1Diosta mana manchac runaca
pipish mana caticucpimi miticushpa callpan.
Ashtahuanpish cashcata ruhuac runaca
león shinami imatapish mana manchan.
2Llactapi causaccuna mana cazushcamantami
mandaccunaca shuctac shuctac ricurin.
Ashtahuanpish yachaisapa mandacca
pipish mana cuyuchipac mandacunllami.
3Huaccha runa caishuc huaccha
runallatatac shuhuashpaca,
yallita tamyashpa shamushpa
micuna illacta saquic shinami.
4Mandashcamanta caruyac runacunaca
Diosta mana manchaccunatami alli nin.
Ashtahuanpish mandashcata pactachiccunaca
paicunata mana ricunayachishpami piñancuna.
5Millai runacunaca
allita ruhuanataca mana entendincunachu.
Ashtahuanpish Mandac Diosta
mashcaccunaca tucuitami entendin.
6Chayuc cashpapish millaita
ruhuashpa causanapac randica,
huaccha cashpa allita
ruhuashpa causanami ashtahuan alli.
7Mandashcata pactachicca
alli yuyaiyuc churimi.
Ashtahuanpish micushpalla
causac runahuan tandanacuc churica
taitapac pingaimi.
8Cullquita mañachishpa
interesta yallita japic runaca
huaccha runata llaquic runamanmi
huacaichicun.
9Maijanpish mandashcata
mana uyasha nishpa caruyactaca
pai mañashcatapish Mandac Diosca
mana uyanayachinchu.
10Allita ruhuaccunata pandachishpa,
mana alli ñanpi churac runaca
paillatac allashca jutcullapitacmi urmanga.
Ashtahuanpish allita ruhuaccunaca
allicunatami japinga.
11Chayuc runaca paipac yuyaipica
yachaisapa cani yuyanmi.
Ashtahuanpish huaccha shinallatac,
yuyaisapa runami yachac cashcataca ricun.
12Cashcata ruhuaccuna cushicucpica,
yallita cushicuimi tiyan.
Ashtahuanpish Diosta mana manchaccuna
jataricpica, tucuimi miticuncuna.
13Maijanpish paipac juchata pacacca,
mana alli causai pudingachu.
Ashtahuanpish juchacunata huillashpa,
tucuita saquicpica Diosca llaquingami.
14Tucui causaipi Diosta manchacca
yallitami cushicun.
Ashtahuanpish paipac shunguta sinchiyachicca
llaquipimi urmanga.
15Huaccha gentecunata
Diosta mana manchac mandacca
león huacacuc shina,
yarcaihuan cac oso shinami can.
16Yuyai illac mandacca
gentecunata llaquichishpallami mandan.
Ashtahuanpish chayucyanata mana munac
mandacca unaitami mandanga.
17Pitapish huañuchishpa
yahuarta jichac runaca
pai huañungacamanmi miticushpa puringa.
Paitaca huañunamanta mana pi jarcanchu.
18Allita ruhuashpa causac runaca
ima llaquimantapish quishpiringami.
Ashtahuanpish mana allita ruhuashpa
causac runaca llaquipimi urmanga.
19Chagrapi trabajashpa causacca
huicsa pactatami micun.
Ashtahuanpish quilla runacunahuan
tandanacucca huacchallami causanga.
20Cashcata nic runaca
yallita bendiciashcami canga.
Ashtahuanpish utca chayucyanata munacca
llaquichishcatacmi canga.
21Ñahuita ricushpalla chicanyachinaca
mana allichu.
Maijancunaca
ashalla micunallamantami juchallincuna.
22Misa runaca utca
chayucyanallatami munashpa causan.
Ashtahuanpish huaccha tucunataca
mana yachanchu.
23Mana allita ruhuac runata
alli nishcamanta alli nishca
canapac randica, cunashpa rimac runami
alli nishca canga.
24Taita mamapacta shuhuanaca
allimi nic runaca
imatapish tucuchic runahuan apanacucmi.
25Chayucyanallata munac runaca
piñanacuillapimi churan.
Ashtahuanpish Mandac Diosta
yuyarishpa causac runaca
imapipish allimi causanga.
26Pai yuyarishcallapi
shunguta churac runaca
yuyai illac runami.
Ashtahuanpish alli yachac runaca
ima llaquimantapish quishpiringami.
27Huaccha runaman carac runaca
mana imapish illacchu causanga.
Ashtahuanpish mana ayudasha nishpa
ñahuita pacac runaca
yallita mana alli nishcami canga.
28Diosta mana manchaccuna
mandangapac ricpica,
gentecunaca miticungami.
Ashtahuanpish paicuna chingaricpica,
cashcata ruhuaccunami
alli nishca cancuna.
Who We AreWhat We EelieveWhat We Do
2025 by iamachristian.org,Inc All rights reserved.
