1Mandac Dios rimashpaca:
2«Allpamanta mangata ruhuac runapacman ri. Chaipimi canmanca huillasha» nirca.
3Shina nicpimi, ñucaca mangata ruhuac runapacman rircani. Chaiman chayacpica, chai runaca shuc rueda jahuapimi mangata ruhuacushca carca.
4Chaipimi chai allpamanta ruhuashca mangaca paipac maquillapitac dañarirca. Chashna cacpipish, cutinllatacmi pai munashca shina, shuc mangata ruhuarca.
5Chaimantami Mandac Diosca:
6«Israelcunalla, ¿manachu cancunatapish mangata ruhuac runa shina ruhuai pudini? Mangata ruhuac runapac maquipi, manga ruhuana allpa shinami cancunaca ñuca maquipica canguichic. Chaitaca Mandac Dios ñucami nini.
7Ñucaca cungaillami uchilla llactacunatapish, jatun llactacunatapish sapindi anchuchic shina, urmachishpa tucuchinata huillasha.
8Shina cacpipish, chai gentecuna mana allita ruhuanata saquishpa, ñucapacman cutiricpica, paicunata llaquichinata yuyarishcataca saquishami.
9Cungaillami uchilla llactacunatapish, jatun llactacunatapish tarpuc shina shayachinata huillasha.
10Ashtahuanpish ñuca rimashcata mana cazushpa, ñuca ñaupapi mana allita ruhuacpica, paicunaman allita ruhuanata yuyarishcataca saquishami.
11Chaimanta cunanca tucui Judá llactapi, Jerusalenpi causaccunataca: “Mandac Diosca: Cancunata piñashpa llaquichinatami yuyaricuni. Jatun llaquihuan ima shina llaquichinatapish ñami yuyaricuni. Chaimanta cada quiquin mana alli causaita saquishpa cutirichic. Cancunapac causaipipish, cancuna imata ruhuanapipish allita ruhuai callarichic” ninmi ningui.
12Ashtahuanpish paicunaca: “Ñucanchic dioscunatami catishun. Quiquin munashcatami ruhuashun. Ñucanchic shungu yuyashcatami ruhuashun. Ñucanchictaca mana jarcai pudinguichu, yangallami rimacungui” ningami» nirca.
13Chaimantami Mandac Diosca:
«Carihuan manarac chayarishca
soltera shina israelcuna
ruhuashcata shinata,
shuctac llactapi causaccuna
ruhuashcata tapuichicyari.
14Líbano urcu jahuamantaca,
¿rasu anchuringachu?
¿Caru llactamanta shamuc yacuca
chaquingachu?
15Ashtahuanpish ñuca acllashcacunaca
ñucata cungarishpami ruhuashcalla
dioscunaman inciensota rupachin.
Chashnami ñanta chingachishpa
mitcaric shina pandarin.
Shinallatac ancho ñancunata
saquishpami mana ricsishca
ñancunallata purin.
16Chashnami paicunapac llactaca
llaquinayaita tucuchicun.
Tucui causaipi yallita burlashpa
asina llactami tucunga.
Maijanpish chai llactata
pasacushpaca mancharishpa,
umata cuyuchishpami pasanga.
17Paicunataca inti llucshina
ladomanta huaira shamuc shinami,
paicunata piñaccunapac ñaupata
caita chaita cachasha.
Jatun llaqui punzhacunapica
paicunaman ñahuita ricuchinapac
randica, huashatami ricuchisha»
ninmi.
Huañuimanta quishpichichunJeremías Diosta mañashcamanta18Jeremías huillashcata uyashpaca: «Jeremiasta ima shina llaquichinata yuyaringapac shamuichic. Mandashcacunata yachachic curapish, cunacpish, alli yachac runapish, Dios ima nishcata huillacpish mana tucuringachu. Pai huillacushcamanta juchanchishpa llaquichishunchic. Pai huillashcataca ama uyashunchic» nirca.
19Chaimantami Jeremiasca:
«Mandac Dioslla, ñucata ricuiyari.
¡Ñucata rimacucta uyaiyari!
20Can yallita piñarishcata
pasachichun ñuca paicunamanta
mañashcataca yuyariyari.
Ashtahuanpish paicunaca
ñucata enterrana jutcutami allashca.
¿Allita ruhuashcamantaca,
mana allitachu ruhuana canga?
21Chaimanta paicunapac churicunata
yarcaipi, jatun macanacuipi
huañuchichun saquiyari.
Huarmicunatapish huahua illac,
cusa illac saquirichun, cusacunataca
jatun macanacuipi huañuchichun,
mosocunatapish espadahuan
chugrichichun saquiyari.
22Cungailla soldadocuna chayashpa
paicunata llaquichicpi, huasipi
yallita caparinacui uyarichun.
Paicunaca ñuca urmachunmi
jutcuta ruhuashca.
Ñuca purinapica mitcarina
tucllatami churashca.
23Mandac Dioslla,
paicuna ñucata huañuchingapac
yuyaricushcataca yachanguimi.
Paicunapac juchacunata
ama cungaringuichu.
Paicuna mana allita ruhuashcataca
ama perdonanguichu.
¡Paicuna cambac ñaupapi urmachun,
nina japiric shina piñariyari!
Who We AreWhat We EelieveWhat We Do
2025 by iamachristian.org,Inc All rights reserved.
