1Acazca ishcai chunga huatata charishpami, mandai callarirca. Paica chunga sucta huatatami Jerusalenpi mandarca. Mandac Diospac ñaupapica mana paipac taita David shina allita ruhuashpachu causarca.
2Ashtahuanpish Israel llactata jatun mandaccuna shinallatacmi mana allita ruhuashpa causarca. Chaipac jahuapica metalta yacuyachishpami Baal dioscunaman ricchata ruhuachirca.
3Ben-hinom pugru pambapipish inciensota rupachircami. Paica israelcunapac ñaupamanta llucchishpa cachashca millaita ruhuac gentecuna shinallatacmi, paipac churicunata chai dioscunaman rupachirca.
4Shinallatac lomacunapi tiyac altarcunapi, uchilla lomacunapi, tucui pangasapa yura ucupimi animaltapish, inciensotapish rupachirca.
5Chaimantami paita Mandac Diosca siriocunata jatun mandacpac maquipi churacpi, chai siriocuna atishpa, achca gentecunata Damasco puebloman prezu aparca. Shinallatac Israel llactata jatun mandacpac maquipipish churacpimi, mishashpa achcata huañuchirca.
6Remaliaspac churi Peka soldadoca shuc punzhallami Judá llactapi causac patsac ishcai chunga huaranga soldadocunata huañuchirca. Chaicunaca ashtahuan sinchi soldadocunami carca. Paicunapac ñaupa taitacunata Mandac Diosmanta anchurishcamantami chashnaca huañuchirca.
7Shinallatac Efraín llactamanta mai sinchi soldado Zicrica jatun mandac Acazpac churi Maasiastapish, paipac mayordomo Azricamtapish, jatun mandacpac quipa mandac Elcanatapish huañuchircami.
8Israelcunaca Judá llactapi causac paicunapac huauquicunapuramantami huarmicunata, huahuacunata, solteracunata ishcai patsac huarangata prezu aparca. Chaipac jahuapish achca charishcacunata quichushpami, Samaria puebloman aparca.
9Mandac Dios ima nishcata huillac Obedmi Samaria pueblopi causacurca. Paimi Samaria puebloman soldadocuna chayacucpi, tupangapac llucshishpaca:
—Cancunapac ñaupa taitacunata Mandac Diosca Judá llactapi causaccunahuan piñarishpami, cancunapac maquipi churarca. Cancunaca jahua pachaman chayacta yallita piñachishpami, achcata huañuchircanguichic.
10Cunanca, Judá llactapi, Jerusalén pueblopi causaccunataca servic caricuna, servic huarmicuna cachunmi apamushcanguichic. Ashtahuanpish chashna ruhuashpaca, ¿manachu cancunata Mandac Diosta piñachishpa, juchata ruhuashcanguichic?
11Shina cashcamanta cunanca, uyaichic. Prezu apamushca cancunapac huauquicunataca cutichishpa cachaichic. Mandac Diosca cancunahuanca yallitami piñarishca— nirca.
12Chaita uyashpami, Efraín aillupac soldadocunata mandac Johananpac churi Azariaspish, Mesilemotpac churi Berequiaspish, Salumpac churi Ezequiaspish, Hadlaipac churi Amasapish jatun macanacuimanta shamuccunahuan piñarirca.
13Paicunataca:
—Prezu japishcacunataca ama caiman apamuichicchu, Mandac Diospac ñaupapica yallita millaita ruhuaccunamari ricurishun. Ñucanchic juchaca achcamari. Shina cacpipish, cancunaca ñucanchic mana allita ruhuashpa, juchata ruhuashcataca ashtahuanmi mirachinata munanguichic. Diosca yallitami israelcunahuanca piñarishca— nircacuna.
14Shina nicpimi, soldadocunaca prezu apamushcacunata cacharirca. Imallata quichumushcatapish mandaccunapac shinallatac tucui gentecunapac ñaupapi saquircacuna.
15Chai quipaca shutipi cayashpa churashca mandaccunami, prezu apamushcacunata pushashpa paicunapurapi maijan churana illaccunaman churachirca. Paicunamanca chaquipipish churachirca, cararca, ubiachirca, shinallatac chugricunata aceitehuan jambishpami, mana puric pudiccunataca burrocunapi montachishpa, palmera yuracuna tiyac Jericó pueblocaman, paicunapac huauquicunapacman pusharca. Chai quipaca Samaria pueblomanmi cutircacuna.
16Chai punzhacunapimi jatun mandac Acazca Asiria llactata jatun mandaccunata ayudac shamuchun nichun cacharca.
17Chaipica, edomitacunami cutin Judá llactaman shamushpa macashpa, prezu apashca carca.
18Chashnallatacmi filisteocunaca Judá llactapi cac Sefela pueblocunamanpish, Neguev llacta pueblocunamanpish shamushpa achca tucushpa causarcacuna. Shina causashpami, Bet-semes, Ajalón, Gederot, Soco, Timna, Gimzo pueblocunatapish, chai pueblo muyundi uchilla llactacunatapish quichushpa causacurca.
19Israel llactata jatun mandac Acaz mana allita ruhuashcamantami Mandac Diosca Judá llactapi causaccunataca pingaichishpa cumurichirca. Acazca Judá llactapica imatapish mana jarcarishpami, mana allita ruhuashpa, mana cazushpa, Mandac Diosta piñachirca.
20Asiriocunata jatun mandac Tiglat-pileserca ayudanapac randica macanacushpami, ashtahuan llaquichingapac shamurca.
21Acazca asiriocunata jatun mandacman cungapacmi Mandac Diospac huasimanta, mandana huasimanta, mandaccunapac huasimantapish imalla charishcacunata llucchishpa curca. Shina cushca jahuapish mana ayudarcachu.
22Ashtahuanpish jatun mandac Acazca chai huatacunapi yallita llaqui tucucushpapish, Mandac Diosta llaquichishpami ashtahuan juchata ruhuarca.
23Paica, paita llaquipi churashca Damasco pueblopi tiyac dioscunallamanmi animalcunata cushpa huañuchirca. Paica: «Siria llactata jatun mandaccunapac dioscunaca paicunataca ayudarcami. Ñucatapish ayudachun animalcunata paicunaman cushpa huañuchisha» nishpami shina ruhuarca. Ashtahuanpish chai dioscunallatacmi paitapish, tucui israelcunatapish yalli llaquipi churarca.
24Chashna ruhuashca jahuami Acazca Diospac huasipi imalla tiyashcacunata tandachishpa paquirca. Mandac Diospac huasi pungutapish huichcarca. Jerusalén tucui muyundipipish altarcunatami ruhuarca.
25Judá llacta tucui pueblocunapipish shuctac dioscunaman inciensota rupachingapacmi altarcunata lomacunapi ruhuarca. Chashna ruhuashpami, paipac ñaupa taitacunata Mandac Diostaca yallita piñachirca.
26Acaz tucui imata ruhuashcacunapish, punta punzhacuna, quipa punzhacuna imacunallata ruhuashcacunapish Judá llactata, Israel llactata jatun mandaccuna imata ruhuashcacunata quillcashcapimi tiyacun.
27Acaz huañushpa, paipac ñaupa taitacunahuan tandanacugricpica, Jerusalén pueblopimi enterrarca. Ashtahuanpish Israel llactata jatun mandaccunata enterrashcapica mana enterrarcachu. Paipac randica, paipac churi Ezequiasmi mandai callarirca.
Who We AreWhat We EelieveWhat We Do
2025 by iamachristian.org,Inc All rights reserved.
