1Ñucaca Pablomi cani. Cancunapac ñaupapi cashpaca, manchaihuanshi cani, cutin carupi cashpaca, pitapish mana manchashpa rimarini nicucpipish, Cristo llaquishpa cuyashcamantami cashna mañani:
2Ñuca ricungapac rishpa, ñucata “gentecuna yuyashca shinatami ruhuashpa puricun” niccunahuan ama rimanacuchunca, cancunarac utcashpa allichichic. Mana cashpaca, ñucallatacmi paicunahuan sinchita rimanacuna yuyaihuan cani.
3Aichayuc, tulluyuc gentecuna cashpapish mana cai pacha gentecuna shinachu macanacunchic.
4Ñucanchic macanacunaca mana cai pachapi tiyac macanacuna shinachu, ashtahuanpish Diospac podermi jatun pirca shina jarcaccunata tucui chingachipac can.
5Chashnami juchanchiccunatapish, «allimi canchic» nishpa, Diosta ricsinata jarcaccunatapish, tucui chingachishpa gentecunapac yuyaica Cristota cazuchun nishpa paiman chayachinchic.
6Cancuna tucuita cazushca quipaca, mana cazuccunatami llaquichina yuyailla canchic.
7Cancunaca jahualla ima shina cashcatami ricunguichic. Maijanpish “Cristopacmi cani” nishpa paillata niricushpaca, ñucanchictapish Cristopac cashcatami yuyana can.
8Apunchic Jesús mandashcamanta, ñuca cancunata imatapish ruhuachun nishpa ashata jatun tucushpa mandashpapish, mana pinganichu. Apunchic Jesusca ñucataca mana cancunata chingachichunchu mandarca, ashtahuanpish alli cricta ruhuashpa, sinchiyachichunmi mandarca.
9Cai cachashca quillcacunaca “ñucanchicta manchachingapacmi” nishpa ama yuyanguichicchu ninimi.
10Ñucataca maijancunaca: “Pai quillcashcaca sinchitami riman, ashtahuanpish pai quiquin caipi cashpaca, shina shinallami. Shinallatac pai rimashpaca, pitapish mana cazuchinchu” nincunami.
11Maijanpish chashna nicca quillcapi nishca shinallatac ñucanchic carupi cashpapish, cancunapacman rishpapish, chashnallatac rimac cashcatami yachana can.
12“Ñucanchicca allimi canchic” niccunapurapish, paicuna shinapish mana cashun ninchicchu. Paicunaca allimi canchic nishpa chai shinallatacmi canchic nishpaca yuyai illaccuna shina cashcatami ricuchincuna.
13Ñucanchicca allimi canchic nishpaca mana yallita jatun tucushunchu, ashtahuanpish Dios imatapish ruhuachun nishcallatami ruhuacunchic. Paillatacmi cancunapacmanpish chayachun cacharca.
14Cancunapacman Cristomanta alli huillaita huillangapac shamushpaca, Dios maicamanlla ruhuachun nishcacaman ruhuashpami ñucanchicrac huillangapac shamurcanchic.
15Ñucanchicta Dios maicaman ruhuachun nishcamanta, shuccuna ruhuashcamanta yallita ruhuashpaca mana jatun tucunchicchu. Ashtahuanpish Dios maicaman ruhuachun nishcata ruhuashpaca, cancuna alli crishpa sinchiyashpa catichunmi, ashtahuan trabajanata munanchic.
16Chashnami cancunapac llactamanta ashtahuan carupipish quishpirinamanta alli huillaitaca huillangapac rinatami munanchic. Shina cashpapish shuccuna ña huillashca gentecunapacman chayashpa, “ñucanchicmi huillac canchic” nishpa jatun tucunataca mana munanchicchu.
17Maijanpish jatun tucusha nishpaca, Mandac Diosmanta jatun tucuchun.
18Maijanpish paillatac “allimi cani” nirishpa jatun tucuctaca, Diosca mana alli ningachu, ashtahuanpish Diosllatac paita alli nicpimi, paica alli nishca canga.
Who We AreWhat We EelieveWhat We Do
2025 by iamachristian.org,Inc All rights reserved.
