1Cuyashca criccuna, Diosmanta alli huillaita huillangapac cancunapacman rishpaca, mana entendipac, yachac tucushca rimaicunahuanca mana huillarcanichu.
2Ñuca cancunahuan cashpaca, ima shuctac yachanata mana munashpami, Jesucristomanta, pai cruzpi huañushcallamanta yachanata munarcani.
3Cancunahuan cashpaca, manchaihuan irquiyashca, chucchucucmi carcani.
4Cancuna crichunca, imata parlashpapish, alli huillaita huillashpapish, tucuita yachac shina alaja rimaicunahuanca mana huillarcanichu. Chaipac randica Diospac Espiritupac poderhuanmi cricta ruhuarcani.
5Chaitaca, mana gentecunapac yachaillamanta crichun, ashtahuanpish Diospac podermanta crichunmi, chashnaca huillarcani.
Diosca paipac Espirituhuan yuyaita cuc cashcamanta6Ashtahuanpish ña sinchi criccuna cashpaca, alli yachai rimaicunahuan rimanacunchic. Cai alli yachai rimaicunaca mana cai pachamantachu, mana jatun mandaccunamantachu. Mandaccunaca chingariccunallami.
7Ñucanchicca huiñaita sumac llactapi causagrichunmi, pipish mana yachashca, cai pachata Dios manarac ruhuashpa, huacaichishpa charicushca yachaicunata huillacunchic.
8Chaitaca cai pacha mandaccunaca mana yacharcacunachu. Paicuna yachashca cashpaca, Mandac Apunchic Jesustaca mana chacatanmanchu carca.
9Ashtahuanpish Dios quillcachishcapica:
«Imapish mana ricushcata,
mana uyashcata
shinallatac jaicapi
mana yuyashcatami,
paita cuyaccunamanca
Diosca cusha nicun» ninmi.
10Ashtahuanpish Diosmi paipac Espirituhuan ñucanchicman yachachishca. Diospac Espirituca tucuitami ricsin, Dios imata yuyacushcatapish yachanmi.
11Shungupi imata yuyacushcata gentecunapuraca pi mana yachanchu, ashtahuanpish paipac shungupi cac espiritullami yachan. Chashnallatacmi Dios imata yuyacushcataca gentecunaca mana yachan, chaitaca Diospac Espiritullami tucuita yachan.
12Ñucanchicca mana cai pacha espiritutachu chasquircanchic, ashtahuanpish Dios cushca Espiritutami, pai cuyashpa yachachishcacunata entendingapac chasquircanchic.
13Chaimantami ñucanchicca mana ñucanchic yuyaillamanta ashtahuanpish Diospac Espíritu yuyaita cushcallatac rimanchic. Shina cashpami Diospac Espíritu yuyaita cushcallata Paimanta munaccunamanca yachachinchic.
14Diospac Espirituta mana charicca Espíritu cushcacunataca mana chasquisha ninchu. Chaicunaca paimanca pucllashca shinami. Shinallatac imata nisha nicushcatapish mana entendinchu. Chaitaca Diospac Espíritu yuyachicllapimi, yachac chayancuna.
15Ashtahuanpish Diospac Espiritumanta yachanata munacca alli cashcatapish, mana alli cashcatapish yachanmi. Paitaca pi mana juchanchi pudinchu.
16Dios quillcachishcapica: «Mandac Diospac yuyaitaca, ¿pitac ricsingayari? Shinallatac paitaca, ¿pitac yachachingayari?» ninmi.
Shina cacpipish, ñucanchictaca Cristomi yuyaita cushpa yachachicun.
Who We AreWhat We EelieveWhat We Do
2025 by iamachristian.org,Inc All rights reserved.
