EZEQUIEL 20 - Biblia Quichua Cañar 2010

Israelcuna Mandac Diosta mana cazushcamanta

1Canchis huata, pichca quilla, chunga punzhapimi israelcunata pushac yuyaccuna Mandac Diosman tapungapac shamushpa, ñuca ñaupapi tiyarirca.

2Chaipimi Mandac Dios ñucata rimashpaca:

3«Huañunalla runa, pushac yuyaccunataca: “Mandac Diosca: ¿Ñucamanchu tapuc shamunguichic? Mandac Dios ñuca shutipimi nini: ¡Cancuna tapushcataca mana cutichishachu!” ninmi ningui.

4Huañunalla runa, ¿paicunata taripasha ninguichu? Taripashpa, paicunapac taitacuna millaita ruhuashcacunata

5ricushpa: “Mandac Diosca: Israelcunata acllai punzhapimi Jacobopac huasi ucupuracunahuan maquita alzashpa ari nircani. Egipto llactapi Mandac Dios ñuca cashcata ricsichishpami, ñuca maquita alzashpa, ari nishpaca:

6Egipto llactamanta llucchishpa, lechepish, mishquipish tiyac llactamanmi pushasha. Chai llactaca tucui llactamanta yalli sumac llactami.

7Chai ruhuashcalla dioscunata cancunapac ñaupamanta anchuchichic. Egiptopi tiyac ruhuashcalla dioscunahuan ama mapayaichicchu. Ñucami cancunata Mandac Dios cani nircani.

8Ashtahuanpish paicunaca ñucata mana cazushpami piñachirca. Ruhuashcalla dioscunataca paicunapac ñaupamanta mana anchuchisha nircachu. Egiptopi tiyac ruhuashcalla dioscunatapish mana saquircachu. Chaimantami Egipto llactapi paicunata llaquichishpa, ñuca piñarishcataca pasachinata munarcani.

9Shina cashpapish, shuctac llactacunapi causaccunapac ñuca shuti ama mana alli nishca cachunmi, mana llaquichircani. Chai llactacunapac chaupipimi paicunaca causarca. Ñucaca Mandac Dios cashcata ricsichishpami, israelcunataca Egipto llactamanta llucchimurcani.

10Ñucaca Egipto llactamanta llucchimushpami, shitashca pambaman pushamurcani.

11Chaipimi paicunaman ñuca rimashcacunatapish, mandashcacunatapish ricsichircani. Chaicunata pactachishpaca causangami.

12Shinallatac paicunahuan ari nishcata yuyarichun, paicunata ñucapacllata ruhuac Mandac Dios cashcata yachachunmi samana punzhatapish curcani.

13Ashtahuanpish israelcunaca shitashca pambapica ñucata mana cazushpami piñachirca. Ñuca mandashcacunatapish, ñuca imata ruhuachun nishcacunatapish yangapimi churarca. Chaicunata maijanpish pactachishpaca causangami. Samana punzhatapish yangapi churacpimi, ñucaca yallita piñarishpa, shitashca pambapi llaquichinata yuyarircani.

14Shina cashpapish, ñuca shuti shuctac llactacunapi causaccunapac ama mana alli nishca cachunmi, mana llaquichircani. Paicunataca chai gentecuna ricucucpimi llucchimurcani.

15Shinallatac shitashca pambapimi maquita alzashpa: Lechepish, mishquipish tiyac, tucui llactamanta yalli sumac llactamanca mana apashachu nishpa ari nircani.

16Paicunallatacmi ñuca imata ruhuachun nishcacunatapish, mandashcacunatapish mana cazushpa, samana punzhatapish yangapi churashpa, paicunapac ruhuashcalla dioscunatarac yuyarishpa causarca.

17Chashna cacpipish, paicunata llaquishpami, chai shitashca pambapica mana tucuchircani.

18Shina cashpapish paicunapac churicunataca: ‘Ñaupa taitacuna mandashcacunatapish, paicuna imata ruhuachun nishcacunatapish ama pactachichicchu, ruhuashcalla dioscunata adorashpa, ama mapayaichicchu.

19Ñucami Mandac Dios cani. Cancunaca, ñuca mandashcacunatapish, imata ruhuachun nishcacunatapish pactachishpa causaichic.

20Shinallatac samana punzhaca ñucapaclla chicanyachishca cashcata yuyarichic. Chashnami ñucaca Mandac Dios cashcata yachanguichic’ nircani.

21Ashtahuanpish paicunapac churicunaca ñucataca mana cazurcachu. Causaita cuc ñuca mandashcacunatapish, imata ruhuachun nishcacunatapish mana pactachircachu. Samana punzhatapish yangapimi churarca. Chaimantami ñuca piñarishpa, shitashca pamballapitac tucuchinata yuyarcani.

22Shina cashpapish, shuctac llactacunapi causaccunapac ñuca shuti ama mana alli nishca cachunmi, mana llaquichircani. Paicunataca chai gentecuna ricucucpimi llucchimurcani.

23Shitashca pamballapitacmi paicunata caita, chaita tucui cai pacha llactacunaman cachangapac maquita alzashpa ari nircani.

24Paicunaca ñuca imata ruhuachun nishcacunatapish, ñuca mandashcacunatapish mana cazurcachu, samana punzhatapish yangapi churashpami, paicunapac taitacunapac ruhuashcalla dioscunata yuyarishpa causarca.

25Chaimantami paicunata llaquichingapac mana alli mandashcacunatapish, causaita mana cuc mandashcacunatapish curcani.

