1Imerpac churi Pasur curami Mandac Diospac huasipi mandacushpa, Dios ima nishcata Jeremías huillashcata uyarca.
2Chaita uyashpami Jeremiasta macachishpa, Benjamín llacta ladoman llucshina jahua lado pungupi tiyac shuc caspi jutcucunapi chaquita canichishpa prezu churarca. Chai ñanllatatacmi Mandac Diospac huasimanpish rina carca.
3Chai cayandi punzhami Pasurca Jeremiastaca chaquita canichina jutcucunamanta llucchirca. Chashna llucchicpimi Jeremiasca: «Mandac Diosca cantaca mana Pasur ninchu. Ashtahuanpish Magor-misabibtami shutichishca.
4Mandac Diosca: “Riqui, cantapish, canhuan tucui apanacuccunatapish jatun mancharinatami ruhuagrini. Paicunata piñaccunami espadahuan huañuchinga. Chaitaca cambac ñahuihuanmi ricungui. Judá llactapi causaccunataca Babilonia llactata jatun mandacpac maquipimi churagrini. Paimi Babilonia llactaman prezu apashpa, espadahuan huañuchinga.
5Shinallatac cai llactapi causaccuna trabajashpa tucui imata charishcatapish, ima sumaccunatapish, Judá llactata jatun mandaccunapac ima valishcacunatapish, tucui charishcacunatapishmi paicunata piñaccunaman cusha. Chashna cucpimi, paicunaca Babilonia llactaman apanga.
6Can Pasurpish, cambac huasipi tucui causaccunapish Babilonia llactamanmi prezu ringuichic. Chaipimi canpish, can llullashpa huillashcata uyac, canhuan apanacuccunapish huañunguichic. Chaillapitacmi enterrashca canguichic” ninmi ningui» nirca.
Jeremías llaquirishcamanta7Mandac Dioslla, ñucataca
umashcanguimi.
Ñucaca can umashcami causacuni.
Ñucata yalli sinchi cashpami,
ñucata mishangui.
Tucuimi punzhanta burlashpa asincuna.
8Ñuca caparishpa huacashpaca:
«Yalli llaquichinallata,
tucurinallatami» huillacuni.
Mandac Dioslla, can rimashcata
huillacpica, punzhantami rimashpa,
pingaichishpa asincuna.
9Chaimantami ñucaca:
«Mandac Diosta mana ashtahuan
yuyarishachu, paipac shutitapish
mana ashtahuan huillashachu»
nishpa yuyarcani.
Shina cacpipish, cambac rimashcaca
ñuca shungupica nina shina
rupachishpami tullucaman chayan.
Chaimantami cambac rimashcata
ñuca shungullapi charicusha
nicushpapish mana pudini.
10Tucui ladocunapimi ñucata
huashalla rimashpaca:
«¡Manchaica tucui
llactacunapimi!
¡Chaitaca huillaichicyari,
huillashunchicyari!» nincuna.
Ñucahuan apanacuccunapish
ñuca pandaricta chapacuncunami.
Paicunaca: «Ima shinapish
umashpa, huañuchishpami mishashun.
Ñucanchicta ima shina,
llaquichishca shinallatacmi
llaquichishun» nincunami.
11Ashtahuanpish Mandac Diosca
sinchi macanacuc soldado shinami
ñucataca cuidan.
Chaimantami ñucata llaquichiccunaca
mitcaric shina pandarishpa
mana mishai pudinga.
Imapish mana alli llucshicpimi,
yallita pingai tucunga.
Paicuna pingai tucushcataca
jaicapi mana cungaringacunachu.
12Tucuita Mandac Dioslla,
cashcata ruhuaccunataca
ricuracunguimi.
Yuyaitapish, shungutapish
tucuitami ricungui.
Ñucata llaquichiccunataca
cambac maquipimi churani.
Ñucata llaquichishcamantaca
paicunatapish ñuca ricucucpi
llaquichiyari.
13Mandac Diosta cantaichicyari.
Mandac Diosta alli nichicyari.
Paimi huaccha runapac almataca
mana allita ruhuac runapac
maquimanta quishpichin.
14Ñuca huacharishca punzhaca
mana alli nishca cachun.
Ñuca mama, ñucata
sajuarishca punzhapish
mana alli nishca cachun.
15¡Ñuca taitata cushichishpa:
«Canmanca cari huahuatami
sajuarishca» nic runapish
mana alli nishca cachun!
16Chai runaca Mandac Dios
mana llaquishpa tucuchishca
llacta shina cachun.
Chai llactapica tutamantaca
llaquihuan caparishca uyarichun.
Chaupi punzhaca macanacuipi
caparishca uyarichun.
17Chaica, ¿ima nishpatac
ñuca mamapac huicsallapitac
mana huañuchun saquirca?
Chaipi huañushca cashpaca,
paipac huicsallapitacmi
enterrashca caiman carcani.
Ñucaca paipac huicsamantaca
jaicapi mana llucshimanchu carcani.
18Paipac huicsamantaca,
¿imapactac llucshircani?
¿Mana alli nishpa rimashcata,
yalli llaquita, huacaita ricungapac,
yallita pingaichishca cangapacchu
huacharircani?
Who We AreWhat We EelieveWhat We Do
2025 by iamachristian.org,Inc All rights reserved.
