APOCALIPSIS 11 - Biblia Quichua Cañar 2010

Diosmanta ishcai huillaccunamanta

1Chai quipaca, carrizo caspi shina shuc medina varata ñucaman cushpami: «Jatari, Mandac Diosta mañana huasitapish, altartapish medi. Chaipi Diosman mashna mañaccunatapish yupai.

2Ashtahuanpish Mandac Diosta mañana huasi canzha pambataca ama medinguichu. Chaica Diosta mana ricsiccunaman cushcami. Paicunami chuscu chunga ishcai quillata Diospaclla cac pueblotaca llaquichinga.

3Chai punzhacunapica ishcai huillaccunatami sharpa churanata churarishpa huaranga ishcai pasac sucta chunga punzhacunata ñucamanta huillachun mandasha» nirca.

4Chai ishcai huillaccunaca cai pachata Mandac Diospac ñaupapi shayacuc ishcai olivos yuracuna, shinallatac ishcai candelerocunami can.

5Paicunata maijanpish llaquichisha nicpica, shimimanta ninata llucchishpami rupachinga. Chashna rupachicpimi, maijanpish llaquichicca huañunga.

6Chai ishcai huillaccunaca, paicuna huillacui punzhacuna ama tamyachun, tamyata jarcai pudincunami. Yacucunatapish yahuarta ruhuangapac poderta charincunami. Allpa pachapi ima tiyashcatapish tucuilaya llaquicunahuan, mashna cutinpish llaquichi pudincunami.

7Tucuita huillashca quipaca, manchaipac animal jatun jutcumanta llucshishpami, paicunahuan macanacushpa, atishpa huañuchinga.

8Chai huañushcacunaca jatun pueblo plazapimi siricunga. Chai pueblollapitacmi Mandac Apunchic Jesustaca chacatarcacuna. Chai pueblotaca Sodoma pueblohuan, Egipto llactahuanmi chimbapurashca.

9Chai huañushcacunataca tucui aillucunapish, tucuilaya rimaita rimaccunapish, tucuilaya gentecunapish, shinallatac tucui llactacunamanta caccunami quimsa punzha chaupicaman siricucta ricungacuna. Chashna ricushpapish, enterrachunca mana saquingacunachu.

10Dios ima nishcata huillac chai ishcaicunaca yallitami cai pachapi causaccunataca llaquichishca carca. Chaimantami chai ishcai huañushcata ricushpaca, yallita cushicushpa, caishuc chaishuc imatapish caranacunga.

11Ashtahuanpish quimsa punzha chaupi tucucpica, causaita cuc espirituta Dios cachacpimi, paicunaca causarishpa jatarirca. Chaita ricuccunaca yallitami mancharirca.

12Chai ishcai huillaccunaca jahua pachamanta: «¡Caiman huichicuichic!» nishpa, sinchita caparishcatami uyarcacuna. Chaipica paicunata piñaccuna ricucucpimi puyupi huichicurca.

13Chai pachaca allpami yallita chucchurca. Shina tucucpica chai pueblota chungapi chucpishcamanta shuc parte urmacpimi canchis huaranga gentecuna huañurca. Mana huañushca gentecunaca manchaihuanmi jahua pacha Diosta alli nircacuna.

14Ishcainiqui llaquica tucurinmi. Shina cacpipish, quimsaniqui llaquica ñallami chayamugrin.

Canchisniqui cornetapi tocashcamanta

15Canchisniqui ángel cornetapi tocacpimi jahua pachamanta sinchita caparishpaca:

«Tucui cai allpa pacha

llactacunaca,

ñucanchic Diospac,

shinallatac pai cachashca

Quishpichic Cristopac

mandanami tucushca.

Paimi huiñai huiñaita mandanga» nirca.

16Shina caparicpimi Diospac ñaupapi cac, paicunapac tiyarinapi tiyacuc ishcai chunga chuscu yuyaccuna pambacaman cumurishpa, Diosta alli nircacuna.

17Paicunaca:

«¡Poderyuc Mandac Dioslla!

Cantaca pagui ninchicmi.

Canllatacmi cangui,

canllatacmi carcangui.

Tucui ima ruhuanatapish

canllatacmi charingui.

Chaillahuantacmi

tucui mandanatapish callarishcangui.

18Tucui llactacunapi

causaccunami piñarishca.

Can piñarishpa llaquichina

punzhami chayamushca.

Chai punzhaca

huañushcacunata taripana,

cambacta ruhuac

can ima nishcata huillaccunaman,

cambaclla caccunaman,

cambac shutita alli niccunaman,

jatunman cashpa,

uchillaman cashpa

japina cashcata

cuna punzhami can.

Shinallatac cai pachata

llaquichiccunata tucuchina

punzhami chayamushca» nircacuna.

19Shina cacpica, jahua pachapi tiyac Diosta mañana huasimi pascarirca. Chaipica Dios-huan ari nishca Arcami ricurirca. Urcucuna tulun nishcapish, rimashcacunapish uyarircami. Relampa achic nishcapish ricurircami. Allpapish chucchurcami, rundupish yallitami urmarca.