26Tucui punta churicunata yanga dioscunaman rupachichun saquishpami, chai rupachishcacunatapish, paicunatapish mapayachircani. Ñucaca Mandac Dios cashcata yachachunmi chashna ruhuarcani” ninmi.

27Chaimanta huañunalla runa, israelcunataca: “Mandac Diosca: Shina ruhuacpipish, cancunapac taitacunaca mana cazushpami, yallita piñachirca.

28Maquita alzashpa, cushami nishca llactaman pushamucpica, chaipi tiyac jatun lomacunata, jatun yuracunata ricushpami, animalcunata cushpa rupachirca. Mishquilla ashnacuc inciensotapish rupachircami, vinotapish cushpa tallircami. Chashnami ñucataca yallita piñachirca.

29Chaimantami ñucaca: ¿Imapactac lomacunapi tiyac altarcunaman ringuichic? nircani. Chai altarcunataca cunan punzhacamanmi ‘Bamah’ nishpa, cayancuna” ninmi ningui.

30Canca israelcunataca: “Mandac Diosca: ¿Cancunapish cancunapac taitacuna shinachu, mana allita ruhuashpa, ruhuashcalla dioscunata catishpa huainayanguichic?

31Cunancamanmi cancunapac churicunata ruhuashcalla dioscunaman rupachishpa, yallita mapayashpa causanguichic. ¿Chai shina cashpachu tapuc shamunguichic? ¡Ñuca shutipimi nini: Cancuna tapushcataca mana cutichishachu!

32Cancunaca: ‘Shuctac llactapi causaccuna shina, shuctac gentecuna shina caspimanta, rumimanta ruhuashca dioscunata servishpa causashunchic’ ninguichicmi. Cancuna yuyashcaca mana pactangachu.

33Mandac Dios ñuca shutipimi nini: Ñucaca yallita piñarishpami, ñuca poderhuan cancunataca mandasha.

34Ñuca yallita piñarishpami, ñuca poderhuan caimanta, chaimanta llucchimusha. Mai llacta chaupimanta, shuctac gentecunapac chaupimantami llucchimusha.

35Llactacunapac shitashca pambaman pushamushpami ñahui ñahui tiyarishpa cancunataca llaquichisha.

36Ima shinami Egipto llactapi tiyac shitashca pambapi cancunapac taitacunata taripashpa llaquichircani, chashnallatacmi cancunatapish taripashpa llaquichisha. Chaitaca Mandac Dios ñucami nini.

37Cancunataca ovejacunata varahuan yupac shinami, ñucahuan ari nishcata pactachichun churasha.

38Chashnami cancunapuramantaca ñucata mana cazushpa cariyaccunata anchuchisha. Paicunaca mana Israel llactamanca yaicungacunachu. Shina ruhuacpimi, ñucataca Mandac Dios cashcata yachanguichic.

39Mandac Dios ñucaca israelcunataca: Tucui cancuna ñucata mana cazushpa, cancunapac ruhuashcalla dioscunata servishpa catichiclla. Ashtahuanpish cancunapac yanga dioscunata servishpa, chaicunaman ofrendata cushpa, ama ñuca jucha illac shutita yangapi churaichicchu.

40Israel llactapi cac ñucapaclla chicanyachishca jatun urcupimi israelcunaca ñucata servinga. Chaipimi paicunataca chasquishpa, ñucaman ofrendatapish, punta pucushca granotapish, ñucapaclla cachun tucui chicanyachishcatapish chasquisha.

41Caita chaita rishpa, shuctac llactapi causacucpimi, chaimanta llucchishpa, mishquilla ashnacuc inciensota shina chasquisha. Chashna allita ruhuashcamantami shuctac llactapi causaccunaman ñucaca jucha illac cashcata ricurisha.

42Israel llactaman pushamucpimi, ñucataca Mandac Dios cashcata yachanguichic. Chai llactatami cancunapac ñaupa taitacunaman cusha nishpa, ñuca maquita alzashpa ari nircani.

43Chai llactapi causacushpami cancunaca utcapi ima shina causashcata, imata ruhuashpa mapayashcata yuyaringuichic. Shinami cancuna ruhuashca juchacunataca cancunallatac millanguichic.

44Israelcunalla, cancunata llaquichishpapish mana alli ruhuashpa causashca shinachu llaquichini. Ñuca shutita cuyashcamantami chashna ruhuani. Shina ruhuacpimi, ñucataca Mandac Dios cashcata yachanguichic” ninmi ningui» nirca.

Neguev llactata llaquichinamanta

45Mandac Dios ñucata rimashpaca:

46«Huañunalla runa, ura ladota ricushpa, Neguev pambapi tiyac sachata llaquichinata huillai.

47Neguev pambapi tiyac sachataca: “¡Mandac Diospac rimashcata uyaichic! Mandac Diosca: Riquichic, ñucami ninata japichishpa, verdinlla yuracunatapish, chaquishca yuracunatapish tucui rupachigrini. Chai ninaca mana huañungachu, ashtahuanpish ura ladomanta, jahua ladocamanmi gentecunapac ñahuita rupachinga.

48Mandac Dios ñuca ninata japichishcataca tucuimi ricungacuna. Chai ninaca manatac huañungachu” ninmi ningui» nirca.

49Shina nicpimi ñucaca: «¡Mandac Dioslla! Paicunaca ñucataca: “Cai runaca chimbapurashca parlocunallatami parlashpa purin” nincunami» nircani.