1Abías huañushpa paipac ñaupa taitacunahuan tandanacugricpica, Davidpac pueblopimi enterrarca. Paipac randica paipac churi Asami mandai callarirca. Chai llactapi causaccunaca pai alli mandacpimi chunga huatata sumacta causarcacuna.
2Asaca paita Mandac Diospac ñaupapica imapipish mana pandarishpami allita causarca.
3Paimi mana ricsishca dioscunapac altarcunatapish, lomacunapi tiyac altarcunatapish anchuchirca. Imamanpish riccha dioscunatapish paquishpami Asera huarmi diosta yuyarina yuratapish tucuchirca.
4Chashna ruhuashpami, Judá llactapi causaccunataca paicunapac ñaupa taitacunata Mandac Diosta servishpa, pai mandashcacunata pactachishpa causachun mandarca.
5Shinallatac Judá llactapi cac pueblocunamantaca lomacunapi tiyac altarcunatapish, imamanpish riccha dioscunatapish chingachircami. Pai mandacui punzhacunapica casilla sumac causaimi chai llactapica tiyarca.
6Chai llactapi sumac causai tiyashcamantami Judá llactapica jatun pircacunahuan cac pueblocunata ruhuarca. Casilla sumac causaita Dios cushcamantami chai huatacunapica paihuan macanacuccunaca mana tiyarca.
7Chaimantami Judá llactapi causaccunataca: «Cai llacta ñucanchicpac cashcamanta cai pueblocunata shayachishunchic, sinchi torrecunata ruhuashun. Pueblocunataca pircahuan muyundita jarcashpa aldabacunata charic pungucunata churashun. Ñucanchicca, ñucanchicta Mandac Diostami mashcarcanchic. Shina mashcacpimi, paica ñucanchic maipi cacpipish, casilla sumac causaita cun» nirca. Paicuna chashna ruhuai callaricpica, tucuimi alli llucshirca.
8Asaca escudocunata, lanzacunata apashpa puric Judapac soldadocunataca quimsa patsac huarangatami charirca. Benjaminpac soldadocunataca ishcai patsac pusac chunga huarangatami charirca. Paicunaca escudotapish apac, flechatapish cacharinata yachacmi carcacuna. Tucui paicunami macanacunata alli yachac sinchi runacuna carca.
9Paicunahuan macanacungapacmi Etiopía llactata mandac Zeraca shuc junu soldadocunahuan, quimsa patsac carretacunahuan Maresa puebloman llucshimurca.
10Chaimantami Asaca paicunahuan macanacungapac Maresa pueblo ladopi cac Sefata pambapi macanacungapac allichirirca.
11Asa paita Mandac Diosta caparishpa mañashpaca: «¡Mandac Dioslla, jatun poderta charicta, mana fuerzata charicta ayudacca shuctac can shinaca mana tiyanchu! Ñucanchicta Mandac Dioslla, ñucanchicta ayudaiyari. Canllapimi shunguta churanchic. Cai soldadocunahuan macanacungapacca cambac shutipimi rinchic. ¡Mandac Dioslla, canmi ñucanchic Mandac Dios cangui! Runacuna canta mishanataca mana pudinchu» nirca.
12Shina mañacpimi, Mandac Diosca Asapac ñaupapi, Judapac ñaupapi Etiopía soldadocunataca llaquichirca. Chaimantami paicunaca miticushpa callparca.
13Asaca paipac soldadocunahuanmi Gerar pueblocaman catirca. Etiopía soldadocunaca shucllapish mana saquirishpami, Mandac Diospac ñaupapipish, soldadocunapac ñaupapipish huañurcacuna. Paicuna ima charishcacunatapish achcatami aparcacuna.
14Chashnallatac Gerar pueblo muyundipi tiyac tucui pueblocunapipish macanacungapacmi yaicurcacuna. Chai pueblopi causaccunaca Mandac Dios manchaita cachacpimi, yallita chucchucurca. Chai pueblocunapica imapish achcami tiyarca. Chaimantami chai pueblocunapi tiyashcacunataca tucui aparcacuna.
15Shinallatac animalcuna shayana huasiman yaicushpami, achca ovejacunata, camellocunata apashpa, Jerusalenman cutircacuna.
Who We AreWhat We EelieveWhat We Do
2025 by iamachristian.org,Inc All rights reserved.
