DEUTERONOMIO 31 - Biblia Quichua Cañar 2010

Moisespac randi Josueta pushachun churashcamanta

1Moisés israelcunata rimashpaca:

2«Ñucaca patsac ishcai chunga huatayucmi cani. Chaimanta maiman yaicunatapish, llucshinatapish mana pudinichu. Chaipac jahuapica Mandac Diosllatacmi: “Canca mana Jordán yacutaca pasanguichu” nirca.

3Ashtahuanpish Mandac Diosmi cancunapac ñaupata rishpa, chai llactapi causaccunata cancunapac ñaupapi tucuchinga. Chashna ruhuacpimi, llucchishpa cachanguichic. Mandac Dios nishca shinami Josueca cancunapac ñaupata pasanga.

4Mandac Diosca chai llactapi causaccunataca amorreocunata jatun mandac Sehonta, Ogta shinami paicunapac llactacunandi tucuchinga.

5Mandac Dios chai llactapi causaccunata cancunapac maquipi churacpimi, cancunaca ñuca mandashca shina ruhuanguichic.

6Paicunapac ñaupapica ama manchaichicchu. Mandac Diosca cancunahuanmi. Paicunata ricushpa, ama manchanguichicchu. Ama chucchunguichicchu. Paica cancunata mana saquingachu, mana cungaringachu» nirca.

7Chaimanta Moisés Josueta israelcunapac ñaupaman cayashpaca: «Ama manchaichu, sinchi cai. Canmi Mandac Dios ñaupa taitacunaman cungapac ari nishca llactamanca israelcunata ñaupashpa yaicugringui. Canmi chai llactataca paicunaman cungui.

8Mandac Diosmi ñaupashpa ringa. Paimi canhuanca canga. Mana saquingachu, mana canllata saquingachu. Ama manchaichu, ama chucchuichu» nirca.

Mandashcacunata rezashcamanta

9Moisesca cai mandashcacunata quillcashpami Mandac Dios-huan ari nishca quillcata huacaichina Arcata apac Levipac huahua huahuacunamanpish, israelcunata pushac yuyaccunamanpish curca.

10Moisesca paicunataca:

«Cada canchis huatapi, mañashcacunata perdonana, ramacunahuan chucllata ruhuana fiesta punzhapica,

11cai mandashcacunata Mandac Diospac acllashca pushtuman israelcuna tandanacumucpi rezanguichic.

12Caicunata uyashpa, yachacushpa Mandac Diosta manchachun, mandashcacunata quillcashca libropi tucui nishcacunata cazuchunmi caricunatapish, huarmicunatapish, huahuacunatapish, cancunahuan causac caru llacta runacunatapishmi tucuita tandachina canguichic.

13Paicunapac huahua huahuacunapish cai mandashcacunata manarac ricsishca cashpapish yachacushpaca, Mandac Diosta manchangami. Chashna yachacushpami Jordán yacuta pasashpa, chai llactapi yaicushpaca, Mandac Diosta tucui causaipi manchashpa causanga» nirca.

14Mandac Diosca Moisestaca:

«Riqui, ñami cambac huañuna punzhaca chayamushca, Josueta ñucahuan tupana huasiman pushai. Chaipimi pai imata ruhuanata mandasha» nirca.

Shina nicpimi, Moisesca Josuehuan Dios-huan tupana huasipi shuyarca.

15Chaipi cacpimi, Mandac Diosca paihuan tupana huasi yaicunapi suniclla puyupi ricurirca.

16Mandac Diosca Moisestaca: «Canca huañushpa, ñaupa taitacunahuan tandanacugringuimi. Israelcunaca paicuna ricushca llactaman chayashpaca, chaipi tiyac dioscunata catishpami huainayanga. Shinami ñucamanta caruyashpa, ñuca paicunahuan ari nishcatapish yangapi churanga.

17Chaimantami chai punzhapica paicunahuanca nina japiric shina piñarisha. Paicunata saquishpa, mana tigra ricucpimi tucuringa. Paicunataca achca llaquicuna, manchaicunami japinga. Chai llaquicunahuan cashpami: “¿Manachu chai llaquicunaca ñucanchic Dios mana ñucanchic-huan cacpi japicunga?” ninga.

18Shina cacpipish, ñucaca chai punzhacunaca manatac ñuca ñahuita ricuchishachu. Shuctac dioscunata catishcamantami chashna ruhuasha.

19Cunanca, cai cantota quillcashpa israelcuna cantachun yachachi. Cai cantollatacmi israelcuna llaquita apanatapish ricuchinga.

20Lechepish, mishquipish yacu shina tiyac allpata ñaupa taitacunaman cungapac ari nishca llactaman chayashpa, mana nicta micushpa huirayashpaca, shuctac dioscunapacman rishpami adoranga. Chashna causashpami ñuca mandashcacunata mana valichishpa, ñuca ari nishcatapish yangapi churanga.

21Paicuna manchaihuan, llaquihuan cacpica, cai cantomi paicunata yuyachinga. Paicunapac ñaupa taitacunaman cushami nishca llactaman manarac yaicucpimi, paicunapac yuyaicuna ima shina cashcata ñucaca yachasha. Chaimanta paicunapac huahuacunami chaita cantashpa yuyaringa» nirca.

22Moisesca chai punzhallatacmi cai cantota quillcashpa israelcunaman yachachirca.

23Mandac Dios Nunpac churi Josueta cachacushpaca: «¡Sinchicui, ama manchaichu! Canmi israelcunata ñaupashpa ñuca paicunaman cungapac ari nishca llactaman yaicungui. Ñucami canhuan casha» nirca.

Arca ñaupapi imata ruhuana cashcamanta

24Moisés cai mandashcacunapi ima nishcacunata shuc libropi tucui quillcashpa,

25Mandac Dios-huan ari nishca quillcata huacaichina Arcata apac levitacunaman cushpaca:

26«Mandashcacunata quillcashca librota japishpa, Mandac Dios-huan ari nishca quillcata huacaichina Arca ladopi churaichic. Chaipimi cancunata llaquichinata ricuchishpa tiyacunga.

27Cancuna mana cazuc sinchi shungu cashcataca yachanimi. Cunan ñuca cancunahuan pacta causacucpipish, Mandac Diosta mana cazuc cashpaca, ñuca huañushca quipaca, ¡imachari canguichic!

28Cancunapac aillucunata pushac yuyaccunatapish, caishuc mandaccunatapish ñuca ñaupaman tandachichic. Paicunamanmi paicuna uyachun caicunata rimasha. Chashnallatac paicunata llaqui japina cashcata ricuchichunmi jahua pachatapish, cai pachatapish churani.

29Ñuca huañushca quipaca huacllirishpami, ñuca mandashcacunamantapish caruyanguichic. Mandac Diospac ñaupapi cancunapac maquihuan mana allita ruhuashpa, Diosta piñachishcamantami quipa punzhacunapica llaqui japinga» nirca.

Moisés cantashcamanta

30Moisés cai cantopi tucui nishcacunata tandanacushca israelcunaman huillashpaca: