanta raquirishpa shuc-huan cazarashpaca juchallinmi.

12Chashnallatac huarmipish paipac cusamanta raquirishpa, shuc-huan cazarashpaca, juchallinmi— nirca.

Jesús Huahuacunamanta mañashcamanta(Mt 19.13-15; Lc 18.15-17)

13Huahuacunapac umapi Jesús tuparichun pushamucpimi, yachacuccunaca chai pushamuccunahuan piñarirca.

14Jesús chaita ricushpa, yachacucuccunahuan piñarishpaca:

—Huahuacuna ñucapacman shamuchunca saquichiclla, ama jarcaichicchu. Cai huahuacuna shinacunami Dios mandacucmanca yaicunga.

15Maijanpish shuc huahua shina, Dios mandacucta mana chasquicca, Dios mandacucmanca mana yaicungachu. Chaica chashnatacmi canga— nirca.

16Shina nishpami, Jesusca huahuacunata marcashpa, uma jahuapi maquita churashpa bendiciarca.

Chayuc runa Jesusta tapushcamanta(Mt 19.16-30; Lc 18.18-30)

17Chaimanta llucshishpa, Jesús ñanta ricucpimi, shuc moso callpamushpa, paipac ñaupapi cungurishpaca:

—Alli yachachiclla, ñuca huiñai causaita charingapacca, ¿imatatac ruhuana cani?— nirca.

18Shina nicpimi Jesusca:

—¿Ima nishpatac “alli” ningui? Shucllami allica tiyan, chaica Diosmi.

19Mandashcacunataca canllatac yachanguimi. Chaipica: “Ama huainayangui, ama huañuchingui, ama shuhuangui, ama llullangui, ama umangui, cambac taita mamata cuyangui” nicunmi— nirca.

20Jesús chashna nicpimi, chai runaca:

—Yachachic, tucui caicunataca huahuamanta pachami pactachicuni— nirca.

21Chaimantami Jesusca cuyaihuan paita ricushpaca:

—Shina cashpapish, caitami ruhuanarac cangui: Cambac tucui charishcacunata catushpa, huacchacunaman cugri. Chashna cushpaca, jahua pachapimi achcata charingui. Chashna cushpaca, ñucata catilla— nirca.

22Chai runaca yalli chayucmi carca. Chaimantami llaquilla rirca.

23Chaimanta Jesús muyundita ricushpa, paipac yachacuccunataca:

—¡Chayuccunapacca Dios mandacucman yaicunaca sinchimi!— nirca.

24Yachacuccuna chaita uyashpaca yallitami mancharirca. Ashtahuanpish Jesús cutinllatac rimashpaca:

—¡Huahuacunalla, charishcallapi shunguta churaccunapacca, Dios mandacucman yaicunaca sinchimi!

25Chayuc runa Dios mandacucman yaicunapac randica, shuc camellomi auja ringrita pasarinman— nirca.

26Chaita yachacuccunaca uyashpaca ashtahuan mancharishpami:

—Shinashpaca, ¿pitac quishpiringayari?— nishpa, tapunacurca.

27Jesús paicunata ricushpaca:

—Gentecunaca maita mana quishpiripacmi, ashtahuanpish Diosmanca imapish ruhuaipacllami— nirca.

28Chashna nicpimi Pedroca:

—Ñucanchicca tucui charishcacunata saquishpami, canta caticunchic— nirca.

29Shina nicpimi Jesusca:

—Maijanpish alli huillaita huillangapac, ñucata catishcamanta huasita, huauquicunata, panicunata, taita mamata, huarmita, huahuacunata, allpata saquishpaca,

30cai pachapica patsac cutinhuanmi huasicunata, huauquicunata, panicunata, mamacunata, huahuacunata, allpacunata chasquinga. Chashnallatac ñucata caticushcamanta gentecunapac piñashca, llaquichishca cashpaca shamuc punzhapica huiñai causaitami charinga. Chaica, chashnatacmi canga.

31Jatun tucushcacunaca yangallami canga. Yangalla nishcacunaca, alli nishcami canga— nirca.

