1Mandac Diosca: «Judá llactata jatun mandacpac huasiman rishpa, caita huillai.
2Paitaca: “Davidpac jatun tiyarinapi tiyarishpa, mandacuc jatun mandaclla, canpish, canta serviccunapish, cai punguta yaicuc gentecunapish Mandac Dios rimashcata uyaichic.
3Mandac Diosca: Imatapish allita, cashcata ruhuachic. Llaquihuan causac runata llaquichic runapac maquimanta cacharichichic. Shuctac llacta runacunatapish, taita mama illac huahuacunatapish, viudacunatapish ama llaquichichicchu. Mana faltayuc runata huañuchishpa, ama yahuarta jichaichicchu.
4Ñuca mandashcacunata cazucpica, David mandashpa tiyarinapica jatun mandaccunaca mana illangachu. Mandana huasimanca yaicuna pungutami carretacunapi, caballocunapi yaicunga. Chashnami paicunapish, paicunata serviccunapish, paicunapac gentecunapish yaicunga.
5Ashtahuanpish cai mandashcacunata mana cazucpica, cai huasitaca shitashca pamba shinatami saquisha. Chaitaca Mandac Diosca ñucami ari nini” ninmi ningui» nirca.
6Mandac Diosca Judá llactata jatun mandacpac aillutaca:
«Canca Galaad urcu shina,
Líbano urcu pamba shinami cangui.
Shina cacpipish, pipish mana causana
shitashca pambatami saquisha.
7Canta tucuchichunca
runacunatami hachahuan cachasha.
Paicunami cambac ashtahuan
alli cedro yuracunataca
pitishpa rupachinga.
8Achca gentecuna cai llactata pasashpa, caishuc chaishuc tapunacushpaca: “¿Cai jatun llactataca imamantatac Mandac Diosca chashna llaquichirca?” ningacunami.
9Shina nicpica: “Caipi causaccuna Mandac Dios-huan ari nishcata saquishpa, shuctac dioscunata servishpa, alli nishcamantami chashna tucushca” ningacuna» nirca.
10Jatun mandac Josiasmantaca
ama huacaichicchu.
Pai huañushcamantaca
ama llaquirichicchu.
Ashtahuanpish shuctac llactaman
prezu apacpi, pai huacharishca
llactaman jaicapi mana cutina
cashcamantami huacana canguichic.
11Josiaspac churi Judá llactata mandac Salumca paipac taita Josías huañucpimi, paipac randi mandarca. Mandac Diosca cai llactamanta apashca Salummanta rimashpaca: «Paica ashtahuan mana caimanca cutimungachu,
12ashtahuanpish paita prezu apashca llactapi huañushpami, cai llactataca mana cutinca ricunga.
Joacim ima tucunamanta13¡Aij, shuhuashpa,
sumac huasita ruhuac runalla!
¡Paica paipac ricsishca runata
yanga trabajachishpami,
imata mana pagan!
14Maijanpish: “Ñucamanca
jatun ucucunayuc huasita
shayachisha.
Jatun ventanacunata churashpami,
ucucunataca cedro tablacunahuan
ruhuashpa, pucahuan pintasha”
ningami.
15¿Cedro caspicunamanta
huasita ruhuashpallachu,
jatun mandacmi cani nishpa yuyangui?
Cambac taitaca, ¿manachu allita,
cashcata ruhuashpa mandashpaca
alli micushpa, ubiashpa causarca?
¿Manachu paica alli causarca?
16Paica llaquilla causaccunamanpish,
huacchacunamanpish
allita mandashpami alli causarca.
Ñucata ricsishcamantami
chashnaca causan.
17Shina cacpipish, cambac ñahuipish,
cambac shungupish
shuccunata llaquichishpa,
yallita chayucyanallatami munan.
Shinallatac mana faltayuc runata
yahuarta jichanallata,
llaquichinallata, millaita
ruhuanallatami munan. Chaitaca
Mandac Dios ñucami nini» ninmi.
18Chaimanta Mandac Dios Josiaspac churi Judá llactata jatun mandac Joacimmanta rimashpaca:
«Pai huañucpica, pipish:
“¡Aij, ñuca huauquilla,
ñuca panilla!” nishpaca,
mana huacangachu.
Shinallatac: “¡Aij, ñuca amolla,
aij, ñuca jatun mandaclla!”
nishpapish, mana llaquiringachu.
19Aisashpa apashpami,
Jerusalén pungumantaca
canzhaman shitanga.
Burro huañushcata shinami
jutcupi enterranga.
Jerusalén ima tucunamanta20Cambac tucui cuyashcacunaca
tucurishcami.
Chaimanta cunanca Líbano urcuman,
Basán urcuman huichai rishpa,
Abarim urcucunamanta sinchita capari.
21Ñuca can alli causacucpi,
rimacpi canca:
“¡Manatac uyashachu!” nircanguimi.
Canca chashnami huambramanta
pacha ñuca rimashcata manatac
uyasha nishpa causarcangui.
22Cambac michiccunataca
huairami apanga.
Cambac cuyashcacunataca
prezumi apanga.
Shina tucucpica,
can mana allita ruhuashpa
causashcamantaca yallita
pingaichishca, llaquichishcami cangui.
23Líbano urcu caspicunahuan
shayachishca huasipimi,
cedro caspicunapi cuzhata
ruhuac shina causarcangui.
¡Canta yalli llaqui japicpica,
shuc huarmi sajuarina nanaihuan
caparic shinami caparingui!» ninmi.
24Mandac Diosca: «¡Ñuca shutipimi nini: Joacimpac churi Judá llactata jatun mandac Conías can ñuca alli lado maquipi sortejas shina cacpipish, chaimanta llucchimanmi!
25Shina llucchishpaca can manchana, canta huañuchinata munaccunapac, Babilonia llactata jatun mandac Nabucodonosorpac, caldeocunapac maquipimi cantaca churasha.
26Cantapish, canta sajuaric mamatapish cancuna mana huacharishca shuctac llactaman prezu apachunmi saquisha. Cancunaca chaipimi huañunguichic.
27Quiquin llactaman cutinata tucui shunguhuan munashpapish manatac cutimui pudinguichicchu.
28¿Coniasca pipish
mana ricusha nishca,
allpamanga paquirishca shinachu?
¿Pipish mana munashca
allpa plato shinachu?
¿Ima nishpatac paipish,
paipac huahua huahuacunapish
mana ricsishca llactaman
llucchishpa cachashca cancuna?
29¡Cai pacha llactacuna, Mandac Dios
rimashcata uyaichicyari!» ninmi.
30Mandac Diosca:
«Cai runa ima tucunata quillcaichic.
Paica, paipac tucui causaipimi
shuc huahuallatapish mana charinga.
Paica mana alli causangachu.
Paipac huahua huahuacunamantaca
pipish David mandashpa tiyarinapica
mana tiyaringachu.
Judá llactatapish
mana mandangachu» ninmi.
Who We AreWhat We EelieveWhat We Do
2025 by iamachristian.org,Inc All rights reserved.
