MARCOS 3 - Biblia Quichua Cañar 2010

Jesús maqui chaquishca runata alliyachishcamanta(Mt 12.9-14; Lc 6.6-11)

1Jesusca cutinllatacmi israelcuna tandanacuna huasiman yaicurca. Chaipimi shuc maqui chaquishca runa tiyacurca.

2Fariseocunaca Jesusta juchanchingaraicumi chai runata samana punzhapi allichicta ricuracurcacuna.

3Jesusca chai maqui chaquishca runataca:

—Jatari, caipi caccunapac chaupipi shayari— nirca.

4Jesús chaipi caccunata tapushpaca:

—¿Samana punzhapica allita ruhuanachu alli canga, mana cashpaca mana allita ruhuanachu alli canga? ¿Huañuimanta quishpichinachu alli canga, mana cashpaca huañuchinachu alli canga?— nirca.

Ashtahuanpish paicunaca upallami carcacuna.

5Chaimantami muyundipi caccunata ricushpa piñarirca. Jesusca paicuna sinchi shungu cashcamantami yallita llaquirishpa, chai maqui chaquishca runataca:

—Maquita chutai— nirca.

Chai runa maquita chutacpica, maquica alli tucurcallami.

6Fariseocunaca chai ucumanta llucshishpaca, mandac Herodespac runacunahuanmi Jesusta ima shina huañuchinata yuyarinacurca.

Jesús achca gentecunahuan cucha patapi cashcamanta

7Jesús paipac yachacuccunahuan cucha pataman ricpimi, Galilea llacta achca gentecuna paitaca catishpa rircacuna.

8Shinallatac Judea llactamantapish, Jerusalén pueblomantapish, Idumea llactamantapish, Jordán yacu chimba lado llactacunamantapish, Tiro, Sidón pueblocunamantapishmi achca gentecuna shamurca. Chai gentecunaca Jesús allicunatami ruhuacucta uyashpami shamurca.

9Chashna achca gentecuna shamushpa, ama ñitimuchunmi, Jesusca paipac yachacuccunataca canoata apamushpa charicuchun mandarca.

10Jesusca achca ungushcacunatami alliyachirca. Chaimantami ungushpa llaquilla causaccuna Jesuspi tuparingapac ñitirimurca.

11Millai supaicuna Jesusta ricushpa, paipac ñaupapi cungurishpaca:

—¡Canca Diospac Churimi cangui!— nishpa caparircacuna.

12Chaimantami Jesusca pai pi cashcata ama huillachun mandarca.

Jesús chunga ishcai apostolcunata acllashcamanta(Mt 10.1-4; Lc 6.12-16)

13Jesusca, pai acllasha nishca runacunallata cayashpami urcuman rirca. Chashna cayacpica shamurcacunami.

14Chunga ishcai runacunatami paihuan purichun, alli huillaita huillachun cachangapac acllarca.

15Paicunamanca supaicunata llucchichun, ungushcacunata alliyachichunmi poderta curca.

16Paicunaca: Simón, (Paitami Pedrota shutichirca).

17Zebedeopac churicuna Jacobopish, Juanpishmi carca. Paicunataca “Boanergesta” shutichirca. Chaica: “Rayo shina sinchi” nisha ninmi.

18Andrespish, Felipepish, Bartolomepish, Mateopish, Tomaspish, Alfeopac churi Jacobopish, Tadeopish, Celote nishca Simonpish,

19Judas Iscariotepishmi carca. Paimi quipamanca Jesustaca japichirca.

Jesusta “diablohuanmi cangui” nishcamanta(Mt 12.22-32; Lc 11.14-23; 12.10)

20Chaimantaca huasimanmi cutimurca. Cutinllatac huasipi achca gentecuna jundaricpimi, micunallatapish mana pudircacuna.

21Jesús chaipi cacpimi, paipac familiacunaca: «Yuyai illacmi tucushca» nishpa, pushangapac shamurca.

22Jerusalén pueblomanta mandashcacunata yachachiccuna shamushpaca: «Cai runaca supaicunata mandac Beelzebuhuan cashpami, supaicunataca llucchishpa cachan» nircami.

23Jesús paicunata cayashpa, yuyaita japina parlohuan parlashpaca:

—¡Maitatac Satanasca, Satanasllatatac llucchishpa cachangayari!

24Llactata mandaccunapura macanacucpica, chai llactaca chingaringami.

25Huasipi causaccuna paicunapura macanacucpica, chai huasica tucuringami.

26Satanaspura caita chaita mandacpica, paicuna mandanaca tucuringami.

27Shuc sinchi runapac huasiman shuhuangapac yaicugricushpaca huasiyuctami huatanman. Paita huatashpallami, imatapish shuhuai pudinman.

28Caica pactangatacmi: Diosca ima juchatapish, ima rimashcatapish perdonangami,

29ashtahuanpish jucha illac Espirituta piñashpa rimactaca manatac perdonangachu. Paica huiñaitami juchayuc canga— nirca.

30Paicuna: «Supai japishca runami cangui» nishcamantami, Jesusca chashna nirca.

Jesuspac mamamantapish, huauquicunamantapish(Mt 12.46-50; Lc 8.19-21)

31Chaicamanca Jesuspac mamapish, huauquicunapish shamushpami, canzhallamanta cayac cacharca.

32Jesuspac muyundipi tiyacuccunaca Jesustaca:

—Cambac mama, huauquicunami canzhapi canta mashcacun— nirca.

33Chashna nicpimi Jesusca:

—¿Pitac ñuca mama, ñuca huauquicunaca canga?— nirca.

34Muyundipi tiyaccunata ricuchishpaca:

—Caicunami ñuca mama, ñuca huauquicunaca.

35Maijanpish Dios munashcata ruhuacmi ñuca huauqui, ñuca pani, ñuca mamaca— nirca.