1Mandac Diosca Hadrac llactata, Damasco llactata llaquichinatami huillacun. Shinallatac cai pachapi causaccunatapish, tucui Israel aillucunatapish chaparacunmi.
2Shinallatac Israel llacta cuchullapi cac Hamat llactatapish, Tiro, Sidón llactacunatapish chaipi causaccuna yallita yachaccuna cacpipish chaparacunmi.
3Tiropi causaccunaca muyundi pircata ruhuashpami, cullquitaca polvota shina, curitaca ñanpi siricuc turuta shina tandachirca.
4Shina cacpipish, Mandac Diosca paicuna charishcacunataca quichungami. Shina quichushpami, paicuna alli nishcataca mana cuchapi chingachinga. Cutin chai llactataca ninami tucuchinga.
5Chaita ricushpaca, Ascalón llactapi causaccunapish, Gaza llactapi causaccunapish yallita llaquirishpa chucchungami. Ecrón llactapi causaccunaca imata mana ruhuai pudishpa, yallita llaquiringami. Gaza llactata jatun mandacpish huañungami. Ascalón pueblopica pipish mana causangachu.
6Asdod llactapica shuctac llacta runacunami causanga. Chaipimi jatun tucushca filisteocunataca tucuchisha.
7Yahuaryuc aichata paicunapac shimimanta quichushami. Shinallatac mana micuna nishca micunatapish paicunapac quirumanta anchuchishami. Filisteocunapuramanta maijan saquishcacunaca ñucanchic Mandac Diospacmi canga. Paicunaca Judá llacta soldadocunata mandacmi tucunga. Ecronpi causaccunaca jebuseocuna shinami canga.
8Ñucaca pipish ama llucshichun, ama yaicuchunmi carpa huasita muyundita cuidashpa shayacusha. Cunan ñuca ñahuihuan ricushpa, cuidacucpica, llaquichiccunaca mana ashtahuan yaicui pudingachu.
9¡Sionpi causaccunalla,
yallita cushicuichicyari!
Jerusalenpi causaccunalla,
cushicushpa caparichicyari.
Riquichic, cancunata
jatun mandacca mama burropac
huahua maltón burritopimi
cancunapacman shamunga.
Paica cashcata ruhuac,
quishpichic,
cuyac shungumi canga.
10Paica Efraín llacta
carretacunatapish,
Jerusalenpi causaccunapac
caballocunatapish tucuchingami.
Macanacuna arcocunapish
paquishcami canga.
Llactacunapica
cushi causaimi tiyanga.
Paica shuctac lado mama
cuchamantaca chaishuc
lado mama cuchacaman,
jatun yacumanta cai pacha
tucuricamanmi mandanga.
11Yahuarta jichashpa,
cancunahuan ari nishcamantami
cantaca yacu jundachina
jutcupi prezu cacpi,
chaimanta llucchisha.
12Prezumanta cutina
yuyailla caccucunalla,
muyundita pircashcaman
cutimuichicyari.
Cunanca, cancuna
yallita llaquita
apashcamantaca chaupihuan
yalli allicunata cancunaman
cunatami huillacuni.
13Judá llactapi causaccunataca
ñuca arco shina
cachunmi allichisha.
Efraín aillutaca flecha
shinatami ruhuasha.
Sionpi causaccunataca
paicunata piña runacunapac
espada shinatami ruhuasha.
Cancunapac churicunamanca
Grecia llactapi causaccunata
llaquichichunmi
macana yuyaita cusha.
14Mandac Diosmi
paicunapac jahuapi ricuringa.
Paipac flechaca
relampa shinami llucshinga.
Mandac Diosmi cornetapi
tocashpa, ura lado acapana
huaira chaupipi shamunga.
15Tucuita Mandac Diosmi
paicunataca ayudanga.
Chaimantami paicunaca,
paicunata piñaccunataca
tucui tucuchishpa,
huaraca rumicunatapish
sarunacunga.
Vinota ubiac shinami
yahuarta ubianga.
Tazonpi jundachishca shina,
gachucuna altarpi yahuarta
jundachishca shinami ruhuanga.
16Chai punzhapica,
Mandac Diosmi,
pai acllashcacunataca
ovejacunata shina quishpichinga.
Chai llactapica coronapi
churana diadema
curi rumicuna shinami,
mai valishca canga.
17¡Chai llactaca mai sumacmi!
Trigoca quipa huiñaicunatami
sumacta huiñachinga.
Vinoca carihuan manarac
chayarishca solteracunatami
cushichinga.
Who We AreWhat We EelieveWhat We Do
2025 by iamachristian.org,Inc All rights reserved.
