JEREMÍAS 42 - Biblia Quichua Cañar 2010

Johananman huillashcamanta

1Soldadocunata mandaccunapish, Careapac churi Johananpish, Osaiaspac churi Jezaniaspish, gentecunapish uchillamanta callarishpa yuyaccamanmi

2Dios ima nishcata huillac Jeremiaspacman shamurca. Paicunaca:

—Ñucanchic mañashcata uyaiyari. Ñucanchicmantapish, maijan saquirishca gentecunamantapish Mandac Diosta mañaiyari. Ñucanchicca achca cashpapish ashallami saquirishcanchic. Chaitaca canllatac ricunguimi.

3Canta Mandac Dios maijan ñanta catinatapish, imata ruhuanatapish ñucanchicman yachachichun mañaiyari— nirca.

4Shina nicpimi, Dios ima nishcata huillac Jeremiasca:

—Allimi. Cancuna mañashca shina, Mandac Diosta mañagrinimi. Mandac Dios tucui imata nishcataca mana pacashpami cancunaman huillasha— nirca.

5Shina nicpimi, paicunaca Jeremiastaca:

—Mandac Dios tucui canman nishcatami ruhuashun. Ñucanchic nishca shinatac mana ruhuacpica, cashcata nic, imatapish pactachic Mandac Diosllatac ricuchun.

6Mandac Dios imatapish ruhuachun nishcataca alli canatapish, mana alli canatapish ruhuashunllami. Cantaca mañachunmi cachanchic. Chashna alli ruhuashpami alli causashun— nirca.

7Chunga punzha quipami Mandac Dios Jeremiasman huillarca.

8Chaimantami Jeremiasca Careapac churi Johanantapish, paihuan cac soldadocunatapish, mandaccunatapish, uchillamanta callarishpa yuyaccaman tucui gentecunata cayarca.

9Chashna cayashpaca: «Cancunaca ñucataca israelcunata Mandac Diosta cancunamanta mañachunmi cacharcanguichic. Paica:

10Cancuna cai llactamanta mana llucshishpa, caipi causai callaricpica, cutin sinchiyachishpa, mana tucuchishachu. Cancunataca tarpushca shinata ruhuashpa, mana pilashachu. Cancunata llaquichishcamantaca llaquirinimi.

11Cancuna manchana Babilonia llactata jatun mandactaca ama manchaichicchu. Paipac maquimanta cacharichishpa, quishpichingapacca ñucami cancunahuan casha. Paitaca ama manchaichicchu.

12Ñuca cancunata llaquicpica, chai jatun mandacpish cancunata llaquingami. Shina llaquishpami, cancunapac llactaman cutichishpa cachanga. Chaitaca Mandac Dios ñucami nini.

13Ashtahuanpish Mandac Dios mandashcata mana cazushpa: “Cai llactapica mana causashunchu.

14Chaipac randica Egiptomanmi rishun. Chaipica jatun macanacuitapish mana ricushunchu, macanacuipi tocana trompetatapish mana uyashunchu. Yarcaipish mana tiyangachu. Chaipica allita causashun” nishpaca,

15maijan saquirishca Judá llactapi causaccuna Mandac Dios rimashcata uyaichic. Israelcunapac tucuita Mandac Diosca: Egipto llactapi causagrinata munashpa, chai llactapi causacucpica,

16chai llactapipish cancuna manchana macanacuipimi huañunguichic. Yarcaita manchacushpapish, Egipto llactapica yarcaihuanmi huañunguichic.

17Egipto llactaman cutishpa, chaipi causagrinata munaccunaca shucllapish mana saquirishpami, jatun macanacuipi yarcaihuan, jatun ungüihuan huañunguichic. Ñuca chaipi causaccunata llaquichicpica, shucllapish mana quishpiringuichicchu. Chaitaca Mandac Dios ñucami nini.

18Israelcunapac tucuita Mandac Diosca: Ima shinami ñuca nina japiric shina piñarishpa Jerusalenpi causaccunata yallita llaquichircani, chashnallatacmi Egipto llactaman riccunatapish llaquichisha. Chaipimi cancunaca mana alli nishcapish, pingaichishcapish, tucuipac mancharinapish causanguichic. Cai llactataca mana cutin ricunguichicchu ninmi.

19Mandac Diosca Judá llactapi maijan saquirishcacunataca: Ama Egipto llactaman ringuichicchu nircami, Chaitaca cunanmi alli huillani.

20Cancunallatac: “Mandac Diosta ñucanchicmanta mañagri. Mandac Dios tucui nishcataca ñucanchicman huillangui. Tucui pai nishcata ruhuashunllami” nishpaca, pandarishpa llaqui tucushcanguichic.

21Chaimantami cunanca Mandac Dios cancunaman imata huillachun mandashcacunata tucui huillarcani. Ashtahuanpish pai imata mandashcataca mana cazushpami causanguichic.

22Chaimanta cunanca caita alli yachacuichic. Chaica, cancuna causagrinata munashca llactapica, jatun macanacuipi yarcaihuan, jatun ungüihuanmi huañunguichic» nirca.