1Jatun mandac Ezequías chaita uyashpaca, paipac churanata lliquishpami, sharpa churanata churarishpa, Mandac Diospac huasiman yaicurca.
2Chai quipami mayordomo Eliaquimtapish, quillcac Sebnatapish, curacunata mandac runacunatapish sharpa churanata churachishpa Dios ima nishcata huillac Amozpac churi Isaiaspacman cacharca.
3Paicuna chaiman chayashpaca: «Ezequiasca: “Cunan punzhaca pingaichishca, rimai tucushca, jatun llaqui punzhapimi canchic. Huahuata shuc huarmi ña sajuarigricushpa fuerza illac saquiric shinami canchic.
4Asiria llactata jatun mandacmi canta mandac causac Diosta mana alli nishpa rimachun shuc mandacta cachashca. Chashna rimashcataca Mandac Diosca uyashcami. Chaimanta caipi saquirishcacunamanta Diosta mañai” ninmi ninguichic» nishpa cacharca.
5Jatun mandac Ezequiasta serviccuna Isaiaspacman chayacpimi,
6Paica: «Cancunata mandactaca: “Mandac Diosca: ‘Asiria llactata mandacta serviccuna mana alli nishpa rimashcata uyashpaca ama manchaichu.
7Ñucami paipi shuc espirituta churagrini. Chashna churacpica yalli manchanacunata uyashpami, paipac llactaman cutinga. Chaipimi paitaca espadahuan huañuchichun saquisha’ ninmi” ninguichic» nirca.
8Mandac Rabsaces cutimushpaca, Asiria llactata jatun mandac Laquis pueblomanta rishcatami yachac chayarca. Chaimanta rishpaca Libna pueblopi causaccunahuan jatun mandac macanacucuctami ricurca.
9Shinallatac Asiria llacta jatun mandacca, Etiopía llactata jatun mandac Tirhaca paihuan macanacungapac shamushcatami yacharca.
Chaimanta paica cutin Ezequiaspacman huillaccunata cachashpaca:
10«Judá llactata jatun mandac Ezequiastaca: “Can shunguta churashca Diosca: ‘Jerusalentaca Asiria llactata jatun mandacpac maquipica mana churashachu’ nishpa, llullachunca ama saquichu.
11Asiria llactata jatun mandaccuna tucui llactacunata ima shina tucuchishcataca canllatac uyashcanguimi. ¿Shina cacpica, canca quishpirigringuichu?
12Ñuca ñaupa taitacunaca Gozán, Harán, Resef pueblocunapi causaccunatapish, Edén llacta Telasar pueblopi causaccunatapish tucuchircami. ¿Shina ruhuacucpica cambac dioscunaca ayudarcachu?
13¿Maipitac Hamat pueblota, Arfad pueblota, Sefarvaim, Hena, Iva pueblocunata jatun mandaccunapish?” nishpa tapunguichic» nirca.
14Ezequiasca jatun mandac cachashca huillaccuna aparishca quillcashcataca rezarcami. Chai quipaca Mandac Diospac huasiman rishpami, chai quillcashcata Mandac Diospac ñaupapi pascashpa churarca.
15Chaimanta Ezequías Mandac Diospac ñaupapi mañashpaca: «Israelcunata Mandac Dioslla, querubincunapac chaupipimi causacungui. Canllami cai pachapi tiyac tucui jatun mandaccunapac Dios cangui. Canllatacmi jahua pachatapish, cai pachatapish ruhuarcangui.
16Mandac Dioslla, cambac ringrihuan uyaiyari, cambac ñahuihuan ricuiyari. Senaquerib nichun cachashcacunata uyaiyari. Paica causac Diosta mana alli nichunmi cachashca.
17Mandac Dioslla, ari, Asiria llactata jatun mandaccunaca caishuc jatun llactacunataca paicunapac llactacunandimi tucuchirca.
18Paicunapac dioscunatapish ninapi shitashpami tucuchirca. Chaicunaca mana dioscunachu carca. Ashtahuanpish runacuna caspimanta, rumimanta maquihuan ruhuashcallami carca.
19Cunanca Mandac Dioslla, cai pacha llactacunata jatun mandaccuna canlla Dios cashcata yachachun ñucanchicta chai jatun mandaccunapac maquimanta quishpichiyari» nishpami mañarca.
20Chaimanta Amozpac churi Isaías Ezequiasman huillachun cachashpaca: «Israelcunata Mandac Diosca: “Asiria llactata jatun mandac Senaqueribmanta mañashcataca uyarcanimi” ninmi.