Jesús huañunamanta cutin huillashcamanta(Mt 20.17-19; Lc 18.31-34)

32Jesusca Jerusalén puebloman ñanta ricushpaca, paipac yachacuccunapac ñaupatami ricurca. Yachacuccunaca manchai manchaillami Jesustaca catishpa ricurca. Chaimantami Jesusca chunga ishcai yachacuccunallata cayashpa, pai ima tucunata huillai callarirca. Pai huillashpaca:

33—Cunanca, Jerusalenmanmi ricunchic. Chaipimi Runa Tucungapac shamushca ñucataca, curacunata mandac curacunamanpish, mandashcacunata yachachiccunamanpish japichinga. Paicunami huañuchingapac juchanchishpa, mana israelcunaman cunga.

34Paicunaca ñucata burlangacunami, macangacunami, tucangacunami, huañuchingacunami. Chashna huañuchicpipish, quimsa punzhapica causarishallami— nirca.

Jacobopish, Juanpish mañashcamanta(Mt 20.20-28)

35Zebedeopac churicuna Jacobopish, Juanpish Jesuspacman cuchuyashpaca:

—Yachachic, ñucanchic mañashcata uyachunmi munanchic— nirca.

36Shina nicpimi Jesusca:

—¿Imatatac ruhuachun ninguichic?— nirca.

37Chashna nicpimi paicunaca:

—Cambac sumaimana mandanapica, shuctaca cambac alli maquiman, shuctaca lluqui maquiman tiyachingui— nirca.

38Shina nicpimi Jesusca:

—Cancunaca imata mañacushcataca mana yachanguichicchu. Jayacta ubiac shina, bautizaric shina llaquicunataca, ¿ñuca shina apai pudinguichicchu?— nirca.

39Chashna nicpimi paicunaca:

—Ari, chaita apashunllami— nirca.

Chashna nicpimi Jesusca:

—Ari, cancunaca jayacta ubiac shina, bautizaric shina llaquicunataca, ñuca shina apanguichicmi.

40Ashtahuanpish maijanta ñuca alli maquiman, lluqui maquiman tiyachinataca, Diosmi allichishpa charicun, mana ñucaca— nirca.

41Chaita caishuc chunga yachacuccuna uyashpaca, Jacobohuanpish, Juanhuanpish piñarircami.

42Jesús paicunata cayashpaca:

—Cai pacha mandaccunallami, llactapi causaccunata quiquin munashcata ruhuashpa mandan. Paicunapurapipish maijan jatun mandac cashpaca, paicunatapish mandanllami. Chaitaca cancunallatac yachanguichicmi.

43Cancunapurapica, mana chashnachu cana canguichic. Ashtahuanpish cancunapurapi maijan alli nishca casha nishpaca, caishuccunata servinami canguichic.

44Cancunapurapi maijan mandangapac alli nishca casha nishpaca, caishuccunata servinami canguichic.

45Runa Tucungapac shamushca ñucaca, mana servichingapacchu shamurcani, ashtahuanpish servingapac, huañushpa achca runacunata quishpichingapacmi shamurcani— nirca.

Jesús ñahui mana ricuc Bartimeo runata alliyachishcamanta(Mt 20.29-34; Lc 18.35-43)

46Chaimantaca Jericó pueblomanmi chayarcacuna. Chaimanta Jesús paipac yachacuccunahuan, shuctac gentecunahuan ricucpimi, Timeopac churi Bartimeo runa ñanpi caridadta mañashpa tiyacurca.

47Nazaret pueblomanta Jesús cashcata uyashpami chai runaca:

—Mandac Davidpac aillupuramanta Apunchic Jesús, ¡ñucataca llaquiyari!— nishpa, capari callarirca.

48Taucacuna upallai nishpa piñaricucpipish, chai runaca:

—Mandac Davidpac aillupuramanta Apunchic Jesús, ¡ñucata llaquiyari!— nishpami, ashtahuan caparirca.

49Chaimantami Jesús chaillapi shayarishpaca:

—Paita cayamugrichic— nirca.

Cayangapac riccuna chai runataca:

—Jatari, ama manchaichu. Jesús cayacunmi— nirca.

50Chashna nicpimi, chai runaca pai pillurishcata chaillapi shitashpa, jatarishcahuan Jesuspacman callparca.

51Chashna chayaricpimi Jesusca:

—¿Imatatac ruhuachun ningui?— nirca.

Shina nicpimi, ñahui mana ricuc runaca:

—Yachachic, ñuca ñahuicunata alliyachishpa cui— nirca.

52Shina nicpimi Jesusca:

—Rilla, can crishcamantaca, ñami alliyashcangui— nirca.

Chashna nicpimi, ñahui ña ricucpi, Jesusta catishpa ñanta rircalla.