1Ñuca ricsishcamanmi paipac uvas
chagramanta cantagrini.
Ñuca ricsishcami alli pucuc allpa
quingraipi uvas chagrata charirca.
2Chai allpamanta quihuatapish,
rumicunatapish anchuchishpami,
allita uvasta acllashpa tarpurca.
Chai chagra chaupipica
jatun torretapish,
uvasta cutanatapish ruhuarcami.
Chai allpapi alli uvasta pucuchina
yuyaihuan cacpica,
sacha uvasmi pucurca.
3Jerusalén ladopi causaccunalla,
Judá llactapi causaccunalla,
cunanca ñucatapish,
ñuca uvas chagratapish,
ricushpa yuyarichicyari.
4Ñuca uvas chagrapica,
¿imatatac ashtahuan ruhuana carcani?
¿Imatatac mana ruhuashpa saquircani?
Ñucaca alli uvasmi
pucunga yuyashpami shuyacurcani.
¿Ima nishpatac sacha
uvasrac pucurcayari?
5Cunanca ñuca uvas chagrata
imata ruhuagricushcatami huillagrini.
Pipish chagrata tucuchichunmi
muyundi jarcashcata urmachigrini.
Pipish yaicushpa sarunacuchunmi
pircatapish urmachigrini.
6Shitashca pambatami saquigrini.
Mana pucuc ramacunatapish
pi mana pitingachu,
pi mana jallmangachu.
Ashtahuanpish cashacuna,
cardos yuracunallami jundanga.
Chai chagra jahuapi tamyachichunpish
mana puyuta cachashachu.
7Tucuita Mandac Diospac
uvas chagraca israelcunami.
Pai tarpushca sumac yuracunaca
Judá llactapi causaccunami.
Mandac Diosca allita ricushpa
mandachunmi munarca.
Ashtahuanpish yanga
gentecunami tucushca.
Cashcata ruhuachunmi munarca.
Ashtahuanpish yallita
caparinacuillami tiyan.
Millaicunata llaquichinamanta8¡Aij, shuctac shuctac
huasicunata shayachiccunalla,
cancunaca pimanpish mana saquishpami,
allpacunata japishpa mirachinguichic!
¡Tucui cai llactapica
cancunallami causagringuichic!
9Tucuita Mandac Dios
ringripi rimashpaca:
“Chai achca sumac huasicunapica
pi mana causangachu.
Chaicunaca llaquinayaitami
shitashca saquiringa.
10Quimsa hectaria uvas chagramantaca
quimsa chunga canchis litro
vinollatami llucchinga.
Chunga quintal chaupi muyumantaca
chaupi quintal granollatami
japinga” nircami.
11¡Aij, tutamanta utca jatarishpa,
tutayangacaman nina japiric shina,
machangapac riccunalla!
12Jatun micuita ruhuashpa,
vinota ubiashpa, arpacunapi,
salteriocunapi, tamborcunapi,
flautacunapi tocashpami,
Mandac Dios ruhuashcataca
mana ricuncuna, mana yuyarincuna.
13Ñuca acllashcacunaca
ñucata mana ricsishcamantami
prezu apashca carca.
Chaipimi paicunapac alli nishca
runacunaca yarcaihuan huañurca.
Shinallatac achcacunami
yacunayaihuan chaquishpa huañurca.
14Chaimantami Seolpish
piña animal shina,
shimita achcata pascashca.
Chaimanmi alli nishca runacunapish,
paicunahuan cushicuc
achca gentecunapish urai ringa.
15Cari tucushcacunatapish
pingaichishpami cumurichinga.
Ñahuita alzashpa jatun tucushpa
puriccunatapish cumurichingami.
16Tucuita Mandac Diosca
pai allita Mandac cashcamantami
jatunyachishca canga.
Jucha illac Diosca cashcata
ruhuac cashcamantami
“Jucha illacmi cangui” nishca canga.
17Cari ovejacunatami
paicuna michinapica michinga.
Chayuccunapac pambacunapi pucushcataca
huahua chivocunami micushpa tucuchinga.
18¡Aij, mana allita ruhuana yuyaita
huascahuan aisac shina llullaccunalla!
¡Carretata aisac angu shina,
juchata ruhuaccunalla!
19Paicunaca: «Dios munashcataca
ñucanchic ricungapac utca ruhuaiyari.
Ñucanchic ricsingapac
israelcunapac jucha illac Dios
yuyarishcataca ruhuailla» nincunami.
20¡Aij, mana allitaca allimi,
allitaca mana allichu niccunalla!
Paicunaca achictaca amsami,
amsataca achicmi nincunami.
Cutin jayactaca mishquimi,
mishquitaca jayacmi nincunami.
21¡Aij, paicunapac yuyaipi
“Alli yachaccunami canchic,
alli yuyaiyucmi purinchic” niccunalla!
22¡Aij, machangapacpish,
machana yacuta chapungapacpish
sinchi runacunalla!
23Paicunaca cullquita
pacalla japishpami,
mana allita ruhuaccunataca
cashcata ruhuacmi nincuna.
Chashna ruhuashpami,
cashcata ruhuac runa
japinataca quichun.
24Chaimantami paicunataca
nina japirishpa, ucsha,
rastrojo shina rupashpa tucuringa.
Chashnami sapi ismushca
yura shina canga.
Sumac sisacuna shina cashpapish,
ñuto allpata huaira
apashca shinami canga.
Chaica paicunallatac
tucuita Mandac Dios
mandashcata piñashpa,
israelcunapac jucha illac
Diospac shimita
millanayachishcamantami
chashnaca tucunga.
25Mandac Diosca nina japiric shina
piñarishpami pai acllashcacunata
llaquichirca.
Urcucunapish chucchungami.
Huañushcacunaca imapish mapa shinami
chaupi ñancunapi shitashca canga.
Chashna ruhuashpapish
pai yallita piñarishcataca
mana pasachingachu.
Ashtahuanpish llaquichingatacmi.
26Caru llactapi causaccunataca
banderata alzashpami, Diosca cayanga.
Tucui cai pachapi causaccunatami
silbashpa cayanga.
Chashna cayacpica, utcami
callpashpa shamungacuna.
27Paicunapurapica
pi mana shaicungachu.
Mana mitcaringachu.
Pi mana sueñungachu.
Ñahuillatapish mana huichcangachu.
Paicuna chumbillirishcataca
pi mana pascangachu.
Ushuta huatashcatapish
pi mana pitingachu.
28Paicunapac flechacunapish
alli mulashcami canga.
Arcocunapish allichishcami canga.
Caballocunapac shillucunaca
yacu rumi shina sinchimi canga.
Carretacunapac ruedacunaca
acapana huaira shinami callpanga.
29Paicuna caparishcapish
león huacashca shinami uyaringa.
Huahua león huacac shina caparishpa,
quirucuna canirishpami
imatapish japishpa apamunga.
Chashna apamucpipish,
pi mana quichui pudingachu.
30Chai punzhapica mama cucha
huacashpa jataric shinami,
yallita caparinga.
Shina caparinacucpi,
chai llactata ricpica,
manchana puyu tapashca
jatun llaquimi ricuringa.
Jahua pacha achicpish ricuringami.
Who We AreWhat We EelieveWhat We Do
2025 by iamachristian.org,Inc All rights reserved.
