1 SAMUEL 19 - Biblia Quichua Cañar 2010

Saúl Davidta huañuchinata yuyarishcamanta

1Saulca paipac churi Jonatantapish, paita serviccunatapish, Davidta huañuchichunmi mandarca. Shina cacpipish Saulpac churi Jonatanca maimi Davidtaca cuyac carca.

2Chaimantami Davidman huillachun cachashpaca:

—Ñuca taita Saulca canta huañuchisha nicunmi. Chaimanta cuidarishpa, caya tutamanta pacallapi miticugri.

3Ñuca taitahuan pambaman rishpaca, can maipimi cangui chai pushtupimi paihuan casha. Chaipimi can ima shina cashcata ñuca taitaman parlagrini. Pai ima nishcatapish canman huillachun cachashallami— nirca.

4Jonatán Davidta alli nishpa Saulman parlashpaca:

—Jatun mandaclla canta servic Davidta llaquichishpa ama juchallichu. Paica ima mana allitapish cantaca mana ruhuashcachu. Ashtahuanpish imata cashpapish allitami canmanca ruhuashca.

5Paica huañunatapish mana manchashpami, chai filisteo runata huañuchirca. Chashna ruhuacpimi Mandac Diosca tucui israelcunata llaquimanta llucchirca. Canca chaita ricushpami cushicurcangui. ¿Ima nishpatac manapish juchayuc Davidtaca huañuchishpa yahuarta jichashpa juchalligringui?— nirca.

6Jonatán chashna nicta uyashpami Saulca:

—¡Mandac Diospac shutipimi nini: Davidtaca mana huañuchishachu!— nirca.

7Chai quipami Jonatanca Davidta cayashpa ima parlanacushcata tucui huillarca. Paimi Davidtaca Saulpacman pushamucpi, Davidca utcaman shinallatac Saulta servingapac saquirirca.

8Cutinllatac filisteocuna macanacungapac shamucpimi, Davidca paicunahuan macanacungapac llucshirca. Paicunata atishpa achca gentecunata chugrichishpa huañuchicpimi, paipac ñaupamanta miticushpa callparcacuna.

9Mandac Dios cachashca shuc millai espíritu shamushpami Saultaca cutin japirca. Saulca paipac huasipimi lanzata maquipi charicurca. Cutin Davidca arpapimi tocacurca.

10Chaipimi Saulca lanzahuan shitashpa Davidta pirca quingraipi huañuchinata yuyarca. Ashtahuanpish David ladoyacpimi pircapi japirca. Chaimantami Davidca chai tutallatac miticungapac upalla rirca.

11Chai quipami Saulca Davidpac huasipi chapashpa tutamanta Davidta huañuchichun paipac runacunata cacharca. Shina cacpipish paipac huarmi Micalmi Davidmanca:

—Cunan tuta mana cuidarishpaca, cayapacca huañushcami cangui— nirca.

12Shina nishca quipami Micalca Davidtaca ventanamanta huatashpa uricuchirca. Shina uricuchicpimi, Davidca miticushpa rirca.

13Chai quipami Micalca ruhuashcalla shuc diosta japishpa chivo millmamanta ahuashcata saunachishpa, catachishpa Davidpac camapi churarca.

14Saúl cachashca runacuna Davidta japingapac chayacpimi Micalca:

—Davidca ungushcami— nirca.

15Shina nicpimi, Saulca paipac runacunataca: «¡Caipi huañuchingapac camandi Davidta apamugrichic!» nishpa cacharca.

16Chai runacuna huasiman yaicushpa ricucpica ruhuashcalla diosllami camapi chivo millmamanta ahuashca saunata saunashca siricurca.

17Chaimantami Saulca Micaltaca:

—¿Ima nishpatac ñucata cai shina piñacta richun saquishpa umarcangui?— nirca.

Shina nicpimi, Micalca Saultaca:

—Mana richun saquicpica, huañuchisha nicpimi richun saquircani— nirca.

18Chashna pacalla rishpami Davidca Ramá pueblopi causac Samuelpacman chayarca. Chaiman chayashpaca Saúl paita tucui ima ruhuashcatami parlarca. Chai quipami Davidca Samuelhuan Naiot pambapi causangapac rirca.

19Chaita yachashpami Saulmanca: «Riqui, Davidca Ramá pueblopi tiyac Naiot pambapimi causacun» nishpa huillarcacuna.

20Chaimantami Saulca Davidta apamuchun paipac runacunata cacharca. Chaiman chayashpaca Dios ima nishcata huillaccuna tandanacushpa huillacucta, shinallatac chai huillaccunataca Samuel mandacuctami ricurca. Saúl cachashca runacunaca Diospac Espíritu paicunapacman shamucpimi, paicunapish Diosmanta huillarca.

21Chaita yachashpami Saulca shuccunata cutin cacharca. Paicunapish Diosmanta huillai callarircacunami. Chashna tucucpimi, cutinllatac Saulca shuctac runacunata cacharca. Caihuanca ña quimsa cutinmi cacharca. Paicunapish chashnallatacmi Diosmanta huillai callarirca.

22Quipataca Saul-llatac Ramá puebloman rishpa Secú pueblopi tiyac jatun junduman chayarca. Chaiman chayashpami:

—¿Samuelpish, Davidpish maipitac?— nishpa tapurca.

Shina tapucpica:

—Riqui, paica Ramá pueblopi cac Naiot pambapimi— nishpa huillarca.

23Ramá pueblopi cac Naiotman Saúl ricpica, paitapish Diospac Espíritu japircami. Chaimantami paipish Ramá pueblopi cac Naiot pambacaman Diosmanta huillashpa rirca.

24Saulca paipac churanacunatapish llucchishpami, caishuc runacuna shinallatac Samuelpac ñaupapi Diosmanta huillacurcacuna. Paica tucui punzha, tucui tutami lluchulla carca. Shina tucushcamantami: «¿Saulpish, Diosmanta huillacpurallatacmi?» nincuna.