MARCOS 11 - Biblia Quichua Cañar 2010

Jerusalén puebloman Jesús yaicushcamanta(Mt 21.1-11; Lc 19.28-40; Jn 12.12-19)

1Jerusalén puebloman chayagricushpaca, Betfagé pueblohuan, Betania pueblohuan tupanacui Olivos urcu chaquimanmi chayarca. Chaipi Jesús paipac yachacuccunapuramanta ishcaita

2cachashpaca:

—Chimba uchilla llactaman rishpaca, pi manarac montashca shuc burro huatashca shayacuctami ricunguichic. Chai burrota cacharishpa apamugrichic.

3Cancuna cacharicucpi maijan: “¿imapactac cacharicunguichic?” nicpica: “Apunchic Jesusmi apachun cachan, ñallami saquic shamushun” ninguichic— nirca.

4Paicuna rishpaca, huasi lado ñanpi shuc burro huatashca shayacucta tarishpami cacharicurca.

5Chaipi cac maijan caccunaca:

—¿Ima nishpatac burrotaca cacharicunguichic?— nirca.

6Ishcai yachacuccunaca Jesús imata nichun nishcatami nirca. Chashna nicpica, apachun saquircacunallami.

7Burrota Jesuspacman apamucpica, churanacunahuanmi sudarca. Ña sudashca burropimi, Jesusca montashpa rirca.

8Achcacunami paicunapac churanacunata Jesús rina ñanpi tendirca. Maijancunaca sacha ramacunatami pitishpa, ñanpi tendirca.

9Chashna churashpami, Jesuspac ñaupata riccunapish, huashata catishpa riccunapish:

—¡Dios cachashca shamucucca, alli nishca cachun! ¡Sumac cushicui cachun!

10¡Ñucanchic ñaupa mandac David mandashca shina mandangapac shamucucca, alli nishca cachun! ¡Jahua pachapipish alli nishca cachun!— nircacuna.

11Jesusca Jerusalenman chayashpaca, Diosta mañana huasimanmi yaicurca. Chai ucupi tucuita ricushpaca, ña tutayagricpimi, paipac chunga ishcai yachacuccunahuan Betania puebloman rirca.

Higo yurata ama pucuchun nishcamanta(Mt 21.18-19)

12Cayandi punzha Betania pueblomanta llucshicushpaca Jesusca yarcachircami.

13Chaimantami carumanta shuc pangasapa higo yurata ricushpa, “ñami pucushca canga” yuyashpa, ricungapac rirca. Chai yuraman chayashpa ricucpica, manarac pucuna punzhacuna cashcamantami chushac pangalla junda cashca carca.

14Chaimantami Jesusca chai yurataca:

—Cai yuramantaca, ama pi ashtahuan micuchun— nirca.

Chashna rimactaca, paipac yachacuccunaca uyacurcami.

Jesús Diosta mañana huasimanta catuccunatallucchishpa cachashcamanta(Mt 21.12-17; Lc 19.45-48; Jn 2.13-22)

15 Jesusca Jerusalén puebloman chayashpami, Diosta mañana huasiman yaicushpa catuccunatapish, randiccunatapish llucchishpa cacharca. Cullquita cambiaccunapac mizacunatapish, palomacunata catuccuna tiyarinacunatapish tigrachishpami shitarca.

16Diosta mañana huasi ucupica imata apashpa purichunca mana saquircachu.

17Jesusca chaipi caccunataca yachachishpaca:

—Dios quillcachishcapica: “Ñuca huasica tucui llactamanta shamuccuna ñucata mañana huasimi canga” ninmi, ashtahuanpish cancunaca shuhuaccuna miticuna machaitami ruhuashcanguichic— nirca.

18Chaita uyashpaca, mandashcacunata yachachiccunapish, curacunata mandac curacunapish Jesustaca ima shina huañuchinatami yuyaricurca. Chaica, tucui gentecunami “Jesusca allitami yachachin” nic carca. Chaimantami manchashpa huañuchinata munarca.

19Ña chishitaca Jesusca Jerusalenmanta llucshishpa rircami.

Higo chaquishcamanta(Mt 21.20-22)

20Cayandi tutamanta ñanta ricushpaca, higo yura sapindi chaquishcatami ricurca.

21Chaimanta Pedroca Jesús nishcata yuyarishpaca:

—Yachachic ricui. Can llaquichishca yuraca, chaquishcami— nirca.

22Shina nicpimi Jesusca:

—Diospi crichic.

23Maijanpish tucui shunguhuan crishpa, mana caita chaita yuyashpa, cai urcuta “caimanta anchuri, jatun cuchaman shitari” nicpica, ringallami. Chaica chashnatacmi canga.

24Chaimantami ñucaca nini: Cancuna crishpa, imata mañacushcata japina yuyaihuan Diosta mañashpaca japinguichicmi.

25Cancuna Diosta mañacushpaca, maijanta piñachishca cashpaca perdonaichic. Chashna ruhuacpimi, jahua pachapi cac cancunapac Taitapish cancunapac juchacunata perdonanga.

26Cancuna shuccunata mana perdonacpica, jahua pachapi cac cancunapac Taitapish cancunapac juchacunata mana perdonangachu— nirca.

“¿Pitac cantaca chashna ruhuachicun?” nishpa, Jesustatapushcamanta(Mt 21.23-27; Lc 20.1-8)

27Chai quipami Jerusalén puebloman cutimurcacuna. Chaipica Diosta mañana huasipi Jesús puricucpimi, Israel curacunata mandac curacunapish, mandashcacunata yachachiccunapish, cunac yuyaccunapish paipacman cuchuyarca.

28Shina cuchuyashpaca:

—¿Pi mandacpitac chashna ruhuacungui? ¿Pitac canman poderta curca?— nirca.

29Shina nicpimi Jesusca:

—Ñucapish cancunata tapusha, ñuca tapushcata cancuna cutichicpica, ñucapish pi chashna ruhuachun mandashcata huillashallami.

30Bautizac Juan bautizachunca, ¿Dioschu cacharca, mana cashpaca runacunallachu cacharca? Huillaichic— nirca.

31Chashna tapucpica, paicunapura rimanacushpaca:

—“Diosmi cachashca” nicpica: “Shinashpaca, ¿ima nishpatac Juan huillashcataca mana crircanguichic?” ningami.

32Ñucanchic: “Runacunallami Juantaca cacharca” ninapish mana allichu— ninacurca.

Tucui gentecuna “Juanca Diosmantatacmi huillacun” ninacucta uyashcamantami, manchashpa imata mana ni pudirca.

33Chaimantami Jesustaca:

—Mana yachanchicchu— nirca.

Shina nicpica Jesusca:

—Shinashpaca, ñucapish pi mandacpi chashna ruhuacushcataca mana huillashachu— nirca.