2 REYES 20 - Biblia Quichua Cañar 2010

Ezequías ungushcamanta(2 Cr 32.24-26; Isa 38.1-8)

1Chai punzhacunami Ezequiastaca huañuna ungüi japirca. Shina cacpimi Dios ima nishcata huillac Amozpac churi Isaías paipacman rishpaca:

—Mandac Diosca: “Canca huañugringuimi, ña mana causanguichu. Chaimanta cambac huasi ucupurataca imata nina cashpapish utca ningui” ninmi— nirca.

2Shina nicpimi, Ezequiasca pirca ladoman tigrarishpa, Mandac Diosta mañashpaca:

3«Mandac Dioslla, cantami mañani. Cambac ñaupapi mana llullashpa, tucui shunguhuan canta cazushpa causashcataca yuyariyari» nirca.

Shina nishpami Ezequiasca yallita cuillata huacarca.

4Pungu chaupi pambaman Isaías manarac llucshicpimi, Mandac Dios Isaiasta rimashpaca:

5«Ñuca acllashcacunata mandac Ezequiaspacman cutirishpa: “Cambac taita Davidta Mandac Diosca: ‘Can mañashcataca uyanimi. Cambac huiquitapish ricunimi. Cantaca alliyachigrinimi. Quimsa punzha quipaca Mandac Dios ñuca huasiman ringui.

6Cambac causaitaca chunga pichca huatatami yapachisha. Cantapish, cai pueblopi causaccunatapish Asiria llactata jatun mandacpac maquimanta cacharichishami. Ñuca shutita ricsichingapac, shinallatac ñucata servic Davidta cuyashcamantami cai pueblopi causaccunataca cuidasha’ ninmi” nigri» nirca.

7Chaipimi Isaiasca:

—Higota tacaichic— nirca.

Chai tacashcata japishpaca nanacuc pushtupi churacpimi, alli tucurca.

8Ezequías Isaiasta tapushpaca:

—Mandac Dios alliyachinatapish, quimsa punzha quipa Mandac Diospac huasiman rinatapish, ¿imatac ricushpa crishayari?— nirca.

9Shina nicpimi Isaiasca:

—Mandac Dios pai nishcata pactachingapacca caitami canmanca ricuchinga. Canca, ¿chunga gradata inti llandu richunchu munangui? Mana cashpaca ¿chunga gradata huashaiman cutichunchu munangui?— nirca.

10Shina nicpimi Ezequiasca:

—Chunga gradata inti llandu ñaupanaca mana sinchichu. Ashtahuanpish chunga gradata huashaiman cutinami sinchi— nirca.

11Shina nicpimi, Dios ima nishcata huillac Isaiasca Mandac Diosta caparishpa mañarca. Chaipica, Acaz intita ricunapica chunga gradatami inti llanduta huashaiman cutichirca.

Babiloniamanta cachashca runacunataEzequías chasquishcamanta(2 Cr 32.27-31; Isa 39.1-8)

12Chai punzhacunallapitacmi Babilonia llactata jatun mandac Baladanpac churi Merodac-baladanca Ezequías ungushca cashcata yachashpa, quillcacunatapish, shuc caranacunatapish Ezequiasman cuchun cacharca.

13Ezequiasca paicuna chayacpica, yalli valiccunahuan allichishca ucutapish, cullquitapish, curitapish, mishquilla ashnacuc jambicunatapish, yalli valishca aceitetapish, macanacunata huacaichina ucutapish, ima tiyashcacunatapish tucuimi ricuchirca. Ezequiasca imata mana pacashpami, paipac huasipi, pai mandacuc llactacunapi tucui ima tiyashcata ricuchirca.

14Chaimantami Dios ima nishcata huillac Isaías jatun mandac Ezequiaspacman shamushpaca:

—¿Cambacman shamuc chai runacunaca imatatac nirca? ¿Maimantatac shamurca?— nishpa tapurca.

Shina nicpimi Ezequiasca:

—Paicunaca caru llacta Babiloniamantami shamushca— nirca.

15Shina nicpimi, cutinllatac tapushpaca:

—¿Cambac huasipica imatatac ricurcacunayari?— nirca.

Shina nicpimi Ezequiasca:

—Ñuca huasipica tucui ima tiyashcatami ricurcacuna. Allichishca huasipi ima tiyashcataca imata mana pacashpami ricuchircani— nirca.

16Shina nicpi, Isaiasca Ezequiastaca:

—Mandac Dios rimashcata uyai.

17Mandac Diosca: “Cambac huasipi ima tiyashcacunata, cambac taitacuna cunan punzhacaman ima huacaichishcacunata Babilonia llactaman apana punzhacunami shamun. Chaipica imatapish mana saquishpami apanga.

18Shinallatac can charishca churicunatapish Babilonia llactata jatun mandacpac huasipi eunucocuna tucushpa causachunmi apanga” ninmi— nirca.

19Shina nicpi, Ezequiasca Isaiastaca:

—Mandac Diospac rimashcata ñucaman huillashcaca allimi.

Paica: «Ñuca causacui punzhacunapica cushilla, sumaclla causaipish tiyangami» nishpami yuyarcani— nirca.

Ezequías huañushcamanta(2 Cr 32.32-33)

20Ezequiaspac shuctac ruhuashcacunapish, sinchita mandashcapish, yacu tanqueta ima shina ruhuashcapish, pueblo ucuman yacuta apashcapish, Judá llactata jatun mandaccuna imata ruhuashcacunata quillcashcapimi tiyacun.

21Ezequías huañushpa, paipac ñaupa taitacunahuan tandanacugricpica, paipac churi Manasesmi paipac randi mandarca.