MATEO 26 - Biblia Quichua Cañar 2010

Jesusta japichingapac yuyarinacushcamanta(Mr 14.1-2; Lc 22.1-2; Jn 11.45-53)

1Jesusca tucui chaicunata nishpami, paipac yachacuccunataca:

2—Caimanta ishcai punzha quipa, Pascua punzha cashcataca cancunallatac yachanguichicmi. Chai punzhapimi, Runa Tucungapac shamushca ñucataca, cruzpi chacatachun japichingacuna— nirca.

3Chai punzhami Israel curacunata mandac curacunapish, pushac yuyaccunapish, curacunata jatun mandac Caifaspac huasipi tandanacushpa,

4Jesusta umashpa pacalla japishpa huañuchinata yuyarinacurca.

5Ashtahuanpish paicunaca: «Cai fiesta punzhapica mana japishpa, saquishunlla, gentecuna ñucanchicta llaquichingapac jataringami» ninacurca.

Jesuspac umapi mishquilla ashnacucta churashcamanta(Mr 14.3-9; Jn 12.1-8)

6Jesusca Betania pueblopi causac, lepra ungüihuanmi nishca Simonpac huasipimi carca.

7Jesús mizapi tiyacucpimi, shuc huarmica achca valishca mishquilla ashnacucta yurac rumi botellapi apamurca. Chaitami Jesuspac umapi tallirca.

8Chaita yachacuccuna ricushpaca, yallita piñarishpaca:

—¿Ima nishpatac caitaca yangamanta tallinyari?

9Chaita achca cullquipi catushpa huacchacunaman cunachari, alli canman carca— ninacurca.

10Jesús chaita uyashpaca:

—¿Ima nishpatac cai huarmitaca rimaricunguichic? Saquichic. Paica ñucamanca allitami ruhuashca.

11Huacchacunaca punzhantami cancunahuan, ashtahuanpish ñucaca mana cancunahuanca causacushallachu.

12Cai mishquilla ashnacucta ñucapi tallishpaca, ñuca cuerpo sumacta enterrashca cachunmi allichichishca.

13Cai pachapi quishpirinamanta alli huillaita maipipish huillacushpaca, cai huarmi ruhuashcatapishmi huillanga. Pai ruhuashcaca yuyarishcami canga. Chaica chashnatacmi canga— nirca.

Judas Jesusta japichisha nishcamanta(Mr 14.10-11; Lc 22.3-6)

14Chunga ishcai yachacuccunapuramanta Judas Iscariote, curacunata mandac curacunapacman rishpaca:

15«Jesusta cancunaman cucpica, ¿imatatac ninguichic?» nirca. Chashna nicpimi, chai curacunaca quimsa chunga cullquita curca.

16Chaimanta pachami Judasca, ima shina Jesusta japichinata yuyaricurca.

Pascua micuita micushcamanta(Mr 14.10-11; Lc 22.7-23; Jn 13.21-30; 1 Cor 11.23-26)

17Levadura illac tandata micuna fiesta callari punzha, yachacuccuna Jesuspacman cuchuyashpaca:

—¿Maipitac Pascuata yuyarishpa, micunataca allichigrishun?— nirca.

18Chashna nicpimi Jesusca:

—Puebloman rishpa, shuc runahuan tupashpaca: “Ñucanchic yachachicca: ‘Ñucata japichina pachami chayamucun. Cambac huasipimi ñuca yachacuccunahuan Pascuata yuyarishpa micugrini’ ninmi” nigrichic— nirca.

19Shinami yachacuccunaca Jesús mandashca shina Pascua micuita allichirca.

20Ña tutayamucuctami Jesusca chunga ishcai yachacuccunahuan micungapac tiyarirca.

21Chashna micushpa tiyacushpami Jesusca:

—Cancunapuramanta shucmi, ñucataca japichinga. Chaica chashnatacmi canga— nirca.

22Chaimanta yallita llaquirishpa, cada shuc tapushpaca:

—Apunchic Jesús, ¿ñucachu japichicca cani?— nishpa tapurca.

23Chashna tapucpimi Jesusca:

—Cai ñuca micucuc platopi tandata jucuchishpa micucmi japichigrin.

24Runa Tucungapac shamushca ñucataca, Dios quillcachishcapi nishca shinami huañuchinga. Ashtahuanpish ñucata japichic runaca, ¡aij, imachari tucunga! Chai runaca mana huacharishca cashpachari alli canman carca— nirca.

25Chashna nicpimi, japichic Judasca Jesustaca:

—Yachachic, ¿japichicca ñucachu cani?— nishpa, tapurca. Chashna tapucpimi Jesusca:

—Ari, canmi cangui— nirca.

26Chashna micucushpami, Jesusca tandata japishpa, Diosta pagui nishpa, chaupishpa yachacuccunaman cushpaca:

—Japichic, micuichic. Caica ñuca aichami— nirca.

