JUECES 14 - Biblia Quichua Cañar 2010

Filisteocunapuramanta cac huarmihuan Sansón cazarashcamanta

1Sansonca Timnat puebloman urai rishpami, chai pueblopi filisteocunapac ushita ricurca.

2Huasiman cutishpa paipac taita mamaman parlashpaca:

—Timnat pueblopimi filisteocunapac ushita ricurcani. Ñucata paihuan cazarachichic— nirca.

3Shina nicpimi, paipac taita mamaca:

—¿Can manapish circuncisionta ruhuashca, filisteopuramanta huarmihuan cazaranapac randica manachu ñucanchic aillupurapi, ñucanchic pueblopica huarmi tiyan?— nirca.

Shina nicpimi, Sansonca taitataca:

—Chai huarmitami munani, paihuan cazarachilla— nirca.

4Chai huatacunaca filisteocunami israelcunata macashpa causacurca. Chaimantami Mandac Diosca israelcunahuan, filisteocunahuan piñanacuchingapac chashna ruhuarca. Cai yuyaicuna Diosmanta shamushcataca taita mamaca mana yacharcachu.

5Sansonca paipac taita mamandimi Timnat puebloman urai rirca. Paicuna chai pueblo cuchupi tiyac uvas chagraman chayagricucpica, maltón leonmi piñarishpa shamushpa micugrirca.

6Mandac Diospac Espíritu Sansonpacman shamucpimi, shuc malta chivota huañuchic shina maquillahuan pitinacurca. Shina ruhuashcataca paipac taita mamamanca mana parlarcachu.

7Shinami puebloman yaicushpa Sansón munashca solterahuan parlarca.

8Asha punzhacuna quipa cazarangapac cuticushpami, Sansonca león huañushcata ricungapac ñanmanta caruyashpa rirca. Chaipica león huañushcapi achca avejacuna mishquita huachashcatami ricurca.

9Chai mishquita maquihuan japishpami Sansonca micushpa ñanta rirca. Ña taita mamahuan tupashpaca paicunamanpish cararcami. Shina carashpapish león huañushcamanta mishquita llucchishcataca mana parlarcachu.

10Sansonpac taitaca chai solterata ricugrircami. Chai quipaca Sansonca mosocuna ruhuac shinallatacmi paipish jatun micuita ruhuarca.

11Filisteocunaca quimsa chunga quipa huiñaicunatami Sansonhuan cachun apamurcacuna.

12Shina apamucpimi Sansonca:

—Cunanca cai imashi imashitami huillagrini. Cancuna cai canchis punzha fiesta tucuringacaman cai imashi imata nisha nicushcata tarishpa huillacpica, ñucami quimsa chunga lino churanatapish, quimsa chunga bodapi churanatapish cusha.

13Chai canchis punzha fiestapi ima nisha nicushcata mana huillashpaca cancunami quimsa chunga lino churanatapish, quimsa chunga bodapi churanatapish ñucaman cunguichic— nirca.

Shina nicpimi paicunaca:

—Imashi imashita huillai, uyashunllami— nirca.

14Shina nicpimi Sansonca:

—Huañuchishpa micucmantaca

micunami llucshirca.

Sinchi cacmantaca mishquimi

llucshirca— nirca.

Chai imashi imashi imata nisha nicushcataca quimsa punzhacaman mana cutichi pudircacunachu.

15Shina cashpami ña chuscu punzha tucucpi, Sansonpac huarmitaca:

—Cai imashi imashi imata nisha nicushcata cambac cusaman ima shinapish tapui. Mana cashpaca cantapish, taitapac huasi ucupuratapish rupachishunmi. Cancunaca ñucanchic charishcata quichungapacllami cayashcanguichic— nirca.

16Chaimantami Sansonpac huarmica paipac ñaupapi huacashpaca:

—Ñucata cuyanapac randica piñashpallami puringui, ñuca llactapi causaccunaman imashi imashita huillashpapish chai ima nisha nicushcataca mana ñucaman huillashcanguichu— nirca.

Shina nicpimi Sansonca:

—Ñuca taitamanpish, mamamanpish mana huillashcanichu. Shina cashpaca maitatac canmanca huillashayari— nirca.

17Shinami Sansonpac huarmica chai canchis punzha fiestacunapi huacacurcalla. Shina huacacucllapimi canchis punzhapica imata nisha nicushcataca huillarca. Chashna huillacpimi, huarmica chai pueblopi causaccunaman huillarca.

18Chai canchis punzha manarac inti tigracpimi, chai pueblo gentecunaca:

—¿Bunga mishquita atishpa

ashtahuan mishquica

tiyangachu?

¿Leonta atishpa ashtahuan

sinchica tiyangachu?— nirca.

Shina nicpimi Sansonca:

—Ñuca vaquillahuan

mana yapushpaca,

cai imashi imashi

imata nisha nicushcata

manatac huillanguichicmanchu

carca— nirca.

19Mandac Diospac Espíritu paipacman shamucpimi, Sansonca Ascalón puebloman urai rishpa, quimsa chunga filisteocunata huañuchishpa paicuna charishcata quichushpa, bodapi churanata imashi imashita huillaccunaman curca. Quipaca yallita piñarishpami paipac taitapac huasiman cutirca.

20Shina ricpimi Sansonpac huarmitaca Sansonpac ricsishca chai bodapi cac runallahuantac cazarachirca.