ESTER 7 - Biblia Quichua Cañar 2010

Amán huañushcamanta

1Jatun mandac Ester ruhuashca jatun micuimanmi jatun mandacca Amanhuan rirca.

2Cayandi punzha vinota ubiashpa tiyacushpami, jatun mandacca Estertaca:

—Jatun mandac Ester, ¿imatatac mañasha ningui? Can mañacpica, ñuca mandacuc llactamanta chaupitapish cushallami— nirca.

3Shina tapucpimi, jatun mandac Esterca:

—Jatun mandaclla, can jatun mandacpac ñaupapi alli ricurishca cacpi, can jatun mandacman alli cana cacpica, ñuca mañashcata uyashpa ñucata ama huañuchichun jarcayari. Ñuca mañashcamanta ñuca llacta gentecunatapish huañuchinata jarcayari.

4Ñucatapish, ñuca llacta gentecunatapish huañuchishpa tucui tucuchichun catushcami canchic. Servic caricuna, huarmicuna cachun catushca cacpica, mana imata nishpa upallami caiman carcani. Ashtahuanpish tucui ñucanchicta huañuchicpica, can jatun mandacmanca yalli llaquimi canga— nirca.

5Shina nicpimi, jatun mandac Asueroca jatun mandac Estertaca:

—¿Pitac chaita ruhuanata yuyarishcayari? ¿Chai runaca maipitac?— nishpa tapurca.

6Shina tapucpi Esterca:

—Chai ñucanchicta mana ricunayachishpa piñac runaca cai millai Amanmi— nirca.

Shina nicpimi, Amanca jatun mandacpac, jatun mandac huarmipac ñaupapi yallita mancharishpa upayashpa saquirirca.

7Jatun mandacca nina japiric shina piñarishpami vinota ubianata saquishpa mandashpa tiyana huasi lado huertaman rirca. Jatun mandacca Amanta huañuchinalaya tucucpimi, Amanca paita ama huañuchichun jatun mandac Esterman mañangapac saquirirca.

8Mandashpa tiyana huasi lado huertamanta jatun mandac ucuman yaicushpaca Amantaca mandac Ester tiyacuc cama jahuapi siricuctami ricurca. Chaita ricushpami Amantaca:

—¿Jatun mandac huarmitapish ñuca huasillapitacchu japirisha ningui?— nirca.

Jatun mandac chashna nicpimi Amanpac ñahuita taparca.

9Shina tapashpami jatun mandacta servicpuramanta Harbona eunuco runaca:

—Riqui, Amanpac huasipimi Mardoqueota huarcushpa sipingapac Amán ruhuashca ishcai chunga ishcai metro chaupi altota shayachishca caspi shayacun. Mardoqueoca can jatun mandacta shuccuna huañuchigricushcata huillarcami— nirca.

Shina nicpimi, jatun mandacca:

—Amantaca chaillapitac huarcugrichic— nishpa mandarca.

10Shina mandacpimi, Amantaca Mardoqueota sipingapac paillatac shayachichishca caspipi huarcurca. Chashna ruhuacpimi jatun mandacca yallita piñarishcata pasachirca.