2 REYES 9 - Biblia Quichua Cañar 2010

Israel llactata jatun mandac cachun Jehuta aceitehuancahuishcamanta

1Eliseoca Dios ima nishcata huillacpuramanta shucta cayashpami: «Allichirishpa, cai uchilla puñu aceiteta apashpa, Galaad llacta Ramot puebloman ri.

2Chaiman chayashpaca, Nimsipac nieto Josafatpac churi Jehutami ricungui. Paitaca huauquicunapac ladomantaca shuc ucuman pushangui.

3Chai quipaca gachupi cac aceiteta japishpa, paipac umapi cahuingui. Chashna cahuishpaca: “Mandac Diosca: ‘Ñucami cantaca Israel llactata jatun mandac cachun aceitehuan cahuini’ ninmi” ningui. Chai quipaca punguta pascashpa utca shamungui, ama shayaringuichu» nirca.

4Shina nicpimi, Dios ima nishcata huillac mosoca Galaad llactapi cac Ramot puebloman rirca.

5Chaiman chayacpica, soldadocunata mandaccunapurami tandanacushpa tiyacushca carca. Chaipi tiyacucpimi, Paica:

—Mandaclla, canmanmi shuc huillanata charini— nirca.

Shina nicpimi Jehuca:

—Tucui ñucanchicmanta ¿maijanmantac huillasha ningui?— nirca.

Shina nicpimi paica:

—Mandaclla, canmanmi huillasha nini— nirca.

6Shina nicpimi, Jehuca jatarishpa, ucuman yaicurca. Chai ucupimi chai moso aceitehuan umapi cahuishpaca:

—Israelcunata Mandac Diosca: “Ñucami, cantaca ñuca acllashca israelcunata jatun mandac cachun aceitehuan cahuini.

7Canta mandac Acabpac huasi ucupurataca canmi huañuchingui. Chashna ruhuashpami ñuca ima nishcata huillaccunata, tucui ñucata serviccunata huañuchishpa, yahuarta jichashcamantaca paicunatapish chashnallatac huañuchingui. Chai serviccunataca Jezabelmi huañuchichirca.

8Acabpac huasi ucupuracunaca tucuimi huañunga. Chashnami Israelpi causac Acabpac huasi ucupurata servishpa causaccunatapish, mana servishpa causaccunatapish tucui tucuchisha.

9Acabpac huasi ucupurataca Nabatpac churi Jeroboampac huasi ucupurata, Ahiaspac churi Baasapac huasi ucupurata shinami tucuchigrini.

10Jezabeltaca Jezreel pambapimi allcucuna micunga. Paitaca pipish mana enterrangachu” ninmi— nirca.

Shina nishpami, Dios ima nishcata huillacca punguta pascashpa callparca.

11Quipata Jehú paita mandacta serviccunapacman llucshicpi paicunaca:

—¿Tucuichu alli? ¿Chai juizhu illacca imapactac cambacman shamushca?— nirca.

Shina nicpi, Jehuca:

—Chai runataca cancunallatac ricsinguichicmi. Pai imata nishcatapish yachanguichicmi— nirca.

12Shina nicpimi paicunaca:

—¡Ama llullaichu! ¡Pai ima nishcata huillai!— nircacuna.

Shina nicpimi paica:

—Cashna chashna nishpami: “Mandac Diosca: Ñucami cantaca Israel llactata jatun mandac cachun aceitehuan cahuini” ninmi— nishpami huillarca.

13Shina nicpimi, paicunapac jahualla churanata utca llucchishpa, Jehú saruna gradapi churarca. Cashna ruhuashca quipami, cornetapi tocashpaca: «¡Jatun mandacca Jehumi!» nircacuna.

Jehú Israel llactata jatun mandac Joramta huañuchishcamanta

14Nimsipac nieto Josafatpac churi Jehuca Joramta huañuchingapacmi israelcunahuan pacalla parlanacurca.

Joramca Siria llactata jatun mandac Hazael ama yaicuchunmi, Galaad llacta Ramot pueblotaca tucui israelcunahuan cuidacurca.

15Jatun mandac Joramca Jezreel puebloman chugrita jambiringapacmi cutimushca carca. Paitaca Siria llactata jatun mandac Hazaelhuan macanacucucpimi, siriocuna chugrichishca carca. Chaimantami Jehuca: «Cancuna ñucata jatun mandac cachun munashpaca, maijan cai pueblomanta pacalla Jezreel pueblopi huillagrichunca mana saquinachu canguichic» nirca.

16Joram camapi ungushca cacpimi, Jehuca caballopi montashpa, Jezreel puebloman rirca. Shinallatac Judá llactata jatun mandac Ocoziaspishmi Joramta ricungapac shamushca carca.

17Jezreel torre jahuapi runa Jehú achca soldadocunahuan shamucucta ricushpaca:

—¡Achca soldadocuna shamucuctami ricuni!— nirca.

Shina nicpimi Joramca:

—Caballopi ric shuc soldadota cayashpa: “¿Allipacchu shamucungui?” nishpa tapuchun cachai— nirca.

18Chashna cachacpi, caballopi ric soldadoca:

—Jatun mandacca: “¿Allipacchu shamungui?” ninmi— nirca.

Shina nicpimi Jehuca:

—Canca ¿imapactac allipacchu shamungui ningui? ¡Ñucahuan tandanacungapac shamui!— nirca.

