DANIEL 9 - Biblia Quichua Cañar 2010

Daniel israelcunamanta Diosta mañashcamanta

1Media llactamanta Asueropac churi Darío caldeo llactata shuc huatata mandacucpimi,

2Daniel ñucaca ima horascaman Jerusalén shitashca saquirinamanta Dios ima nishcata huillac Jeremiasman Mandac Dios huillashpa, quillcashca libropi rezarcani. Canchis chunga huatata chashna shitashca saquirinatami huillacurca.

3Chaimantami Mandac Diospacman cutirishpa, ayunashpa, sharpa churanata churarishpa, uchupata tallirishpa, paita yallita mañarcani.

4Ñucata Mandac Diosta mañashpami, paiman juchacunata huillashpaca: “¡Mandac Dioslla, canca manchana jatun Diosmi cangui! Canta cuyaccunahuan, can mandashcacunata pactachiccunahuan ari nishcata pactachicmi cangui.

5Ñucanchicca juchallishcanchicmi, millaita ruhuashcanchicmi, canta mana cazushpa cariyashcanchicmi. Mandashcacunatapish, mandashpa quillcashcacunatapish saquishcanchicmi.

6Canta servic, can ima nishcata huillaccuna cambac shutipi ñucanchic jatun mandaccunata, caishuc mandaccunata, ñaupa taitacunata, tucui israelcunata rimashcata mana cazushcanchicchu.

7Mandac Dioslla, canca cashcata ruhuacmi cangui. Ñucanchicca cunan punzhapi shina pingaichishca cangapacllami canchic. Judá llactapi, Jerusalenpi, cuchullapi causac, carupi causac tucui israelcunapish, canta mana cazushcamanta tucui cai pachata catishpa cachashcacunapish chashnami tucushun.

8Canta mana cazushpa juchallishcamantami ñucanchicpish, ñucanchic jatun mandaccunapish, caishuc mandaccunapish, ñaupa taitacunapish pingaichishca cashun.

9Ñucanchic canta mana cazucpipish, canca llaquishpa juchacunata perdonacmi cangui.

10Mandac Dioslla, can mandashca shina causangapacmi, can ima nishcata huillac canta servic canmanta huillacpica, mana cazushcanchic.

11Tucui israelcunami can mandashcata mana cazushcanchicchu, cambac rimashcata mana uyashcanchicchu, juchallishcanchicmi. Chaimantami cai llaquicunapish, canta servic Moisés mandashpa ari nishcapish ñucanchicta llaquichicun.

12Canca cambac shimihuan ñucanchictapish, ñucanchicta mandaccunatapish llaquichishami nishcataca pactachishcanguimi. Jerusalenta llaquichishca shinaca, cai pachapica jaicapi mana tiyashcachu.

13Moisés mandashpa quillcachishca shinaca, cai tucui llaquicuna ñucanchicta japicpipish Mandac Diosta mana mañashcanchicchu. Cashcata nic rimashcatapish mana uyashcanchicchu. Millaita ruhuanatapish mana saquishcanchicchu.

14Chaimanta Mandac Dioslla, llaquichinata yuyarishpa ñucanchicta llaquichishcangui. Ñucanchicta Mandac Dios canca imata ruhuashpapish cashcata ruhuacmi cangui. Shina cacpipish, ñucanchicca mana cazushcanchicchu.

15Mandac Dioslla, cunan punzhapi ricushca shinallatac cambac acllashcacuna alli nishca cachunmi, cambac poderhuan Egiptomanta llucchircangui. Chashna llucchimucpipish, juchallishpami millaillata ruhuashcanchic.

16Mandac Dioslla, cashcata ruhuac cashca shinallatac Jerusalenmanta, cambaclla chicanyachishca urcumanta cambac nina japiric shina yallita piñarishcata anchuchiyari. Ñucanchic juchacunamanta, ñucanchic taitacuna millaita ruhuashcamantami ñucanchic muyundipi causaccunaca Jerusalentapish, can acllashcacunatapish burlashpa rimancuna.

17Mandac Dioslla, cunanca can cuyac cashcamanta canta servic mañashcata uyaiyari. Mandac Dioslla, shitashca siricuc cambaclla huasita ricushpa achicyachiyari.

18Mandac Dioslla, cambac ringrihuan ñuca mañashcata uyaiyari. Cambac ñahuihuan ñucanchic causanatapish, cambac shutita mañana pueblotapish ricuiyari. Ñucanchicca mana cashcata ruhuac cashcamantachu, chashna cutinpish, cutinpish mañacunchic, ashtahuanpish can yallita llaquic cashcamantami chashna mañacunchic.

19¡Mandac Dioslla, uyaiyari! ¡Dioslla, cambac shutipimi can acllashca pueblomanta, can acllashcacunamanta mañacunchic! ¡Ama unayaichuyari!” nishpami mañarcani.

Canchis chunga semanamanta huillashcamanta

20Ñucaca, ñucata Mandac Diospac ñaupapi ñuca juchacunata, israelcunapac juchacunata huillashpa, Diospaclla urcumanta mañacurcanimi.

21Chashna mañacucpimi, utca muscuipi shina ricushca ángel Gabrielca jahuata volashpa ñucapacman shamurca. Chaica animalta Diosman cushpa rupachina horasmi carca.

22Pai ñucahuan parlashpaca: “Cunanmi canta yachachishpa entendichingapac shamurcani.

23Can mañai callaricllapitacmi Diosca uyarca. Canca yallita cuyashcami cangui. Chaimantami canta yachachingapac shamurcani. Cunanca can muscuipi shina ricushca imata nisha nicushcata yachangapac ñucata uyai.

24Israelcunapacpish,

Diospac acllashcacunapacpishmi

canchis chunga semanacunata

chicanyachishca tiyacun.

Chai semanacunapimi

mana cazunatapish,

juchata ruhuanatapish saquinga.

Shinallatac chai

semanacunallapitacmi

mana allita ruhuashcatapish

pichanga, huiñaita cashcata ruhuanga.

Muscuipi shina ricushcatapish,

Dios huillachishcatapish sellanga.

Shinallatac Diospac caccunata

aceitehuan cahuishpa ashtahuan

Diospacllata ruhuanga.

25Shinallatac caitapish

allita uyashpa entendiyari.

Chaica Jerusalenta allichichun

mandashca punzhamanta

Dios cachashca Quishpichic

shamungacamanca canchis semana,

canchis chunga ishcai semanami

tucunga.

Canzha pambatapish,

llacta muyundi pircacunatapish

llaqui punzhacunapimi allichinga.

26Sucta chunga semana quipa Dios

cachashca quishpichicta

huañuchicpica, imata mana charic

saquiringachu.

Shuctac jatun mandacpac gentecuna

shamushpami, Jerusalentapish,

Diospaclla chicanyachishca

ucutapish tucui tucuchinga.

Yacu jundashpa shamuc shinami

tucuchinga.

Jatun macanacuita tucuchingacaman

llaquichinami tiyacunga.

27Shuc semanapimi achca

gentecunahuan ari ninacunga.

Cutin chaupi semanapimi

Diosman animalta cushpa

huañuchinatapish,

Diosman ofrendata cunatapish

anchuchinga.

Chai quipaca yallita millana

tucuchicmi tucurina punzhacaman

llaquichingapac shamunga.

Dios llaquichina nishca

punzhacamanmi llaquichishpa

tucuchinga” nirca.