21Chai jatun mandacmanta Mandac Dios rimashpaca:
“Sión pueblopi causaccunaca,
carihuan manarac chayarinacushca
soltera shinami, burlashpa asincuna.
Jerusalén pueblopi causaccunaca
can cutiricpica,
umata cuyuchishpami asincuna.
22¿Pitatac mana alli nishpa
rimarcangui?
¿Pitatac jatun tucushpa
caparircangui?
¡Israelcunapac jucha illac
Diostamari rimarcangui!
23Cambac huillaccunata cachashpami,
Mandac Diosta mana alli nishpa
rimashcangui.
Canca: ‘Ñucapac achca
carretacunahuanmi urcu puntacunaman,
Líbano urcu lomacunaman rircani.
Jatun cedro yuracunata,
ashtahuan alaja ciprés
yuracunatami pitisha.
Ashtahuan carupimi tiyacusha.
Ashtahuan sumac pangasapa
yuracuna ucupimi tiyacusha.
24Shuctac llactacunapimi
yacu junducunata ruhuarcani.
Chai yacucunatami ubiarcani.
Ñuca chaquihuan sarushpami,
Egipto llactata callpacuc
yacucunata chaquichircani.
25Ñaupa huatacunamanta pachami
caitaca ruhuarcani.
Utcumanta pachami chaita ruhuangapac
allichishpa shamuni.
Chaitami cunanca ruhuani.
Chaimantami canca muyundi
pircashca pueblocunata tuñishpa
montón, montonta ruhuangui
¿Caitaca manachu yacharcangui?
26Chaipi causaccunaca,
mana pudishpami manchaihuan,
pingaihuan cancuna.
Pambapi huiñashca,
verdinlla llullu quihua shinami.
Huasi jahuapi huiñashca quihua
manarac pucushpa chaquishca shinami.
27Can ima shina cashcata,
can imata ruhuacushcata,
ñucahuan yallita piñarishcatapish
tucuimi yachani.
28Canca, ñucahuan piñarishpami,
ñuca ringriman uyaricta,
jatun tucushpa rimarircangui.
Cunanca argollata singapi churashpa,
frenota shimipi churashpami
cantaca maita shamushcallatatac
cutichishpa cachasha’ nirca.
29Ima tucuna cashcata Isaías,
Ezequiasman ricuchishpaca:
Cai huatapish, quipa huatapish
paillatac huiñashca granotami
micunguichic.
Ña quimsa huata tucucpica,
cancuna tarpushca granotami
cosechanguichic.
Uvastapish tarpushpami,
chai chagramanta micunguichic.
30Judá llactapuramanta, mana
huañushpa saquirishca gentecunaca,
allpapi sapi saquirishca shina,
huiñashpa, pucuc shinami canga.
31Jerusalenmantaca,
maijanpish puchushcami llucshinga.
Sión urcumantaca mana huañushpa
quishpirishcacunami llucshinga.
¡Tucuita Mandac Diosmi,
yallita juchallishcamanta
chashna ruhuanga!
32Chaimantami Mandac Diosca,
Asiria llactata jatun mandactaca:
Cai pueblomanca mana yaicungachu,
flechacunatapish mana shitangachu.
Macanacuna escudota apashpa,
cai pueblo ñaupapi shayarinatapish
mana pudingachu.
Baluarte nishcatapish
mana shayachi pudingachu.
33Maita shamushcallatatacmi cutinga.
Cai pueblomanca manatac yaicungachu.
Mandac Dios ñucami chashna nini.
34Ñucami cai pueblotaca
cuidashpa quishpichisha.
Ñuca shutita ricsichingapac,
ñucata servic Davidta
cuyashcamantami chashnaca ruhuasha”
ninmi» nishpa cacharca.
35Chai tutallatacmi Mandac Diospac angelca asiriocunapac carpacunaman rishpa, patsac pusac chunga pichca huaranga soldadocunata huañuchirca. Cayandi tutamanta jatarishpaca, tucui huañushca siricuctami ricurca.
36Chaimantami Asiria llactata jatun mandac Senaqueribca Nínive puebloman cutishpa, chaipi saquirirca.
37Senaquerib paipac dios Nisrocpac huasiman rishpa, chaipi alli nicucpimi, paipac churicuna Adramelec, Sarezer espadahuan huañuchirca. Shina huañuchishpaca, Ararat llactamanmi miticushpa rircacuna. Paipac churi Esar-hadonmi paipac randi mandarca.
Who We AreWhat We EelieveWhat We Do
2025 by iamachristian.org,Inc All rights reserved.