Torre jahuapi chapac runaca:

—¡Chai huillac runa paicunapacman chayashpaca mana cutimunchu!— nishpa huillarca.

19Chaimantami shuctac soldadota caballopi montachishpa cacharca. Chai soldado chayashpaca:

—Jatun mandacca: “¿Allipacchu shamungui?” ninmi— nirca.

Shina nicpimi Jehuca:

—Canca ¿imapactac allipacchu shamungui ningui? ¡Ñucahuan tandanacungapac shamui!— nirca.

20Torre jahuapi chapac runa cutinllatac chashna tucucta ricushpaca:

—¡Paipish paicunapacman chayashpaca, mana cutimunchu! Chaita shamuc runaca Nimsipac churi Jehulayami shamucun. Paica juizhu illac shinami shamun— nirca.

21Shina nicpimi Joramca:

—¡Ñuca carretata caballopi huatai!— nirca.

Paipac carretata caballopi ña huatacpimi, Israel llactata jatun mandac Jorampish, Judá llactata jatun mandac Ocoziaspish paicunapac quiquin carretapi Jehuta tupangapac llucshirca. Chashna llucshishpami Jezreel pueblomanta Nabotpac pambapi tuparca.

22Joramca Jehuhuan tapushpaca:

—Jehú, ¿allipacchu shamungui?— nirca.

Shina nicpimi paica:

—Cambac mama Jezabel yallita huainayashpa, yallita brujiashpa causacucpica, ¿maitatac allipac shamushayari?— nirca.

23Shina nicpimi, Joramca caballota cutichishpa, miticushpa callpashpa Ocoziastaca:

—¡Ocozías ñucanchicta umashcami!— nirca.

24Chashna callpacpimi, Jehuca paipac flechata arcomanta shitashpa, Jorampac lomopi japichishpa shunguta yallirca. Chaimantami paipac carretallapitac huañushpa tigrarca.

25Chai quipami Jehuca paipac soldadocunata mandac Bidcartaca: «¡Chai huañushcata apashpa, Jezreel pueblomanta Nabotpac pambapi shitai! Caitaca yuyarinami cangui. Chaica canpish, ñucapish paipac taita Acabta catishpa ricucucpi, Joram ima tucunata Mandac Dios huillashpaca:

26“Mandac Dios ñucami Nabotpac yahuartapish, paipac churicunapac yahuartapish caina ricurcani. Chaimanta chai pushtullapitacmi paitapish chashnallatac ruhuasha” nirca. Cunanca Mandac Dios huillashca shinallatac Joramta japishpa, Nabotpac pambapi shitagri» nirca.

Jehú Ocoziasta huañuchishcamanta(2 Cr 22.7-9)

27Chaita ricushpami, Judá llactata jatun mandac Ocoziasca huerta chaupipi tiyac huasiman rina ñanta miticushpa callparca. Chashna callpacpimi Jehuca: «¡Paitapish huañuchi!» nishpa catirca.

Chaimantami Ibleam pueblo ladollapi tiyac Gur huichaita carretapi callpacucpi chugrichirca. Ocoziasca Miguido pueblomanmi miticushpa callparca. Ashtahuanpish chaipimi huañurca.

28Chaipi huañucpimi, paita serviccunaca Jerusalenman shuc carretapi aparca. Chaiman apashpami, paitaca paipac ñaupa taitacunata enterrashcapi Davidpac pueblopi enterrarca.

29Acabpac churi Joram Israel llactataca chunga shuc huatata mandacucpimi, Ocoziasca Judá llactata mandai callarirca.

Jezabel huañushcamanta

30Chai quipami Jehuca Jezreel puebloman rirca. Chaita yachashpami Jezabelca ñahuitapish pintarishpa, acchatapish sumacta allichishpa ventanamanta chapacurca.

31Chashna chapacushpami, Jehú pueblo punguta yaicucucpica:

—¿Canta mandacta huañuchic Zimrica allillachu?— nirca.

32Shina nicta Jehú uyashpa, ventanata huichai ricushpaca:

—¿Pitac ñucahuan tandanacusha ninguichic?— nirca.

Shina nicpimi, mandaccunapuramanta ishcai, quimsa paita chaparca.

33Paicunatami Jehuca:

—¡Chai huarmita pambata shitaichic!— nirca.

Shina nicpimi, paicunaca chai huarmita pambata shitarca. Chashna shitacpimi, chai huarmipac yahuarca ashaca huasi quingraipi, ashaca caballocunapi saltarca. Chaillapitacmi paitaca caballocuna sarurca.

34Chai quipami Jehuca ucuman yaicurca. Ña micushca, ubiashca quipaca:

—Chai mana allita ruhuac huarmita apashpa enterragrichic. Ima shina cashpapish jatun mandacpac ushimi— nirca.

35Chai huarmita enterrangapac rishpaca, uma tulluhuan, chaquicunahuan, maqui tullullahuanmi tarircacuna.

36Chaita ricushpa Jehuman huillangapac cutimucpica:

—Mandac Dios tisbitapuramanta paita servic Eliasman huillashpaca: “Jezreel pambapimi Jezabeltaca allcucuna micunga.

37Jezabelpac cuerpoca chai pambapi yanga shinami Jezreel pambapica siricunga. Chaimantami paitaca pipish: ‘Caica Jezabel huarmipac cuerpomi mana ningacuna’ nishca canga” ninmi— nirca.