1 CRÓNICAS 27 - Biblia Quichua Cañar 2010

David soldadocunata mandaccunata churashcamanta

1Israel huasi ucupurata mandaccuna, huaranga soldadocunata mandaccuna, patsac soldadocunata mandaccunata mandaccunami tiyarca. Chai mandaccunami huatapi cada quilla mashna yaicuc, mashna llucshic soldadocunata ricushpa, jatun mandacta serviccuna carca. Chai cada tandanacushca soldadocunaca ishcai chunga chuscu huarangami carca.

2Punta quillapi yaicuc, punta tandanacushca ishcai chunga chuscu huaranga soldadocunataca Zabdielpac churi Jasobeammi mandacurca.

3Paica Farespac huahua huahuapuramantami carca. Paimi punta quillapi yaicuc tandanacushca soldadocunaca mandaccunata mandac carca.

4Ishcainiqui quillapi yaicuc, ishcainiqui tandanacushca ishcai chunga chuscu huaranga soldadocunataca Ahohi pueblomanta Dodaimi mandacurca. Chai soldadocunapac quipa mandacca Miclotmi carca.

5Quimsaniqui quillapi yaicuc, quimsaniqui tandanacushca ishcai chunga chuscu huaranga soldadocunataca curacunata mandac Joiadapac churi Benaiasmi mandacurca.

6Chai Benaiasmi quimsa chunga soldadopuramanta yallita sinchi shinallatac paicunata mandacpish carca. Chai tandanacushcapica paipac churi Amisabadmi carca.

7Chuscuniqui quillapi yaicuc, chuscuniqui tandanacushca ishcai chunga chuscu huaranga soldadocunataca Joabpac huauqui Asaelmi mandacurca. Paipac quipataca paipac churi Zebadiasmi mandarca.

8Pichcaniqui quillapi yaicuc, pichcaniqui tandanacushca ishcai chunga chuscu huaranga soldadocunataca izraitapuramanta Samhutmi mandacurca.

9Suctaniqui quillapi yaicuc, suctaniqui tandanacushca ishcai chunga chuscu huaranga soldadocunataca Tecoa pueblomanta Iquespac churi Irami mandacurca.

10Canchisniqui quillapi yaicuc, canchisniqui tandanacushca ishcai chunga chuscu huaranga soldadocunataca pelonitapuramanta Efrainpac churi Helesmi mandacurca.

11Pusacniqui quillapi yaicuc, pusacniqui tandanacushca ishcai chunga chuscu huaranga soldadocunataca, Husa pueblomanta Zerapac huahua huahuapuramanta Sibecaimi mandacurca.

12Iscunniqui quillapi yaicuc, iscunniqui tandanacushca ishcai chunga chuscu huaranga soldadocunataca, Anatot pueblomanta Benjaminpac huahua huahuapuramanta Abiezermi mandacurca.

13Chunganiqui quillapi yaicuc, chunganiqui tandanacushca ishcai chunga chuscu huaranga soldadocunataca zeraitapuramanta Maharaimi mandacurca. Paica netofatitapuramantami carca.

14Chunga shucniqui quillapi yaicuc, chunga shucniqui tandanacushca ishcai chunga chuscu huaranga soldadocunataca Efrainpac huahua huahuapuramanta Benaiasmi mandacurca. Paica Piratón pueblomantami carca.

15Chunga ishcainiqui quillapi yaicuc, chunga ishcainiqui tandanacushca ishcai chunga chuscu huaranga soldadocunataca, Netofa pueblomanta Otonielpac huahua huahuapuramanta Heldaimi mandacurca.

Israel aillucunata mandaccunamanta

16Israel aillucunata mandaccunaca caicunami: Rubenpac aillutaca Zicripac churi Eliezermi mandacurca. Simeonpac aillutaca Maacapac churi Sefatiasmi mandacurca.

17Levitacunataca Kemuelpac churi Hasabiasmi mandacurca. Aaronitacunataca Sadocmi mandacurca.

18Judapac aillucunataca Davidpac huauqui Eliumi mandacurca. Isacarpac aillutaca Micaelpac churi Omrimi mandacurca.

19Zabulonpac aillucunataca Abdiaspac churi Ismaiasmi mandacurca. Neftalipac aillucunataca Azrielpac churi Jerimotmi mandacurca.

20Efrainpac aillucunataca Azaziaspac churi Oseasmi mandacurca.

Manasespac chaupi aillucunataca Pedaiaspac churi Joelmi mandacurca.

21Manasespac caishuc chaupi aillucunaca Galaad llactapimi causacurca. Paicunataca Zacariaspac churi Iddomi mandacurca.

Benjaminpac aillucunataca Abnerpac churi Jaasielmi mandacurca.

22Danpac aillucunataca Jerohampac churi Azareelmi mandacurca.

Paicunami Israel aillucunata mandaccuna carca.

23Mandac Diosca israelcunataca jahua pachapi tiyac lucerocunata shinami mirachisha nishcami carca. Chaimantami Davidca ishcai chunga huatata manarac chariccunata ama yupachun mandarca.

24Sarviapac cari huahua Joabmi israelcunata yupai callarirca. Chashna yupai callarishcamanta israelcunata jatun llaqui japicpimi, yupanataca mana tucuchirca. Chai yupanaca jatun mandac David imata ruhuashcata quillcashcapica mana tiyanchu.

25Adielpac churi Azmavetca jatun mandacpac yallita valishcacunata huacaichicmi carca. Shinallatac Uziaspac churi Jonatanca chagra ruhuana allpacunapi, pueblocunapi, pueblo muyundipi tiyac uchilla llactacunapi, torrecunapi granota huacaichiccunata mandacmi carca.

26Tarpushpa causaccunataca Quelubpac churi Ezrimi mandacurca.

27Uvas chagrata cuidaccunataca Ramá pueblomanta Simeimi mandacurca. Vinota tandachishpa huacaichiccunataca Sifmit pueblomanta Zabdiasmi mandacurca.

28Sefela pambapi tiyac olivos chagracunata, higo chagracunata cuidaccunataca Gedera pueblomanta Baal-hananmi mandacurca. Olivos aceiteta huacaichina ucucunata cuidaccunataca Joasmi mandacurca.

29Sarón llactapi huagrata michiccunataca Sarón pueblomanta Sitraimi mandacurca. Pugru pambapi huagrata michiccunataca Adlaipac churi Safatmi mandacurca.

30Camellocunata cuidaccunataca ismaelitapuramanta Obilmi mandacurca. Burrocunata michiccunataca Meronot pueblomanta Jehediasmi mandacurca.

31Ovejacunata michiccunataca hagarenopuramanta Jazizmi mandacurca.

Tucui paicunami jatun mandac Davidpac tucui charishcacunata cuidaccunata mandaccuna carca.

Davidpac shuctac mandaccunamanta

32Davidpac tio Jonatanca alli yuyaita cuc, quillcac yuyaisapa runami carca. Hacmonipac churi Jehielca jatun mandacpac churicunata cuidacmi carca.

33Ahitofelpish jatun mandacman alli yuyaita cucmi carca. Arquitapuramanta Husaica jatun mandacpac alli ricsishcami carca.

34Ahitofelpac quipaca Benaiaspac churi Joiada, shinallatac Abiatarmi jatun mandac Davidman alli yuyaita cuc carca. Joabca jatun mandacpac soldadocunatami mandacurca.