APOCALIPSIS 7 - Biblia Quichua Cañar 2010

Patsac chuscu chunga chuscu huaranga israelcunatachicanyachishcamanta

1Chai quipaca cai pacha chuscu ladopi chuscu angelcuna shayacuctami ricurcani. Chaicunaca cai pacha allpatapish, mama cuchatapish, ima yuracunatapish ama huaira huactachunmi, chuscu ladopi jarcashpa shayacurca.

2Shinallatac inti llucshic ladomanta shuc ángel shamuctami ricurcani. Paica causac Diospac sellotami charicurca. Chai angelmi mama cucha yacutapish, cai pachatapish huacllichingapac poderta charic chuscu angelcunata sinchita caparirca. Paica:

3«Ñucanchic Diospacta ruhuaccunapac frentepi sellota churangacaman cai pacha allpatapish, mama cucha yacutapish, ima yuratapish ama imata ruhuanguichicchu» nirca.

4Chai quipaca: “Israelpac chunga ishcai huahuacuna mirarishcapuramanta, pasac chuscu chunga chuscu huaranga sellota churashcacunami tiyan” nictami uyarcani.

5Chaicunaca Judapac aillupuramanta chunga ishcai huaranga, Rubenpac aillupuramanta chunga ishcai huaranga, Gadpac aillupuramanta chunga ishcai huaranga,

6Aserpac aillupuramanta chunga ishcai huaranga, Neftalipac aillupuramanta chunga ishcai huaranga, Manasespac aillupuramanta chunga ishcai huaranga,

7Simeonpac aillupuramanta chunga ishcai huaranga, Levipac aillupuramanta chunga ishcai huaranga, Isacarpac aillupuramanta chunga ishcai huaranga,

8Zabulonpac aillupuramanta chunga ishcai huaranga, Josepac aillupuramanta chunga ishcai huaranga, shinallatac Benjaminpac aillupuramanta chunga ishcai huaranga sellota churashcacunami carca.

Yuranlla churanata churashca achcacunata ricushcamanta

9Chai quipaca mana yupaipac tucuilaya gentecuna tucui llactacunamanta, tucui aillucunamanta, tucuilaya rimaita rimac gentecunatami ricurcani. Paicunaca mandashpa tiyarinapac ñaupapi, Pactalla Ovejapac ñaupapi yuranlla churanata churarishca, maquipica ramoscunahuan shayacuctami ricurcani.

10Chaicunaca:

«¡Mandashpa tiyarinapi tiyacuc

ñucanchic Diospish,

Pactalla Ovejapish ñucanchicta

quishpichircami!» nishpami,

sinchita caparicurcacuna.

11Tucui angelcunaca mandashpa tiyarinapac, yuyaccunapac, shinallatac chuscu causaita chariccunapac muyundictami shayacurcacuna. Paicunaca mandashpa tiyarinapac ñaupapi Diosta alli ningapac pambacaman cumurishpaca:

12«¡Chashna cachun!

Ñucanchic Diosca sumac cashcamanta,

yachac cashcamanta,

alli nishca cashcamanta,

imatapish ruhuaclla cashcamanta,

jatun cashcamantami,

huiñaicaman alli nishpa

pagui ninchic.

¡Chashna cachun!» nicurcacuna.

13Shina cacpimi chai yuyaccunapuramanta shucca: «Chai yuranlla churanata churashcacunaca, ¿picunatac, maimantatac shamushca?» nishpa, ñucaman tapurca.

14Shina tapucpimi ñucaca: «Amito, canllatacmi yachangui» nircani. Shina nicpi paica: «Chaicunaca jatun llaquimanta mishaccunami, shinallatac Pactalla Ovejapac yahuarhuan paicunapac churanata tacshashpa yuranlla tucushcacunami.

15Chaimantami Diosta mañana huasipi, Dios mandashpa tiyarinapac ñaupapi tutapish, punzhapish paipacta ruhuancuna. Mandashpa tiyarinapi tiyacucmi paipac carpa huasipi paicunataca huacaichinga.

16Yarcaihuanpish yacunayaihuanpish ña mana llaquita apangacunachu. Intipish, shuctac ima rupachiccunapish mana rupachingachu.

17Ashtahuanpish mandashpa tiyarina chaupipi cac Pactalla Ovejami michinga. Paillatacmi huiñai causaita cuc yacumanpish pushanga. Shinallatac paicunapac ñahuicunamantaca Diosmi tucui huiquita pichanga» nirca.