1Mandac Dioslla,
ñuca mañashcata uyaiyari.
Ñuca caparishpa mañashcaca
canman uyarishca cachun.
2Ñuca llaqui punzhapi cacpica,
cambac ñahuita ama pacanguichu.
Cambac ringrihuan uyaiyari.
Ñuca mañacuc punzhapica
utcashpa cutichiyari.
3Ñuca causaica
cushni chingaric shinami tucuricun.
Ñuca tullucunaca
yanta ninapi rupacuc shinami rupacun.
4Ñuca shunguca chugririshpa
quihua shinami chaquishca.
Chaimantami ñuca micunatapish
cungarircani.
5Huacacushpallami, tulluhuan,
carallahuan tucushcani.
6Shitashca pambapi
causac pucu shinami cani.
Chaquishcapi causac mashu shinami cani.
7Huasi jahuapi pailla tiyacuc
zhuta shinami mana sueñuni.
8Ñucata piñaccunaca punzhantami
rimashpa llaquichin.
Ñucata yalli piñaccunaca
llaquichingapacmi tandanacushpa yuyaricun.
9Chaimantami tandata shina
uchupata micurcani.
Ñuca ubianataca huiquihuanmi chapuni.
10Can yallita piñarishcamantami
chashna tucuni.
Ñucata jahuaman huichicuchishpami
tangashpa shitarcangui.
11Ñuca causaica llandu shinami
chingaricun.
Quihua shinami chaquicuni.
12Mandac Dioslla,
ashtahuanpish canca,
huiñaitami mandashpa tiyacungui.
Cantaca huahua huahuami yuyaricunlla.
13Sión pueblota llaquina punzhacunaca
chayamushcami,
llaquingapac jatariyari.
¡Ayudana huatacunami ña chayamushca.
14Canta serviccunaca
pueblo urmashca rumicunatami cuyacun!
Chai pueblo ñuto allpatami llaquincuna.
15Mandac Diospac shutitaca
tucui llactapi causaccunami manchanga.
Can sumaimana cashcataca
tucui cai pachapi causac
jatun mandaccunami manchanga.
16Mandac Diosmi Siontaca shayachinga.
Paipac sumaimanami ricuringa.
17Imatapish mana ruhuai pudic gentecuna
mañashcataca uyangami.
Paicuna yallita mañacushcataca
mana yangapi saquishpa chasquingami.
18Quipa huahuacunapish
yachachunmi quillcashca canga.
Quipa huahuacunapish
chaita yachac chayashpaca,
Mandac Diosta alabangacunami.
19Mandac Diosca jahuapi cac
paipac huasimantami ricurca.
Jahua pachamantami
cai pachataca ricurca.
20Chaica prezucuna
huacashpa mañashcata uyangapac,
huañuchingapac charicushcacunata
cacharichingapac chashnaca ricurca.
21Shinallatac Mandac Dios tucuita
ruhuac cashcata Sión pueblopi huillachun,
cutin Jerusalenpica
paita jatunyachichunmi
chashnaca ruhuarca.
22Shuctac llactapi causaccuna
paita servingapac
shuc shinalla tandanacucpi,
huillachunmi
chashnaca tandachirca.
23Paimi chaupi ñanpi ñuca
fuerzata quichushpa
ñuca causana punzhacunatapish
chaupirca.
24Chashna ruhuacpimi ñucaca:
«Ñuca Dioslla,
ama ñuca causana chaupi
punzhacunata quichuichu.
¡Cambac huatacunaca
huiñai huiñaitami can!»
25Imapish manarac tiyacpimi,
cai pachataca ruhuarcangui.
Jahua pachaca cambac maquihuan
ruhuashcami can.
26Tucui chaicunaca tucuringami.
Ashtahuanpish canca causacunguillami.
Tucui chaicunaca churana shinami
maucayanga.
Mushuc churanata shinami cambiangui.
27Ashtahuanpish canca canllatacmi cangui.
Cambac huatacunaca mana tucuringachu.
28Canta serviccunapac huahuacunaca
cambac maquipimi
mana manchashpa causanga.
Paicunapac huahua huahuacunatapish
cambac ñaupamantaca
pi mana anchuchingachu.
Who We AreWhat We EelieveWhat We Do
2025 by iamachristian.org,Inc All rights reserved.
