1¡Diosca israelcunahuanpish,
chuya shungucunahuanpish allimi!
2Ñucamanta nishpaca lluchcarishpa,
ña tigranallami carcani.
3Diosta mana manchaccuna
cari tucushcata ricushpa,
paicuna chayuccuna cacpimi,
ñuca shungupipish munarcani.
4Paicunataca huañuchic ungüillapish
mana japinchu.
Chaipac randica yallita sinchiyancunami.
5Caishuc huañuclla
gentecuna shina mana ima llaquitapish,
ima nanaita mana charincunachu.
6Huallcata churaric shinami
jatun tucushpa purincuna.
Churanata churaric shinami
millaita ruhuancuna.
7Ñahuicuna llucshirictami huirayancuna.
Shungu yuyashcatami
yalli millaita ruhuancuna.
8Pitapish yangalla nishpami
yallita millaita rimancuna.
Jatun tucushpami llaquichingapac yuyarincuna.
9Jahua pachapi tiyactami camincuna.
Paicunapac calluhuanca
tucui cai pachapi causaccunatami
imatapish rimancuna.
10Chaimantami Dios acllashcacunaca
paicunapacman rincuna.
Paicuna ima yachachishcatapish
uyancunallami.
11Millaicunaca:
«Diosca, ¿ima shinatac yachangayari?
Jahua pachapi causac Diosca,
¿ima shinatac ricungayari?» nincunami.
12Riquichic, Diosta mana manchaccunaca
imapish mana tucushpami
jahualla chayucyancuna.
13¡Yangallami chuya shungu tucushpa,
ñuca maquicunapish chuya cashcani!
14Ashtahuanpish punzhantami
azotishca causani.
Tucui tutamantami macashca purini.
15Ñucapish paicuna nishcata
rimashpaca can Diospac huahuacunata
pandachimanmi.
16Chaicunata entendinaca
ñucamanca yallita sinchimi carca.
17Diospaclla huasiman yaicushpami,
paicuna ima tucuna cashcataca
allita entendircani.
18Paicunata llaquipi urmachingapacmi
lluchcarinapi saquishcangui.
19¡Cungaillami llaquica japinga!
Yallita mancharishpami tucuringacuna.
20Sueñuimanta riccharic shinami
Jatun Dios jatarishpa paicuna
ima shina cashcata yangapi churanga.
21Ñuca almaca yallitami llaquirirca.
Ñuca shungupish tucsicuc shinami nanarca.
22Ñuca imatapish mana yachac,
mana entendic cashpami chashna carcani.
Cambac ñaupapica
shuc animal shinami carcani.
23Shina cashpapish canmantaca
manatac caruyarcanichu.
Canca alli maquimantami
ñucataca charirarcangui.
24Canca cunashpami ñucataca pushangui.
Quipataca alli nishpami chasquingui.
25Jahua pachapica canllatami charini.
Pi shucca mana tiyanchu.
Cai pachapi canhuan cashpaca
pi shuctatac mana munanichu.
26Ñuca cuerpopish,
ñuca shungupish huañunallami.
Shina cacpipish jatun rumi shina Diosmi
ñuca shunguman fuerzata cun.
Diosca huiñaitami
imatapish allita cun.
27Riqui, canmanta caruyaccunaca
chingaringami.
Canmanta anchuriccunataca
tucuitami tucuchingui.
28Ñucamanca Diospac cuchupi canami
tucuimanta yalli alli.
Can tucui ruhuashcacunata huillangapacmi
can jatun Mandac Diosta shuyashpa causani.
Who We AreWhat We EelieveWhat We Do
2025 by iamachristian.org,Inc All rights reserved.
