1Mardoqueoca tucui chaicunata yachashpami, paipac churanata lliquishpa sharpa churanata churarishpa, uchupahuan cahuirishpa, yallita llaquirishpa, caparishpa huacashpa pueblopi puricurca.
2Chashnami Mardoqueoca jatun mandacpac pungucaman shamurca. Jatun mandacpac ucumanca sharpa churanata churarishcaca mana yaicunachu carca.
3Jatun mandac imata ruhuachun nishpa quillcashca tucui llactacunaman chayacpimi, Judá llacta gentecunaca yallita llaquirishpa, mana micushpa, yallita huacarcacuna. Achcacunami sharpa churanata churarishpa, uchupata mandashpa siricurcacuna.
4Esterta servic carihuan manarac chayarishca solteracunapish, paita cuidac eunuco runacunapish chaipi ima tucucushcatami shamushpa huillarcacuna. Shina huillacpimi, jatun mandac Esterca yallita llaquirishpa, Mardoqueo sharpa churanata llucchichishpa, allita churachichun cacharca. Ashtahuanpish Mardoqueoca mana uyarcachu.
5Chaimantami Esterca, paita servichun jatun mandac churashca eunucopuramanta Hatacta cayarca. Chai runatami Esterca imamanta Mardoqueo chashna puricushcata tapuchun cacharca.
6Shina cachacpimi, Hatacca jatun mandacpac huasi chimbapurapi cac plazapi Mardoqueo tiyacucpi tapungapac rirca.
7Chaipimi, Mardoqueoca ima tucushcatapish, shinallatac Amán, Judá llacta gentecunata tucuchingapac, jatun mandacpac huacaichinapi huacaichichun cullquita pezashpa cusha nishcatapish huillarca.
8Shinallatac Judá gentecunata tucuchichun Susa pueblopi quillcashpa tucuiman cushca copiatapish Esterman cushpa huillachunmi curca. Shinallatac Ester, jatun mandacpacman rishpa paipac llacta gentecunata ama huañuchichun, parlachunmi mañarca.
9Hatac cutimushpaca, Mardoqueo nishcatami tucui Esterman huillarca.
10Shina huillacpimi, Esterca Hatactaca Mardoqueopacman cutin rishpa:
11«Maijan cari cashpa, huarmi cashpa, jatun mandac manapish cayacpi jatun mandacta ricungapac ucuman yaicucpica, huañunami can nishpa mandashcami tiyan. Mana cashpaca, jatun mandac paipac curi varata ñaupaman chutashpa ricuchicpimi mana huañunga. Chaitaca jatun mandacta serviccunapish, jatun mandac mandacuc tucui llactacunapi causaccunapish yachanmi. Ñuca, pai jatun mandacta ricungapacca cai quillaca mana cayashcachu cani» nichunmi cacharca.
12Ester ima nishcata Mardoqueoman huillacpica,
13Paica Estertaca: «Jatun mandacpac huasipi cashpaca Judá llacta gentecuna shina mana huañushachu nishpa pacta yuyacunguiman.
14Can ñucanchicmanta cunan punzhacunapi imata mana ruhuashpa, upalla saquiricpica, maijan shucmi Judá llactapi causaccunataca quishpichinga. Shina cacpipish canca cambac taitapac huasi ucupurandimi huañunguichic. Canca cai llaquimanta ñucanchicta quishpichingapac jatun mandac tucushcataca ¿pitac yachanyari?» nichunmi cacharca.
15Shina nicpimi, Esterca Mardoqueomanca:
16«Cai Susa pueblopi causac Judá gentecunata tandachic. Shina tandanacushpa ñucamanta quimsa punzha, quimsa tutata mana micushpa mana ubiashpa ayunaichic. Ñucapish, ñucata servic carihuan manarac chayarishca solteracunapish chashnallatacmi ruhuashun. Chai quipami jatun mandac-huan parlangapac rigrini. Mandashcapi chaiman mana yaicunachu nicuchunpish, ñucata huañuchina cacpipish rigrinimi» nichunmi cacharca.
17Shina nicpimi, Mardoqueo rishpaca, Ester mandashca shinallatac tucui ruhuarca.
Who We AreWhat We EelieveWhat We Do
2025 by iamachristian.org,Inc All rights reserved.