27Vino vasota japishpa, Diosta pagui nishpa, yachacuccunaman cucushpaca:

—Tucuilla cai vasomanta ubiaichic.

28Caica, Dios cancunahuan mushuc ari nishca yahuarmi. Caimi achca runacunapac juchacunata perdonangapac jichana ñuca yahuarmi.

29Ñucaca: Ñuca Taita mandacucpi, cancunahuan mushuc vinota ubiangacaman, cai uvas vinotaca mana ubiashachu nini— nirca.

Pedro Jesusta neganamanta(Mr 14.26-31; Lc 22.31-34; Jn 13.36-38)

30Himnota cantashca quipami, Olivos urcuman rircacuna.

31Chaipimi Jesusca:

—Dios quillcachishcapica: “Michictaca huañuchishami. Ovejacunaca caita chaitami ringa” ninmi. Chaimantami cancunaca cunan tutallatac ñucata saquishpa, caita chaita ringuichic.

32Shina cacpipish causarishca quipaca, cancunapac ñaupatami Galilea llactaman risha— nirca.

33Chashna nicpimi Pedroca:

—Caishuccuna canmanta caruyacpipish, ñucaca manatac saquishachu— nirca.

34Chashna nicpimi Jesusca:

—Cunan tutallatacmi gallo manarac cantacpi, quimsa cutin negangui. Chaica chashnatacmi canga— nirca.

35Chashna nicpimi Pedroca:

—Canhuan pacta huañuna cacpipish, mana negashachu— nirca. Chashnallatacmi tucui yachacuccunaca nirca.

Getsemaní huertapi Jesús Diosta mañashcamanta(Mr 14.32-42; Lc 22.39-46)

36Jesús, yachacuccunahuan Getsemaní huertaman chayashpaca:

—Ñuca chainicpimi Diosta mañangacaman, cancunaca caillapi tiyacuichic— nirca.

37Jesusca Pedrotapish, Zebedeopac ishcai churicunatapish pushashpa, rishpami, shungupi yallita llaquiri callarirca.

38Chashna cashpami Jesusca:

—Ñuca shungupica, huañuna nanaihuan shinami yallita llaquiricuni. Cancunaca mana sueñushpa, caipi ñuca shinallatac chaparacuichic— nirca.

39Jesusca ashata chainicman rishpa, pambacaman cumurishpa, Diosta mañashpaca: «Ñuca Taitalla, cai llaquita ñucamanta anchuchiyari. Shina cacpipish ama ñuca munashcata ruhuaichu, ashtahuanpish can munashcata ruhuai» nirca.

40Jesús chashna mañashpa, yachacuccunapacman cutimushpaca, paicuna sueñucuctami ricurca. Chaimantami Pedrotaca:

—¿Manachu ashallatapish ñuca shinallatac riccharishca cai pudircanguichic?

41Mana pandachishca cangapacca, Diosta mañashpa chaparacuichic. Cancunapac yuyaica sinchimi, ashtahuanpish cancunapac cuerpomi shaicushca— nirca.

42Cutinllatac Jesús mañangapac rishpaca:

—Ñuca Taitalla, llaquita ñuca apanatac cacpica, can munashca shina cachun— nirca.

43Jesús cutimushpaca, yachacuccuna cutinllatac sueñucuctami ricurca. Paicunapac ñahuicunaca sueñuihuan cashpami, mana pascarisha nirca.

44Jesús paicunata chaipi saquishpa, cutinllatac Diosta mañangapac rishpaca, puntaman mañashca shinallatacmi mañarca.

45Chashna mañashpa, yachacuccunapacman cutimushpaca:

—¿Samarishpa sueñucunguichicllachu? Ña jatarichic, ñami Runa Tucungapac shamushca ñucata, juchayuc runacunaman japichina horasca pactamushca.

46¡Jatarishpa jacuchic! Ñucata japichicca ñami chayamucun— nirca.

Jesusta japichishcamanta(Mr 14.43-50; Lc 22.47-53; Jn 18.2-11)

47Jesús chashna nicucpiracmi, chunga ishcai yachacuccunapuramanta Judasca, tauca runacunahuan shamurca. Chai runacunaca curacunata mandac curacunapish, cunac yuyaccunapish cachacpimi espadacunahuan, caspicunahuan shamurcacuna.

48Jesusta japichic Judasca, chai runacunataca: «Maijantami ñuca muchani, chaimi Jesusca. Chaita japinguichic» nishcami carca.

49Judas chayashcahuan, Jesuspacman cuchuyashpaca:

—Yachachic, ¿allillachu cangui?— nishpami mucharca.

50Chaimantami Jesusca:

—Uyai. ¿Imapactac shamurcangui?— nirca.

Shina nicpimi, Jesusta prezurcacuna.

51Chaipimi Jesus-huan caccunapuramanta shucca, espadata llucchishcahuan jatun mandac curapac servicta huactashpa ringrita pitirca.

