2 SAMUEL 8 - Biblia Quichua Cañar 2010

David quichushca llactacunamanta(1 Cr 18.1-13)

1Chai quipaca, Davidca filisteocunahuan macanacushpa atishpami, servichishpa charirca. Shinallatac Meteg-ama pueblotapish filisteocunamantaca quichurcami.

2Shinallatac moabitacunatapish atishpami, pambapi sirichishpa huascahuan medirca. Ishcai huasca jundata medicpica huañuchircami. Shuc huasca jundata medicpica, mana huañuchircachu. Moabitacunaca Davidta servic tucushpami, Davidman impuestota cushpa causarca.

3Shinallatac Davidca Rehobpac churi jatun mandac Hadad-ezerta atishpami, Soba llactata mandacurca. Chai jatun mandacmi Eufrates yacu cuchulla llactacaman japisha nicurca.

4Davidca chashna macanacushpa, huaranga canchis patsac caballopi montashca ric soldadocunata japishpa, cutin chaquillahuan ric soldadocunataca ishcai chunga huarangatami japirca. Carretacunata aisac caballocunataca chaquicunatami paquirca. Ashtahuanpish patsac carretacunata aisac caballocunallatami saquirca.

5Damasco pueblopi causac siriocunami Soba llactata jatun mandac Hadad-ezerta ayudangapac shamurca. Shina shamucpimi, Davidca ishcai chunga ishcai huaranga sirio gentecunata huañuchirca.

6Shinami Davidca Damasco pueblopi causac siriocunapac chaupipi cuidachun soldadocunata churarca. Chashna ruhuacpimi, siriocunaca Davidta servishpa paiman impuestota cushpa causarca.

Mandac Diosca David maiman macanacungapac ricpipish mishachircami.

7Davidca jatun mandac Hadad-ezerpac soldadocunapac curi escudocunata japishpami Jerusalenman aparca.

8Shinallatac jatun mandac Hadad-ezerpac Beta, Berotai pueblocunamantapish achca broncetapish aparcami.

9Hamat llactata jatun mandac Toica David Hadad-ezerpac soldadocunata atishcata chayashpami,

10paipac churi Joramta David Hadad-ezerhuan macanacushpa atishcamanta saludashpa alli nichun cacharca. Chaica, Toipish Hadad-ezerhuan macanacushpalla causacushcamantami Davidta saludachun cacharca. Horamca curimanta, cullquimanta, broncemanta ruhuashca ima charinacunata apashpami rirca.

11Davidca chaicunatami pai atishca llactacuna cushca impuesto cullquihuan, curihuan Mandac Diospaclla cachun chicanyachirca.

12Chaicunaca David siriocunamanta, edomitacunamanta, moabitacunamanta, amonitacunamanta, filisteocunamanta, amalecitacunamanta, Soba llactata jatun mandac Hadad-ezermanta quichushcacunami carca. Hadad-ezerca Rehobpac churimi carca.

13Davidca cachi tiyac pambapi chunga pusac huaranga edomitacunata huañuchishpa cutishpami, tucuipac alli nishcapish, tucuipac ricsishcapish tucurca.

14Chashna atishpami, Edom llacta tucui pueblocunapi cuidac soldadocunata churacpi, edomitacunaca Davidta serviccuna tucurca. David maiman ricpipish, Mandac Diosca paita mishachircami.

David churashca mandaccunamanta(2 Sam 20.23-26; 1 Cr 18.14-17)

15Davidca tucui israelcunatami mandacurca. Paica allita ruhuashpami, imatapish cashcata ruhuashpa mandacurca.

16Sarviapac huahua Joabca soldadocunatami mandacurca. Ahiludpac churi Josafatca jatun mandacpac quillcacmi carca.

17Ahitobpac churi Sadocpish, Abiatarpac churi Ahimelecpish curacunami carca. Seraiaspish quillcacmi carca.

18Joiadapac churi Benaiasca peleteocunata, Cereteocunata mandacmi carca. Davidpac churicunaca curacunami carca.