1¿Cunanca imatatac nishun? ¿Diosca pai acllashca israelcunataca shitashcachu? ¡Mana chashnachu! Ñucapish Abrahampac huahua huahuapuramanta, Benjamín aillupurami cani.
2Ñaupamanta pachami Diosca israelcunataca acllarca. Ashtahuanpish mana shitashcachu. Dios quillcachishcapi Eliasmanta ima nishcataca, ¿manachu yachanguichic? Chaipica, israelcunata juchanchishpa, Diosta mañacushpaca:
3«Dioslla, can ima nishcata huillaccunatapish huañuchishcami, cambac altarcunatapish urmachishcami. Ñucallami saquirini. Ñucatapish huañuchishun nincunami» nirca.
4Chashna mañacpi Diosca: «Canchis huaranga gentecunatami acllarcani. Paicunaca mana Baal diospac ñaupapi cungurishcachu» nirca.
5Chai shinallatacmi cunanpish Diosca paipac cuyaillamanta maijancunata acllashca.
6Diosca paicunataca mana ima allita ruhuashcamantachu acllashca. Ashtahuanpish cuyaillamantami acllarca. Paicuna allita ruhuashcamanta acllashca cacpica, Diospac cuyaica yangallami canman.
7Shinashpaca, ¿imatatac nishun? Israelcunaca paicuna mashcacushcataca mana japircachu. Ashtahuanpish Dios acllashcacunallami japirca. Shuccunaca rumi shungumi tucurca.
8Dios quillcachishcapica: «Diosmi paicunataca sinchi shunguta ruhuarca. Cunan punzhacamanmi ñahui mana ricuccunata, ringri mana uyaccunata ruhuashca» ninmi.
9Shinallatac Davidca:
«Paicunapac jatun micuica
tuclla tucuchun, tiyarinapish
mitcarina tucuchunmi mañani.
10Ñahuicunapish imata
mana ricushpa amsayachun,
paicunapac huasha tullucunapish
huiñaita aruyashca cachunmi mañani» nishcami.
Mana israelcunapish quishpirina cashcamanta11Ñucaca: ¿Israelcuna urmashpaca, huiñaitachu chingarishca canga? ¡Mana chashnachu! Ashtahuanpish israelcuna mana cazushcamantami Diosca mana israelcunata quishpichirca. Israelcuna envidiachunmi chashnaca ruhuarca.
12Israelcuna mana cazushcaca tucui cai pachapi causaccunapac allipacmi cashca. Paicuna pandarishcaca mana israelcunapac allipacmi cashca. Israelcuna pandarishca mana israelcunapac allipac cacpica, israelcunata Dios quishpichicpicarin, ashtahuan alli cashcatami yachanchic.
13Cancuna mana israelcunamanmi rimani. Ñucaca mana israelcunaman huillac apostolmi cani. Ñuca imata ruhuacushcataca yallimi cuyani.
14Chashna ruhuashpaca, ñuca llacta aillucuna envidiashpa, maijancunallapish quishpirina munaita charichunmi munani.
15Israelcunata Dios shitacpi, tucui cai pachapi causaccuna Diospacman cuchuyashca cacpi, ¡israelcuna Dios chasquicpicarin, huañushcacuna causarishca shinami canga!
16Punta ruhuashca tanda Diospaclla cacpica, tucui chapumi Diospac canga. Shuc yura sapi Diospaclla cacpica, tucui ramacunami Diospac canga.
17Maijan israelcunaca alli olivos yuramanta pitishca rama shinami. Cutin can mana Israelca, sacha olivos ramata pitishpa, alli olivos yurapi llutashca shinami cangui. Chaimantami canca chai sapimanta huiñashca yura shina, causaita japishcangui.
18Shina cashpapish ama: “Caishuc ramacunamanta yallimi cani” nichu. Canca mana yurata charic sapichu cangui, ashtahuanpish sapimi canta charicun.
19Canca: «Ñucata llutachingapacmi, chai olivospac ramacunataca pitirca» ninguichari.
20Ari, chai israelcunaca mana crishcamantami, pitishca shina tucurcacuna. Ashtahuanpish canca crishcallamantami chai yurapi huiñashca cangui. Chaimanta ama canllatac “allimi cani” nirichu, ashtahuanpish Diosta manchai.
21Diosca chai yurapi huiñashca ramacunatapish pitishpaca, can llutachishcallatacarin, ¿ima nishpatac mana pitinga?
22Dios llaquic cashcatapish, llaquichic cashcatapish yachanami cangui. Diosca mana cazuccunataca llaquichishcami. Shina cashpapish cantaca llaquishcami. Diospac cuyaita mana cungarishpaca causanguimi. Mana yuyarishpaca canpish anchuchishcami cangui.
23Israelcunapish sinchi shungu canata saquishpa, crishpaca chai yurapi llutashcami canga. Diosca cutin chai yurapi llutangapac poderta charinmi.
24Canca paillatac huiñashca sacha olivos yuramanta pitishpa, alli olivos yurapi churashca shinami cangui. Ashtahuanpish israelcunacarin alli olivos yura ramacuna cashcamantaca, quiquin yurallapitacmi Diosca churanga.
Israelcunapish quishpirina cashcamanta25Cuyashca criccuna, cancuna ama jatun tucuchunmi, Dios manarac piman yachachishcata yachachun munani. Tucui mana israelcuna cringacamanmi, maijan israelcunaca sinchi shungu tucunga.
26Chai quipaca, tucui israelcunami quishpiringa. Dios quillcachishcapica:
«Sión pueblomantami
Quishpichic shamunga.
Jacobopac huahua huahuacunapac
juchacunatami anchuchinga.
27Diosca: “Paicunapac
juchacunata anchuchingapacmi,
ari nircani” nin» ninmi.
28Mana israelcunapac allipacmi, israelcunaca alli huillaita mana cazushpa, Dios piñashca tucushcacuna. Shina cacpipish, Diosca paicunapac ñaupa taitacunata acllashcamantami cuyacun.
29Diosca imata cushpapish mana quichunchu. Cayashpapish mana cungarinchu.
30Cancunapish ñaupaca Diosta mana cazuccunami carcanguichic. Shina cacpipish, cunanca israelcuna mana cazushcamantami Diosca cancunatapish llaquicun.
31Paicunaca cancunata llaquishca shina Dios llaquichunmi, Diosta mana cazuncuna.
32Diosca tucui gentecunata llaquingapacmi, paita mana cazuchun saquirca.
Dios yallita yachac cacpi cantashcamanta33¡Dios mandanapish, yachaipish,
yuyaipish yalli jatunmi!
Pai yuyacushcapish,
maita mana yachaipacmi.
Pai ruhuashcapish
mana entendipacchu.
34Chaica, ¿pitac Diospac
yuyaita ricsin?
¿Pitac paiman yuyaita cun?
35¿Pitac Diosmanta imata
chasquingapac, imata cui pudin?
36Chaica, tucui imapish
Diosmantami tiyan.
Tucui imapish paipacmi.
¡Chaimanta Diostaca huiñai huiñaita alli nishca cachun! Chashna cachun.
Who We AreWhat We EelieveWhat We Do
2025 by iamachristian.org,Inc All rights reserved.
