ESDRAS 7 - Biblia Quichua Cañar 2010

Esdras Jerusalenman cutimushcamanta

1Jatun mandac Artajerjes, Persia llactata mandacui punzhacunami Seraiaspac churi Esdras curaca Babilonia llactamanta chayamurca. Seraiasca Azariaspac churi, Azariasca Hilciaspac churi

2Hilciasca Salumpac churi, Salumca Sadocpac churi, Sadocca Ahitobpac churi,

3Ahitobca Amariaspac churi, Amariasca Azariaspac churi, Azariasca Meraiotpac churi,

4Meraiotca Zeraiaspac churi, Zeraiasca Uzipac churi, Uzica Buquipac churi,

5Buquica Abisuapac churi, Abisuaca Fineespac churi, Fineesca Eleazarpac, Eleazarca Aaronpac churimi carca. Aaronca punta curami carca.

6Esdrasca israelcunata Mandac Dios Moisesman cushca mandashcata allita yachacmi carca. Jatun mandac Artajerjesca Esdras Mandac Diospac poderhuan cacpimi, pai ima mañashcata cuc carca.

7Jatun mandac Artajerjes canchis huatata mandacucpimi, maijan israelcunapish, curacunapish, levitacunapish, cantaccunapish, pungupi cuidaccunapish, Diospac huasipi servishpa causaccunapish paihuan Jerusalenman cutircacuna.

8Jatun mandac Artajerjes canchis huata pichca quillata mandacucpimi, Esdrasca Jerusalenman chayamurca.

9Paicunaca callari quilla, callari punzhapimi Babiloniamanta llucshircacuna. Chai huata, pichca quilla callari punzhapimi Esdrasca Jerusalenman chayamurca. Diospac maquica paihuanmi carca.

10Esdrasca Mandac Dios mandashcata allita yachacushpa, cazushpa imata ruhuachun mandashcata pactachichun cushca shimicunata, Israel llactapi yachachinatami tucui shunguhuan munarca.

Jatun mandac Artajerjes cartata quillcashcamanta

11Esdrasca Mandac Dios mandashcata, israelcunaman mandashcacunata, pactachichun cushca shimicunata alli yachac quillcacmi carca. Jatun mandac Artajerjes Esdras curaman quillcashpaca:

12«Jatun mandaccunata mandac Artajerjesmi: Jahua pachapi causac Dios mandashcata alli yachac quillcac Esdras curataca sumac causaita charingui nini.

13Caitaca ñucami mandani. Ñuca mandana llactacunapi causac tucui israelcunapish, curacunapish, levitacunapish Jerusalenman canhuan risha nishpaca richunlla.

14Cambac Dios mandashca shinallatac Judá llactapi, Jerusalenpi causaccunata ricugrichunmi ñucapish, ñucata canchis cunaccunapish mandanchic.

15Ñucapish, ñucata cunaccunapish quiquin munaihuanmi Jerusalenpi israelcunapac Diosman cuchun cullquita cachanchic.

16Tucui Babilonia llactapi japishca cullquita, curita, shinallatac israelcunapish, curacunapish quiquin munaihuan cushcata Jerusalenpi cac Diospac huasiman apangui.

17Chai cullquihuanca Jerusalenpi cac cancunapac Diospac huasipi tiyac altarpi Diosman cushpa rupachingapac becicunata, cari ovejacunata, maltón ovejacunata, rupachina harinahuan, tallina vinohuan mana cungarishpa randingui.

18Puchushca cullquita, curitaca cancunapac huauquicunahuan imata ruhuana alli cashcata cancunapac Dios munashca shina ruhuanguichic.

19Cambac Diospac huasipi servichun canman cutichishca ima charinacunataca Diospac ñaupapi Jerusalenpi cutin cutichinguichic.

20Cambac Diospac huasipi ima minishtirishca faltacpica, jatun mandac ñucapac huasimanta ima yalli valishcacunata cunguilla.

21Jatun mandac Artajerjes ñucami jatun yacu chimba ladopi ñuca tucui cullquita huacaichiccunataca jahua pachapi causac Dios mandashcata quillcac Esdras cura imata mañacpica, utca cunguichic.

22Patsac talento cullquita, patsac coro trigota, patsac bato vinota, patsac bato aceiteta cunguichic. Cachitaca mashnata mañacpipish cunguichiclla nishpa mandani.

23Jahua pachapi causac Dios ruhuachun nishcataca jahua pachapi causacuc Diospac huasipi imatapish utca ruhuaichiclla. ¿Ima nishpatac jatun mandac ñuca mandacuc llactatapish, ñuca churicunatapish Dios piñashpa llaquichichunca saquishayari?

24Caitapish yachanami canguichic: Curacunata, levitacunata, mandaccunata, cantaccunata, pungupi cuidaccunata, Diospac huasipi serviccunata, chaipi imata ruhuaccunataca tributota, impuestota, imamanta cunacunatapish, ama mañanguichicchu.

25Shinallatac can Esdrasca cambac Diosmanta yachac cashca shinallatac, jatun yacu chimba ladopi causaccunata, Dios mandashcata tucui yachaccunata mandachun juezcunata, mandaccunata churangui. Chai mandashcacunata maijan mana yachacpica yachachingui.

26Cambac Dios mandashcata, jatun mandac ñuca mandashcata maijanpish mana cazucpica, huañuchina cacpi, llactamanta llucchishpa cachana cacpi, cullquita cobrana cacpi, mana cashpaca prezuna cacpica, chai shina llaquichishca cachun» nishpami quillcashca carca.

27¡Ñucanchic taitacunata Mandac Diosca yallita alli nishca cachun! ¡Mandac Diosca paillatacmi paipac huasita alli nichun jatun mandacpac shungupi yuyaita cushca! ¡Paica Jerusalenpimi can!

28Shina alli yuyaita cucpimi, jatun mandacpish, paita cunaccunapish, paita servic sinchi mandaccunapish yallita ayudarca. Mandac Dios ñucahuan cacpimi, sinchiyashpa israelcunata mandaccunatapish Jerusalenman ñucahuan cutimuchun tandachircani.