NEHEMÍAS 10 - Biblia Quichua Cañar 2010

1Paicunapac shuticunata quillcashpa firmaccunaca: Hacaliaspac churi mandac Nehemías, Sedequías,

2Seraías, Azarías, Jeremías,

3Pasur, Amarías, Malquías,

4Hatús, Sebanías, Maluc,

5Harim, Meremot, Obadías,

6Daniel, Ginetón, Baruc,

7Mesulam, Abías, Mijamín,

8Maazías, Bilgai, shinallatac Semaiasmi carca. Paicunaca curacunami carca.

9Levitacunapuramantaca: Azaniaspac churi Jesúa, Henadadpac huahua huahuapuramanta Binúi, shinallatac Cadmielmi carca.

10Paicunapac huauquicunapuramantaca: Sebanías, Hodías, Kelita, Pelaías, Hanán,

11Micaías, Rehob, Hasabías,

12Zacur, Serebías, Sebanías,

13Hodías, Bani shinallatac Beninumi carca.

14Mandacpuramantaca: Paros, Pahat-moab, Elam, Zatu, Bani,

15Buni, Azgad, Bebai,

16Adonías, Bigvai, Adín,

17Ater, Ezequías, Azur,

18Hodías, Hasum, Bezai,

19Harif, Anatot, Nebai,

20Magpías, Mesulam, Hezir,

21Mesezabeel, Sadoc, Jadúa,

22Pelatías, Hanán, Anaías,

23Oseas, Ananías, Hasub,

24Halohes, Pilha, Sobec,

25Rehum, Hasabna, Maasías,

26Ahías, Hanán, Anán,

27Maluc, Harim, shinallatac Baanami carca.

28Maijan gentecuna, curacuna, levitacuna, Diospac huasi pungupi cuidaccuna, cantaccuna, Diospac huasipi serviccuna shinallatac Dios mandashcata pactachingapac shuc llactapi causac gentecunamanta chicanyarishcacunapish, paicunapac huarmicunandi, ña yuyaita charic churicunandi, ushicunandimi tandanacurca.

29Dios mandashcata pactachingapac ari nishpami paicunapac huauquicunahuan, mandaccunahuan tandanacurca. Ñucanchicta Mandac Dios paita servic Moisesman imata ruhuachun nishpa mandashcacunata pactachichun cushca shimicunata cazushpa pactachingapacmi tandanacurca.

30Shinallatac ñucanchic ushicunata cai llacta ladopi causaccunapac churicunahuan, ñucanchic churicunatapish paicunapac ushicunahuan mana cazarachingapac.

31Chashnallatac samana punzhapi, Diospaclla chicanyachishca punzhapi shuc llacta gentecuna imacunata, granocunata, mana cashpaca ima shuctac micunacunata catungapac shamucpi, mana randingapac. Shinallatac canchis huata tucucpica, allpacunatapish samachingapac, debicunatapish perdonangapac.

32Shinallatac ñucanchic Diospac huasita imata ruhuachunpish chuscu gramosta pezac cullquita huatanta cungapacmi ari nircanchic.

33Diosman cuna tandapac, punzhanta cuna ofrendapac, Diosman animalta cushpa punzhanta rupachingapac, samana punzhacunapi, llullu quilla punzhacunapi, fiesta punzhacunapi cungapac. Shinallatac Diosman chicanyachishpa cungapac animalta israelcunapac juchamanta cushpa huañuchingapac, ñucanchic Diospac huasipi imata ruhuachun cungapacmi ñucanchicllatac ari nircanchic.

34Diospac huasiman curacunapish, levitacunapish, tucui israelcunapish, mandashcapi nishca shina, ñucanchic taitacunapac huasi ucupura ima shina cashca shina ñucanchic Mandac Diospac altarpi rupachingapac huatanta yantata apamungapacmi suerteta ruhuarcanchic.

35Ñucanchic allpapi punta pucushcacunatapish, tucui yuracunapi punta pucushcacunatapish Mandac Diosman huatanta apamungapac.

36Shinallatac mandashcapi nishca shina ñucanchic punta churicunatapish, punta huacharishca huagracunatapish ñucanchic Diospac huasiman apamungapacmi ari nircanchic. Punta huacharishca vacacunatapish, ovejacunatapish ñucanchic Diospac huasipi servic curacunamanmi apamushun nircanchic.

37Punta masashca tandata, tucui yuracunapi punta pucushca granota, punta ruhuashca vinota, aceiteta curacunaman, ñucanchic Diospac huasiman apamungapac. Ñucanchic allpapi pucushcacunataca chungamanta shucta levitacunaman apamungapacmi ari nircanchic. Ñucanchic allpapi pucushca granocunataca levitacunamanmi chungamanta shucta cungapac tucui pueblocunapi tandac carcanchic.

38Chungamanta shucta levitacuna japinacucpica, Aaronpac huahua huahuapuramanta shuc curami paicunahuan canga. Levitacuna chungamanta shucta japishcamantaca cutinmi chungamanta shucta chicanyachishpa, ñucanchic Diospac huasipi tiyac huacaichina ucupi huacaichinga.

39Chai huacaichina ucumanmi israelcunapish, levitacunapish cushca grano ofrendata, vinota, aceiteta apangacuna. Chai huasillapitacmi Diosta servic curacunapish, punguta cuidaccunapish, cantaccunapish causancuna. Chashna ruhuashpami, ñucanchic Diospac huasitaca mana saquishun nircanchic.