52Chaimantami Jesusca:

—Espadata maipi huacaichinallapitac huacaichi. Maijanpish espadahuan macanacucca, espadallapitacmi huañunga.

53Ñuca Taitaman huaranga huaranga angelcunata ñucata cuidachun mañacpica, cunanllatacmi cachanman. Chaitaca, ¿manachu yachangui?

54Chashna ruhuacpica, ¿ima shinatac Dios quillcachishcapi nishcaca pactangayari?— nirca.

55Shinallatac Jesusca paita japiccunataca:

—¿Shuhuacta shinachu espadacunahuan, caspicunahuan japingapac, shamunguichic? Punzhantami Diosta mañana huasipi yachachishpa cancunahuan carcani. Chaipica mana japircanguichicchu.

56Ashtahuanpish Dios ima nishcata huillac quillcashca pactachunmi, chashna tucushca— nirca.

Chaipimi yachacuccunaca Jesusllata saquishpa, tucui miticushpa rircacuna.

Jesusta mandaccunapacman apashcamanta(Mr 14.66-72; Lc 22.56-62; Jn 18.15-18,25-27)

57Jesusta japishpaca, curacunata mandac Caifaspac huasimanmi aparca. Chaipimi mandashcacunata yachachiccunapish, pushac yuyaccunapish tandanacushca carca.

58Pedroca caru carutami chai huasi pungu pambacaman Jesusta catishpa rirca. Chaipimi Diosta mañana huasita cuidaccunahuan Jesusta ima ruhuacta ricushpa tiyacurca.

59Curacunata mandac curacunapish, tandanacushca mandaccunapish, Jesusta huañuchingapacmi llullashpa huillaccunata mashcarca.

60Tauca runacuna llullashpa huillacucpipish, ima juchata mana tarircacunachu. Shina cacpipish quipata ishcai llullashpa huillac runacuna shamushpaca:

61—Cai runaca: “Diosta mañana huasita urmachishpapish, quimsa punzhapica cutin shayachimanllami” nircami— nirca.

62Chaimantami curacunata mandac cura jatarishpa Jesustaca:

—Caita nishcamantaca, ¿manachu imata ningui?— nirca.

63Ashtahuanpish, Jesusca imata mana nircachu. Chaimantami mandac curaca:

—Causac Diospac shutipi huillai. ¿Canchu Diospac Churi Cristoca cangui?— nirca.

64Shina nicpimi Jesusca:

—Ari, canllatac nishcanguimi. Ashtahuanpish ñucaca: Cunanmanta pachami Runa Tucungapac shamushca ñucataca, poderyuc Diospac alli maquiman tiyacucta ricunguichic. Shinallatac jahua pachamanta puyupi shamucuctapishmi ricunguichic ninimi— nirca.

65Shina nicpimi, mandac curaca yallita piñarishpa, paipac churanata lliquishpaca:

—¡Cai runaca Diostami piñachishca! ¿Imapactac shuctac huillaccunaman tapushun? ¡Cancunallatacmi Diosta piñachishpa rimashcataca uyashcanguichic!

66Cancunaca, ¿imatatac ninguichic?— nishpa tapurca.

Shina nicpimi, chaipi caccunaca:

—¡Juchallishcami, huañunami can!— nircacuna.

67Chaimantami maijancunaca ñahuipi tucashpa macarca. Cutin maijancunaca huactashpami:

68—Cristo cashpaca, pi canta huactacta huillai— nircacuna.

Pedro Jesusta negashcamanta(Mr 14.66-72; Lc 22.56-62; Jn 18.15-18,25-27)

69Pedro canzha pambapi tiyacucpimi, shuc servic huarmi cuchuyashpaca:

—Canpish Galilea llactamanta Jesus-huan puricmi cangui— nirca.

70Pedro tucui chaipi caccunapac ñaupapi negashpaca:

—Mana ricsinichu, pimantachari nicungui— nirca.

71Pedro chai pungu pambamanta llucshicucpi, cutinllatac shuc servic huarmi ricushpaca:

—Cai runapish Nazaret pueblomanta Jesus-huan puricmi carca— nishpami, chaipi caccunaman parlarca.

72Cutinllatac Pedro negashpaca:

—¡Chai runataca mana ricsinichu!— nirca.

73Chai quipallatac, chaipi caccuna Pedropacman cuchuyashpaca:

—Canpish chaipurallatami cangui. Cambac rimaipish ricsinallami— nirca.

74Shina nicpimi, cutinllatac Pedroca:

—¡Pimantatacpish rimacunguichicchari! ¡Chai runataca mana ricsinichu! Ñuca llullacucpica, Diosllatac llaquichichun— nirca.

Chai ratollatacmi galloca cantarca.

75Chaipimi Pedroca, Jesús: «Manarac gallo cantacpimi, quimsa cutin negangui» nishcata yuyarirca. Chaimantami Pedroca canzhaman llucshishpa, yallita llaquirishpa huacarca.