1Ashtahuanpish Jonasca Nínive llactapi causaccunata Dios mana llaquichishcamantami yallita piñarirca.
2Chaimantami Mandac Diosta mañashpaca:
—Mandac Dioslla, ¿manachu cashna ruhuanataca, ñuca llactapi cashparac yacharcani? ¡Chaimantami Tarsisman miticushpa utca rircani! Can Diosca yallita cuyac, mana utca piñaric, alli shungumi cangui. Llaquicmi cangui, mana llaquichicchu cangui.
3Cunanca, Mandac Dioslla, ñuca causaita quichuilla. Causanapac randica huañuimi ñucamanca ashtahuan alli— nirca.
4Shina nicpimi, Mandac Diosca:
—¿Chashna yallita piñarishpaca, allitachu ruhuangui?— nirca.
5Shina nicpimi, Jonasca chai llactamantaca inti llucshina ladoman rishpa, chucllata ruhuashpa, chaipi tiyarirca. Chai llacta ima tucucta ricungapacmi llandurishpa tiyacurca.
6Chaipi tiyacucpimi, Mandac Diosca inti yallita rupachicucpimi, llanduchichun, higuera yurata huiñachirca. Chaita ricushpami Jonasca yallita cushicurca.
7Cayandi tutamantaca Mandac Diosca chai higuera yurata micuchunmi, shuc curuta churarca. Chai curumi yurataca chaquichirca.
8Mandac Diosca inti llucshimucpimi, yallita rupac huairata cachashpa, Jonaspac umata yalli rupachirca. Shina rupachicpimi, huañunalla tucushpaca:
—¡Causanapac randica huañuimi ñucamanca ashtahuan alli!— nirca.
9Shina nicpimi, Mandac Diosca:
—¿Chai higuera yura chaquishcamantachu yallita piñaringui?— nirca.
Shina nicpimi Jonasca:
—¡Ari, huañungacamanmi piñarini!— nirca.
10Shina nicpimi, Mandac Diosca Jonastaca:
—Canca, mana can tarpushca, mana huiñachishca higuera yura shuc tutalla huiñashca, shuc tutallatac chaquishca yuramantami llaquiringui.
11Ñucaca, ¿manachu patsac ishcai chunga huaranga runacuna causana Nínive llactamantaca llaquisha? Paicunaca maijan alli lado maqui, lluqui lado maqui cactapish mana yachaccunami. Shinallatac animalcunapish chaipi tiyanmi— nirca.
Who We AreWhat We EelieveWhat We Do
2025 by iamachristian.org,Inc All rights reserved.
